کۆنگرەی ستار لە بەیاننامەیەکدا هێرشەکانی ئەمڕۆی دەوڵەتی داگیرکەری تورکی لە قامیشلۆ، کە ئۆتۆمبێلێک تێدا بە ئامانج گیرا، شەرمەزار کرد و ڕایگەیاند: "تا کۆتایی بە فەلسەفەی "ژن، ژیان، ئازادی" تێکۆشان دەکەین."
کۆنگرەی ستار بە مەبەستی شەرمەزار کردنی هێرشەکەی ئەمڕۆی دەوڵەتی تورکی داگیرکەر بۆ سەر قامیشلۆ کە بووە هۆی شەهیدبوونی دایکێک و کوڕەکەی، ڕاگەیەندراوێکی بڵاوکردەوە.
بەیاننامەکە لە شاری قامیشلۆ و لەبەردەم ناوەندی کولتووری- هونەری محەممەد شێخۆ لە لایەن وتەبێژی کۆنگرەی ستارەوە خوینداریەوە و بە توندی هێرشەکە شەرمەزار کرا.
ڕێحان لوقۆ وتەبێژی کۆنگرەی ستار ڕایگەیاند، لەم هێرشەدا هاوڕێمان خالیدە محەممەد شەریف، تەمەن ٤٥ ساڵ و کوڕەکەی (هەژار عەدنان سلێمان) شەهید بوون و وتی، ئامانج لە هێرشەکانی حکومەتی تورک لە ناوچەکە کۆمەڵکوژی و لەناوبردنی دەستکەوتەکانی ژنانە. بۆ ئەم مەبەستەش پێشەنگەکانی شۆڕش و ئەو کەسانی لە دەوری فەلسەفەی ژن، ژیان، ئازادیی کۆبوونەتەوە بەئامانج دەگرێت."
ڕێحان لوقۆ ئاشکرای کرد، دایە خالیدە کە لەم هێرشەدا شەهید کرا، یەکێک بوو لە پێشەنگەکانی کۆمەڵگا و بە وڵاتپارێزی خۆیەوە ناسرابوو. ئاماژەی بەوەشکرد کە ئەم هێرشانە بە ڕەزامەندی هێزە نێودەوڵەتییەکان ئەنجام دەدرێن و بێدەنگی نێودەوڵەتی لە بەرامبەر هێرشەکانی دەوڵەتی تورکدا شەرمەزار کرد.
ڕێحان لوقو لە کۆتایی قسەکانیدا وتی: "هیچ کەسێک ناتوانێت ئیرادەی ژنانی ئازاد بشکێنێت، ئێمە تا کۆتایی بە فەلسەفەی 'ژن، ژیان، ئازادی' لە دژی هێرشەکان تێکۆشان دەکەین."
بەیاننامەکە بە وتنەوەی دروشمی "شەهید نامرن" و "ژن، ژیان، ئازادی" کۆتایی هات.
