" ڕاپیمای ڕێزگرتەی جە ئیراڎەی " کە دژوو نیایرەو قەیومی جە شارەوانی جۆلەمێرگینە دەسش پنەکەردەن بەردەوامیش هەن. جە مەنتیقەو ئەلباکی شارو وانی، ٣٥٠ کەسۍ دلېشانە هامسەرۆکی گرڎینوو پارتوو هەرێمە دیموکراتیکەکا (دەبەپە)ی کەسکین بایندر، پەرلەمانتارا، هامسەرۆکا شارەوانی، نوێنەرا ڕێکوستەکا گلېرگەی مەدەنی، شەوۍ چا مەنێوە. چالاکا ڕاپیماکەی جە سەرەتاو سەعبینە جە مېیانوو شارۆچکڵەکەینە کوۍ بیێوە و بە دروشمەکا "ژەنی ،ژیۋای، ئازاڎیی"، "جۆلەمێرگ هینوو ئێمەن"، "بژیۋۆ مڎرامانوو زینڎانیا"، "ڕۆ مۍ و ملۆ، ئاکەپە باجوو ئی تاواناشە مڎۆوە" بە مېیانوو شارۆچکڵەکەیرە ڕاپیمایشا کەرد دماو یەرۍ کیلۆمەترا ڕاپیمای گلېرۆبیەی ڕۆنامەوانیشا سەزکەرد.

فەرای مەرتۆغڵو، هامسەرۆکی گرڎینوو پارتوو بنیاڎنیایۆ سۆسیالیستی ۋەردەموو لافیتەو "رێزگرتەی جە ئیراڎەی، ڕا بە قەیومی مەڎەیدۍ" قسێش کەردۍ و ئەرەیاۋناش، سەرەڕاو گرڎوو ئاستەنگی و ۋەربەسەکا، بەردەوامێنمۍ جە ڕاپیماکەیما، ئاماژەش پانەیچ کەرد، سیاسەتوو سەرکوتکەردەی جە لایەنوو حکومەتوو ئاکەپە و مەهەپەیۊ ۋەرا ۋەر بە گەلوو کوردی و گەلا بەردەوامیش هەن و ماوەو یەرۍ خولان مافوو دەنگدای گەلوو کوردی پاشێل مکریۆ. دەسەڵات ڕا نمەڎۆ گەلوو کوردی ۋێش بەرۆ ڕاوە و سەرۆک شارەوانی ۋێش هۊرچنۆ. قەیوم جە کورڎەسانەنە مەڵامەتوو چارەسەرنەکەردەی کێشەو کوردین بە ڕاو دیموکراسیانەی. مشۆم گرڎوو ۋیرووڕای گرڎیی، شۆڕشگێڵنا و ئۆپۆزسیۆنی کە چی ئاژەیە ناڕەحەتێنۍ، بێدەنگۍ نەبا. ئەگەر بێدەنگۍ بیمۍ، گرفتەکۍ گلېرگەی تا مۍ ڕووە جە پەرە سانای مکەرا، پۊکەی پەنەوازا ئی ڕاپیمایە فرە قەوەتتەر بلۆڕاوە پەی ئانەی گرڎ جە هەلومەرجێوە ئازاڎ و یەکسانەنە پێوەرە بژیومۍ.

جە دمادمایی قسەکاشەنە فەرای مەرتۆغڵو واتش: "ئێمە گەرەکمانە گرڎ کەسۍ دەنگوو ۋێش دژوو ئی نادادپەروەری و بێ یاساییە بەرز بکەراوە. سوپاس و پنەزانای ۋێما ئاراسەو گرڎوو ئا کەسا مکەرمۍ کە جە ڕاپیماکەینە چنیما بێنۍ و بەرەو یانەکاشا ڕووەمارە کەردۍ و پەشتگیریشا ۋنەکەردیمۍ."

دماو قسەکا، چالاکا بەرەو سنوورو جۆلەمێرگی کۊتۍ ڕا.