دەسەی دادوەری هۊرچنیەکا جە ئەنجوومەنوو دادوەری عێراقی ئەرەیاۋنێوەش سەبارەت بە هۊرشێونایۆ یەرۍ جە پارتە کوردیەکا جە عێراق و هەرێموو کورڎەسانینە وەڵاکەردۆ.

بەپاو ئەرەیاۋناکەی ئەنجوومەنو دادوەری قەرارش دا بە هۊرشێونایۆ هەریۆ جە پارتەکا (تەڤگەری ئازاڎیی کورڎەسانی، پارتوو ئازاڎیی دیموكراتی ئێزدیی، پارتوو بەرەو ئەرەکۊشای دیموكراتی).

بەپاو قەرارەکەو ئەنجوومەنو دادوەری بارەگاکۍ ئا یەرە پارتەیە وزیارە و دەسسەرو كەلوپەلی و داراییشارە مگیریۆ.

دەسەو دادوەری هۊرچنیەی بەهانۍ ئا قەراریشە پەی هۊرشێونایۆو قەڎەغەكەردەی ئا یەرە پارتەیە گێڵنانۆ، پەی ئانەی کە گوایە ئا پارتۍ جە ڕوو دارایی و سیاسی و ڕێکوستەیۆ عیلاقەشا بە پارتێوە جبەرو عێراقیوە هەن و جەلایەنو هێزێوە جبەریۆ ئاڕاسە مکریا کە مەبەسش پارتوو کرێکارا کورڎەسانی-پەکەکەیا.

ئەنجوومەنى دادوەری ماچۆ،  بەپاو بڕگەو یوەم و دووەمی جە مادەو ٢٥ و یاساو پارتە سیاسییەكانە ژمارە ٣٦ و ساڵەو ٢٠١٥ قەرارەکەشا دان.

ئی قەرارەو ئەنجوومەنو دادوەری عێراقی دماو ئا ڕێککەوتەیا مۍ کە ئێساڵ دەوڵەتو تورکی و عێراقی جە ڕوو سیاسی و سەروازییوە سەرش ڕێکێکۊتێنۍ، پۊکەی بە بڕواو چەمڎارا سیاسی ئی قەراریچە چېرو ڕۆشنایی ئا ڕێککەوتەینە بەرشیەن.