سەرلەبەیانی ئەمڕۆ پرۆسەی دەنگدانی تایبەتی هەڵبژاردنی ئەنجومەنی پارێزگاکانی عێراق دەستیپێکرد و لە گەڕەکی سەدری شاری بەغداش بە نارنجۆکی دەنگی هێرشکرایە سەر ناوەندێکی دەنگدانی تایبەت.

بە گوێرەی زانیارییەکان هێرشەکە هیچ زیانێکی گیانی و ماددی لێنەکەوتووەتەوە.

وتەبێژی وەزارەتی ناوخۆی عێراق رایگەیاندووە، کێشەیەکی گەورە نییە و لێکۆڵینەوە لە بارەی رووداوەکە دەکەین.

جێی ئاماژەیە لە دەنگدانی تایبەتدا کە ئەمڕۆ بەڕێوەدەچێت، پۆلیس، سوپا، هەموو کەرتەکانی وەزارەتی ناوخۆ و هەروەها حەشدی شەعبی بەشداری دەکەن.

بڕیارە رۆژی دووشەممە ١٨ی کانونی یەکەم/ دیسەمبر دەنگدانی گشتیی بۆ هەڵبژاردنی ئەنجومەنی پارێزگاکانی عێراق بەڕێوەبچێت.

لایەنە کوردیەکان بەچەند لیستی جیاجیا بەشدارییان لە پرۆسەکەدا کردووە و لە هەوڵی بەدەستهێنانی بەشێک لە کورسیەکانی ناوچە جێناکۆکەکان لە پارێزگاکانی نەینەوا، کەرکوک، سەڵاحەدین و دیالە.

هـ . ب