حسین ئەمیر عەبدوڵڵاهیان وەزیری دەرەوەی ئێران ئەمڕۆ سێشەممە بە یاوەریی شاندێکی وەزارەتەكەی و ژمارەیەك لە ئەندامانی بڵندپایەی ئێران گەیشتنە شاری مۆسکۆی پایتەختی رووسیا.
ئەمیر عەبدوڵڵاهیان لەسەر رووداوە ناوچەییەكان و بە زۆری بۆ چارەنووسی دانوستانە ئەتۆمییەکانی ئێران لە ڤییەنا سەردانی رووسیای كردووە.
وەزیرانی دەرەوەی ئێران و رووسیا زیاتر تەركیزیان لەسەر رێككەوتنی ئەتۆمیی ساڵی ٢٠١٥ی نێوان ئێران و وڵاتانی رۆژئاواییە، کە بە "بەرجام" ناسراوە.
ئەو سەردانە لە کاتێکدایە دانوستانە ئەتۆمییەكانی ئێران و وڵاتانی رۆژئاوایی راوەستاوە.
ئانریكە مۆرا ئەندامی كاروباری یەكێتیی ئەوروپا لەو بارەیەوە رایگەیاندبوو: "دەستێوەردانی دەرەكی" هۆكاری راوەستاندنی دانوستانەکانە.
لە دوای شەڕی نێوان رووسیا و ئۆکراینا چارەنووسی دانوستانە ئەتۆمییەکانی ئیران بەرەو نادیاری رۆیشتووە، چونکا رووسیا یەکیکە لەلایەنەکانی رێککەوتنەکە و بەهۆی شەڕی ئۆکرایناوە گەمارۆیەکی زۆری خراوەتەسەر و ئەوەش کاریگەریی راستەوخۆی لەسەر ئەو دانوستانە ئەتۆمییەکانی ئێران هەبووە.
ژ.ت
