ئەنجامی سەرەتایی هەڵبژاردنی سەرۆکایەتی کۆماری ئێران راگەیاندرا، بەگوێرەی ئەو ئەنجامەی لەلایەن وەزارتی ناوخۆوە راگەیەندراوە مەسعود پزیشکیان کە لەلایەن ریفۆرمخوازانەوە پشتیوانی لێدەکرا توانیوەتی ١٠ ملیۆن و ٤١٥ هەزار و ٩٩١ دەنگ بەدەستبهێنێت.

هەروەها سەعید جەلیلی یەک لە کاندیدەکانی بناژۆخوازان توانیویەتی ٩ ملیۆن و ٤٧٣ هەزار و ٢٩٨ دەنگ مسۆگەر بکات.

هەریەک لە محەمەد باقر قاڵیباف بە بەدەستهێنانی ٣ ملیۆن و ٣٨٣ هەزار و ٣٤٠ دەنگ و مستەفا پورمحەمەدی بە بەدەستهێنانی ٢٠٦ هەزار و ٣٩٧ دەنگ، لە پلەکانی سێهەم و چوارەمدان.  

بەو پێیەی کۆی دەنگەکان ٢٤ ملیۆن و ٥٣٥ هەزار و ١٨٥ دەنگ بووە، هیچ کام لە کاندیدەکان نەیانتوانیوە لەسەدا ٥٠ کۆ یەکی دەنگەکان بەدەستبهێنن، هەڵبژاردنەکە دەکەوێتە گەڕێ دووەم کە بڕیارە هەینی داهاتوو ٥ی تەمووز بەڕێوەبچێت و هەریەک لە پزیشکیان و جەلیلی بتوانن زۆرترین دەنگ بەدەستبهێنن دەبنە سەرۆک کۆمار.

لەسایەی بایکۆتی بەرفراوانی لایەنە بەرهەڵستکارەکان و ناڕەزایەتی بەرینی جەماوەری رێژەی فەرمی بەشداری لەو هەڵبژاردنی سەرۆکایەتی کۆماری ئێران بە نزیکەی لەسەدا ٤٠ راگەیەندراوە، بەڵام چاودێران و چالاکوانانی سیاسی باس لەوەدەکەن رێژەی راستەقینەی بەشداری زۆر لەوە کەمترە.

لە هەڵبژاردنەکەدا زیاتر لە ٦١ ملیۆن مافی بەشدارییان هەبوو، لە کۆی ژمارەی فەرمی بەشداربووان، زیاتر لە یەک ملیۆن و ٥٠٠ هەزار دەنگی پوچەڵ خراونەتە سندوقەکانی دەنگدانەوە.

هـ . ب