چەند رۆژ لەوە پێش ناو و وێنەى بەڕێوەبەرانى پارتى ژیانى ئازادی کوردستان (پەژاک) و کۆمەڵگەى دیموکراتیک و ئازادى رۆژهەڵاتى کوردستان (کۆدار) لەسەر تۆڕە کۆمەڵایەتییەکان دا بڵاوکرابوونەوە. بانگەشەى ئەوە کرابوو "ئێران بۆ کوشتنى بەڕێوەبەرانى پەژاک و کۆدار خەڵاتى داناوە".

ماڵپەڕی بیتاوان، کە نزیکە لە سوپاى پاسدارانى ئێرانەوە بڵاویکردووەتەوە، ئەوە پلانى دەزگاى هەواڵگری و سیخوڕیى تورکیا (میت)ە.

ناو و وێنەى زیلان ڤەژین هاوسەرۆکى پەژاک، فوئاد بێریتان و زیلان تانیا هاوسەرۆکانی کۆدار، ئامەد شاهۆ ئەندامى مەجلیسی پەژاک، باران بێریتان، مەزڵوم حەفت تەن و هیوا ئەرگەش لە تێلگرام و تۆڕە کۆمەڵایەتیەکاندا بڵاوکرابوونەوە و بانگەشەى ئەوە کرابوو "ئێران بۆ کوشتنى ئەو کەسانە خەڵاتى دیاریکردووە".

"پلانى میت -ە"

ماڵپەڕی بیتاوان، کە نزیکە لە سوپاى پاسدارانى ئێرانەوە لەوبارەیەوە هەواڵێکى بڵاوکردەوە. لە هەواڵەکەدا هاتووە، ئەو پلانە لەلایەن دەزگاى هەواڵگریى تورکیا میت-ەوە ئامادە کراوە.

ئاماژە بەوەشکراوە، دەوڵەتى تورکیا هاوشێوەى ئەو لیستە کە لە دژی بەڕێوەبەرانى پەکەکە ئامادى کردووە، لیستێکى لە دژی بەڕێوەبەرانى پەژاک و کۆدار ئامادە کردووە و دەیەوەێت بە کوشتنى چەند کەس لە بەڕێوەبەرانى پەژاک و کۆدار ئاگربەستى ساڵی ٢٠١١ لە نێوان ئێران و پەژاک تێکبدات و شەڕ بباتە ئاست و قۆناغێکى تر.

ئەوەش خراوەتەڕوو، میت دەیەوێت پلانەکەى لە سلێمانى، رانیە، سەنگەسەر و قەڵادزێ، کە ناوچەکانى ژێر کۆنترۆڵى یەکێتیى نیشتمانیى کوردستانن، جێبەجێ بکات.

بەپیى ئەو هەواڵە، دەوڵەتى تورکیا ماوەیەکى زۆرە دەیەوێت یەکێتى هاوشێوەى پارتى بەکار بهێنێت بۆ ئۆپراسیۆن لە دژى پەکەکە.

ر.م