کۆمەڵەو ژەنە ڕۆنامەواناو میزۆپۆتامیای (مەکەگە) و کۆمەڵەو ڕۆنامەواناو دیجلەی و فوراتی (دەفەگە)، دەنیز فوراتەی ڕۆنامەوانەشا سەروو قەبرەکێشۆ یادە کەردۆ، کە هجووموو داعشینە ساڵەو ٢٠١٤ پەی سەروو کەمپوو مەخمووری گەشمەردێ بییە، یادەکە قەبرسانوو گەڕەکەو خاچ خاتوونەو ئێبەخوو وانینە کریا، بەشێو جە ڕێکوزیایەکاو ژەنا و پارتەکاو ئەدایاو ئاشتی بەشدارێ بێنێ.

دماو دەیەقێوە ڕێزگێرتەی وەنەو خەباتکاراو چاپەمەنیی ئازادی، ئەندامەو مەکەگەی زەلال تونچە واتش: "پێسەو خەباتکاراو چاپەمەنیی ئازادی، درێژە بە کۆشیای هامڕا دەنیز فوراتێ مدەیمێ و قەڵەم و کامێرەکەیش هورمگێرمێوە."

دمایی هامسەرۆکوو (مەبیا-دەر)ی، یوسف دوندار واتش: "هامڕا دەنیزە جە کۆشیای وێشنە دلێ هامڕایەکاشەنە داراو کەسێتیێوی تایبەتی بێ، تا دما هەناسە قەڵەمەکەش فڕە نەدا."

هامسەرۆکوو دەم پارتیی ئێبەخ، پنار دەمیر واتش: "دەنیز فوراتە و هامڕاکێش، پێسەو کوردی و خەباتکاروو چاپەمەنیی ئازادی میراتێوی گەورەشا جیا ئاست و درێژە بە کۆشیایشا مدەیمێ."

ئەندامەو مەجلیسوو ئەدایاو ئاشتی، زوڵەیخا تونچە هجوومو چەتەکاو داعشیش شەرمەزار کەرد و ناڕەزایەتییش بەروست وەراوەروو هامکاریی پەدەکەی پەی ئاکەپەی، داواش جە پەدەکەی کەردە:" زووتەرین وەختەنە دەس چی هامکارییە قیزەونەیە هوربگێرا، واز جە کوشتەی برایەکاشا بارا".

دمایی ولی سەروو قەبرەکێ دەنیز فوراتێوە نریێرە و یادەکە دماییش ئاما.