باقی شەفیعی ڕۆناکبیر، شاعیر و نووسەری کوردی هەورامی کۆچی دوایی کرد

دوێنێ باقی شەفیعی ڕۆناکبیر، شاعیر و نووسەری هەورامی خەڵکی شاری پاوەی ڕۆژهەڵاتی کوردستان لە تەمەنی ٧٤ ساڵیدا کۆچی دوایی کرد.

باقی شەفیعی دوای پەنجا ساڵ خزمەتکردن بە زمان و کلتوری هەورامی لە تەمەنی ٧٤ ساڵیدا کۆچی دوایی کرد و لە چاوپێکەوتنێکدا دەڵێت کە لە ساڵی ١٩٤٦ لە پاوە لەدایک بووە.

باقی شەفیعی بۆ پاراستنی میراسی مێژووی هەورامان لە ماڵەکەیدا دەستی بە کۆکردنەوەی هونەری دەستی و میراسی ٢٠٠ ساڵی هەورامان کرد و بەو شێوەیە مۆزەخانەیەکی بچووکی دروست کردبوو. لە هەموو کارەکانیدا پشتی بە ئیرادە و هێزی خۆی دەبەست و هیچ ناوەندێکی ڕژێمی داگیرکەری ئێران پشتگیری چالاکیە کلتوریەکانی باقی شەفیعی نەکرد.

باقی شەفیعی لەگەڵ ئەوەی نەخراوەتە بەرخوێندن و خوێندن و نووسینی نەدەزانی، بەڵام نزیکەی ٦ هەزار بەیتی شعری بەرهەمهێناوە و لە لایەن کچەکەیەوە تۆمار کراون.

ئەنجومەنی (شنه‌و فه‌رهه‌نگو هه‌ورامانی) لە ٢٠ی ئازاری ٢٠١٩ مەراسیمێکی رێزلێنانی بۆ باقی شەفیعی سازکردبوو. هەرچەندە ئیدارەی کلتوری و ئەرشەدی ئیسلامی پاوە بەشداری لە مەراسیمەکەدا کرد، بەڵام ئامانجی بەرپرسانی کۆماری ئیسلامی، دەستکەوتی سیاسی و بانگەشە  و بەرژەوەندیی  ڕژێم بوو. هەروەها لە مەراسیمێکی تایبەتدا لە مۆزەخانە تایبەتەکەیدا پەردە لەسەر کتێنی (هەواری خاسان)ی باقی شەفیعی هەڵدرایەوە.

هەروەها باقی شەفیعی دووبەیتەکانی بابا تاهری ئۆریان شاعیری گەورەی کوردستانی بۆ سەر شێوەزاری کوردی هەورامی وەرگێڕاوە.

ئه‌ر دڵ دڵبه‌را، ئه‌ی دڵبه‌ر کاما

    ئه‌ر دڵبه‌ر دڵا ، دڵ چێشش ناما؟

دڵ و دڵبه‌ری تێکه‌ڵاو وینوو

    دڵ کام، دڵبه‌ر کام، سه‌ره‌م سه‌رساما!

بێگۆمان کۆچی دوایی باقی شەفیعی بۆشاییەکی زۆر گەورە لە بواری چالاکیە کلتوری و وێژەییەکانی هەوراماندا دروست دەکات.

ف.ق