نوسینگەی راگەیاندنی سەرۆکایەتی کۆماری عێراق بڵاویکردەوە، بە مەبەستی بەشداریکردنی لە لوتکەی هاوبەشی وڵاتانی ئیسلامی کە تایبەتە بە دۆخی غەزە، لەتیف رەشید سەرۆککۆماری عێراق سەردانی ریازی پایتەختی سعودیەی کردووە و لە پەراوێزی ئەو سەردانەدا چاوی بە بەشار ئەسەد سەرۆکی دەوڵەتی سوریا کەوتووە.

وەزارەتی دەرەوەی سعودیە رایگەیاندبوو، کە بۆ 'تاوتوێکردنی دۆخی هەستیار و نائاسایی غەزە، لوتکەی هاوبەشی وڵاتانی عەرەبی و ئیسلامی بەشێوەیەکی نائاسایی بەڕێوەدەبەن.

وەزارەتەکە هێمای بۆ ئەوەشکردبوو، کە دوای راوێژی نێوان سعودیە لەگەڵ کۆمکاری عەرەبی و رێکخراوی هاریکاری ئیسلامی بڕیارییان لە سەر بەستنی ئەو لوتکە هاوبەشە داوە.

جیا لە سەرۆککۆماری عێراق شاندێکیش کە سەرۆکوەزیران محەمەد شیاع سودانی و وەزیری دەرەوە فوئاد حسێنیشی تێدایە، بەمەبەستی بەشداری لەو لوتکەیە سەردانی ریازیان کردووە.

هـ . ب