سەرۆکو یەنەکەی، بافڵ تاڵەبانی جە کەرنەڤاڵو بانگەشەو پارتەکەیشەنە دهۆکەنە ڕەخنەش جە پەدەکەی گێرت و واتش: "٤٠٠ دەگۍ ئێمە چۆڵۍ بیێنۍ، بەمەڵامەتو هامکارییەکا شمۆ چنی ئەرەگیرا، ڕۆ بە ڕۆ خاکەکەما ئەرەگیر مکریۆ و ورەشدێش بە ئەرەگیرا، ئینە کوردایەتییا؟".
سەرۆکو یۆبیەی نیشتیمانیی کورڎەسانی (یەنەکە)، بافڵ تاڵەبانی جە پارێزگاو دهۆکینە و جە کەرنەڤاڵو بانگەشەو پارتەکەیشەنە پەی هۆرچنیەو پەرلەمانو کورڎەسانی پەیامێوە تنش ئاراسەو پەدەکەی کەرد، واتش: "کەی بۍ دما جار باسو چوارپارچەو کورڎەسانیتا کەرد، چێشتا کەرڎ بە ئێزدییەکا شمە ئاڎێتا ورەتۍ، پنەشا واتیدۍ شمە بڕەمدۍ تفەنگەکاتا دەیدۍ بە ئێمە ئاڎیچتا نەڎۍ پنە، ئینەن یەکڕیزی کورڎەسانی هەی بێ شەرما، ٤٠٠ دەگۍ ئێمە چۆڵۍ بیێنۍ، بەمەڵامەتو هامکارییەکا شمۆ چنی ئەرەگیرا، ڕۆ بە ڕۆ خاکەکەما ئەرەگیر مکریۆ و ورەشدێش بە ئەرەگیرا، ئینە کوردایەتییا ؟".
جە درێژەو قسەکاشەنە واتش: "چن ساڵۍ چێوەڵتەر واتم کاک مەسعود داواکاریێوە تایبەتم هەن، چنی هەمڕاو من مەزڵوم عەبدی بنیشەرە، بەڵام ڕازی نەبی مەرامو من ئانە بۍ ئا کارەساتەی کە ڕووەشدان وەش نەبۆ، واتم بۆرۍ پێوەرە پڕۆسەو ئاشتی وەش بکەرمۍ چنی برادەرا سووریای و کەشی (قەندیل) و تورکیای، بەڵام نەتاواشا بکەراش".
هەرپاسە ئاماژەش پانەی کەرد کە پەدەکە چی سنوورو دهۆکی و بادینانینە بە گرڎ جۆرێ ئازادی ڕابەربڕیەی کپ مکەرۆ، پەنەوازا جەڕاو هۆرچنیەیۆ پەدەکەی مردنمۍ.
