رۆژنیوز دیمەنی تازەو هامکاری پەدەکەیش چنی دۆڵەتو تورکی وەڵاکەردۆ. جە دیمەنەکانە موینیۆ جە دەگاو بلەو بارزانینە کادر و ۋەرپەرسا پەدەکەی کامێرەی چەمڎاری پەی سیخوڕی سەرو هێزەکاو گەریلای منیارە.
ئاژانسوو هەواڵوو ڕۆژنیوزی، بە دیمەن بەڵگەو سیخوڕیێوە پەدەکەیش پەی دۆڵەتو ئەرەگیرو تورکی، جە ناوچەو بلەو بارزانی جە ڕاو نیایرەو کامێرەی چەمڎاریۆ سیخوڕیی سەرو ڕاو گەریلاکاو ئازادیی و هاموڵاتییاوە مکەرۆ، وەڵا مکەرۆوە.
پەدەکە چنی هامکارییە بەردەوامەکاش پەی دۆڵەتو ئەرەگیرو تورکی بەمەبەسو ئەرەگیرکەردەو پانیشتوو کورڎەسانی، خزمەتو سوپاو تورکی دژو گەلوو کوردی و ئەرەکۊشای ئازادیوازیشا درێژە پنە مڎۆ.
هەرچڼە تا ئیساتۍ چنین خیانەتۍ پەدەکەی ئاشکرۍ بیێنۍ، بەڵام هەڵای بەردەواما، چا چوارچێوەیچەنە دیمەنێوە کە بەڵگێوەتەرو خیانەتو پەدەکەی بەروزۆ جە ڕاو سەرچەمېوە تایبەتیوە کۆتەن دەسو ئاژانسەکەیما، ئاڎیچ نیایرەو دامێوەن جە ڕاو کامێرەی چەمڎاریۆ کە جە لایەنو “سەروان خەلیل بازی بارزانی” ۋەرپەرسو ئاسایشو گرڎییی ناوچەو بلەو بارزانی کە ئا ۋەرپەرسە سەر بە پاراستن و پەدەکەین و پەی کۆنتڕۆڵکەردەی خەڵکو ناوچەکەی و گەریلاکا ئازادیی نریانەرە.
بە پاو ئا زانیارییا کە هەمان سەرچەمە بە ئاژانسەکەیماش ئەرەیاۋنان، ۋەرپەرسو ئاسایشو گرڎیی ناوچەو بلەو بارزانی، کە ئا ۋەرپەرسەو پاراستنو پەدەکەی ملۆ پەی دووکانو فەرهاد محەمەدی کە کەلوپەلو ترۆمبێلا ورەشۆ، هەرپاسە فەرهاد محەمەد کە ۋێچش جە ئاسایشو پەدەکەینە کار مکەرۆ، ئا کامێرۍ کە پەی دامنیایۆ گەریلای با جە ناوچەکا گەریلاینە منریارە، جە ٢٦/٨/ ٢٠٢٤ ی ئاماڎۍ مکەرۆ و ڕادەسو ۋەرپەرسەکەو ئاسایشو پەدەکەی مکەرۆ.
ۋەرپەرسەکەو ئاسایشو بلەو بارزانی جە ١/٩/ ٢٠٢٤ ینە ئی کامێرا جە ژوورو ئاسایشینە لاو ۋێشۆ تاقی مکەرۆوە، گرڎو جووڵەکا ئا ڕووەیە جە ئاسایشەنە مکریا، جە کامێرەکانە تاقی مکریاوەو تۆمارۍ مکریا.
جە ٥/٩/ ٢٠٢٤ ینە ۋەرپەرسەکەو ئاسایشو پەدەکەی چنی دووۍ کەسا تەری کامێراکا سەرو جاڎێوە کە پەیلوایشا چامنەن کە گەریلا ئاموشۆو ڕەوتش پۆرە مکەرا، منیارە، پەی ئانەی نە پیویۆ بە وردی شاراشۆ، ئی دامەو کامێرەیە کە ۋەرپەرسەکەو پەدەکەی نیانشەرە، نەک تەنیا جووڵەو گەریلاکا بەڵکم جووڵەو خەڵکو ناوچەکەیچ تۆمار مکەرۆ و سیخوڕیی سەرو هاموڵاتییایچەرە مکەرۆ.
