تەرمی ڕۆسێڵ محەمەد خەڵفی ١٣ ساڵ کە لە ٢٤ ی تشرینی دووەم لە گوندی حەلیسەی شارۆچکەی فافینی سەربە شەهبا لە ئەنجامی هێرشەکانی دەوڵەتی تورکی داگیرکەر و چەتەکانی بریندار بوو، دوێنێ لە کاتی وەرگرتنی چارەسەر لەنەخۆشخانە شەهیدبوو، بە بەشداری خەڵکی کانتۆنی عەفرین و شەهبا لە گۆڕستانی شەهید زۆزان ئامانۆس لە شارۆچکەی فافین بە خاک سپێردرا.
لە مەڕاسیمەکەدا لەسەر ناوی مافەکانی منداڵانی کانتۆنی عەفرین و شەهبا لاڤا ئەحمەد قسەی کرد و گوتی: "دەوڵەتی تورکی داگیرکەر و چەتەکانی هەمووکات خەڵکی مەدەنی و منداڵان بە ئامانج دەگرن و لە دژی ئەوان تاوانێکی دڕندانە دەکەن".
پاشان لەسەر ناوی مەجلیسی کانتۆنی عەفرین و شەهبا موستەفا حەسەن گوتی: "حەوت ساڵە لە شەهبا لە دژی هێرشەکانی دەوڵەتی تورکی داگیرکەر و چەتەکانی تێکۆشان و بەرخۆدان دەکەین. ئەمڕۆش ڕۆسێل لەبەر ئەو هێرشانە شەهیدبوو".
لە کۆتاییدا ناسنامەی شەهید خوێنرایەوە و ڕادەستی بنەماڵەکەی کرا.