بافڵ تاڵەبانی سەرۆکوو یەنەکەی پەیامێوەنە بە بۆنەو جینۆسایدوو ٣ێ ئابوو ٢٠١٤و ئێزدییەکاو واتش: "جینۆسایدكەردەی واڵە و برایاو ئێزدییوە تیرۆریساو داعشیوە، تاوانێوی ویرنەکریان و ئازارێوی گەورێنە دڵوو گردیمانە".
بافڵ تاڵەبانى سەرۆکوو یەنەکەی بۆنەو ویەردەی١٠ ساڵا ملوو جینۆسایدوو ئێزدییەکارە لاو چەتەکاو داعشیوە پەیامێوەش وەڵا کەردۆ.
پەیامەکەنە ئامان، جینۆسایدكەردەی واڵە و برایاو ئێزدی لاو تیرۆریستاو داعشیوە، تاوانێوی ویرنەشیەوەن و ئێشیوی گەورەن دڵوو گردیمانە، ئارۆ بە دڵتەنگیێوی قووڵۆ یادوو مەردەی و بێسەروشۆنکەردەی ئازیزاما مکەرمێوە، كە زێدوو وێشانە بەتەنیا جیائازیێ.
ماچۆیچ، ئێمە بە پەرۆشۆ هەوڵێ پەی بۆ ئاوەدانكەردەیوەیی شنگالی و گێڵایوەی ئێزدییەكا پەی زێدوو وێشا مدەیمێ، هەرپاسە جەخت جە هەسکەردەیوەی هەوڵەكاما مکەرمێوە پەی گێڵایوەی ئانیشا کە هەڵای چارەنویسشا نادیارەن.
ئاماژەش پانەیچە کەردەن، گەرەکمانە دوور جە درووشم و تێكەڵكەردەی ژیوای ئێزدییا بە ملەملێ سیاسییەكا، هەرمانە پەی پارێزنای مافەكاشا بکەرمێ و پارێزنەرێ هەقەتینێ ئا پێكئاما گرنگاو كوردستانی بیمێ.
واتەنیچش، ئێزدییەکێ بەشێوی گرنگ و فرەڕەنگوو كوردستانی وەش مکەرا و تارێخێوی درێژشا جە قووڵكەردەیوەی پێوەژیوای و خەباتی پەی خاكەكەیما تۆمار کەردەن.
ئانەیچ ئینا وەختێوەنە، ١٠ ساڵێ چێ وەڵتەر چەتەکاو داعشی هجوومشا کەرد سەروو شنگالی و دەوروبەریش پا بۆنەوە هەزاران کەسێ کۆکوشی کریێ و سەدان هەزارێ تەرێچ ئاوارێ بیێ.
