بەمەبەسوو مبارەکبایی ساڵیاڎو هەڵمەتەو ١٥و تەباخی ژمارێوە جە جوانا کورڎی و دۆسەکاشا جە بەریتانیا لوۍ سەرو سنەودانیەی و جە پەیامو چالاکییەکەینە ئەرەیاۋییا "مڎرامانوو جوانا کورڎی بە دەنگوو گوللۍ عەگیدەکا سەرگنۆ".
ڕۊو یەکشەممەی ژمارێوە جە جوانا کورڎی و ئینترناسیۆناڵیستەکا بە چالاکیێوە کەشەوانی پەی سەرو کەشو سنەودانیەی یاڎو هەڵمەتەی تاریخیەو ١٥و تەباخو ١٩٨٤یشا کەردۆ، کە بە فەرماندەیی مەعسوم کۆرکماز (عەگید)ی کارەوانوو ئەرەکۊشای چەکڎاری کۊت ڕا، کە ٤٠ ساڵېن بێ مردای بەردەواما.
جوانەکۍ جە ماوەو یەرۍ سەعاتانە یاوۍ قولەپۆپەو کەشوو سنەودانیەی و چا سەرەتا بە دەیەقێوە بێدەنگی یاڎو گەشمەرڎا کریاوە و دماتەر بەنامۍ جەمەو کوردی نۆرس وێستی لیڤەرپولی، ئەیلەم کەریم قسێش کەردۍ و چنەشەنە باس جە گرنگی هەڵمەتەو ١٥ و تەباخی کریاوە، کە پېسە جەژنەو ژیۋایۆو گەلوو کورڎی ئشناسیان.
دماتەر ئیسحاق میلانی هامسەرۆکوو گلېرگەی ئازاڎیی جە بەریتانیا سەرەڕاو مبارەکبایی یاڎو ٤٠ ساڵەو هەڵمەتەو ١٥و تەباخی، سوپاسو جوانا هەرچوار پارچەو کورڎەسانی و دۆساشا کەردش کە بە جۆش و خرۆشۆ بەشداریشا چا یادەنە کەردەن. ئاماژەش پانەیچ کەرد کە جوانەکۍ پەشت قایم بە دەنگوو گوللۍ عەگیدەکا بەرۍ گنا.
هامسەرۆکوو گلېرگەی ئازاڎیی جە بەریتانیا جە بەشێوە تەرو قسەکاشەنە سەرنجش وست سەرو بەردەوامی گۆشەگیری رەهای جە ئیمراڵینە و واتش: "پەنەوازا گرڎوو جیهانی و بەتایبەتی دەوڵەتو تورکی فاشیستی بزانا، ئێمە بە سەرمەشقایەتی ژەنا، جوانا و دۆسەکاما ئەرەکۊشایما پەی ئازاڎیی جەستەیی رابەر ئاپۆی و چارەسەری پەرسوو کورڎی فراوان مکەرمۍ و تا یاوای بە مەرامەکاما بەردەوامۍ بیمۍ جە ئەرەکۊشای".
ئیسحاق میلانی جەختیچش کەردۆ، کە دژوو گۆشەگیری رەهای جە ئیمراڵینە و ڕاگێرتەی جە دیڎارو بنەیانەی و پاڕێزنەرا چنی رابەرو گەلوو کورڎی عەبدوڵا ئۆجالانی کە ٤١ مانگێن بەردەواما، گرڎ شۊنێوە مکەرا بە مێڎانوو ئەرەکۊشای دژوو گۆشەگیری.
بەشدارا چالاکییەکەی پەیاموو چالاکیەکەی و پرسوو گۆشەگیری رەها و ئیمراڵییشا یاونا بە سەڎان کەشەوانا و گەشتیارا کە سەرو قولەپۆپەو کەشەکەینە بێنۍ.
دماو چوار سەعاتا چالاکیەکە بە واتەیۆ دروشمەکا پېسە "ئازاڎیی پەی رابەر ئاپۆی"، "ژەنی، ژیۋای، ئازاڎیی"، "بژیۋۆ مڎرامانوو گەلوو کورڎی" دمای بە چالاکییەکەی ئاما.
