گەریلاکاو هەپەگەی و یەژا ستاری جە هەرێمەکاو پارێزنای مەدیاینە بە جۆش و خرۆشۆ خێرامای جە قۆناغەو ١٥و تەباخ (ئاب)ی مکەراچا بارۆ هەریۆ جە گەریلۍ یەژا ستاری دیجلە فراتە و گەریلاو هەپەگەی چراڤ جودی و ڕوبار سەرحەد بۆنەو ٤٠ەمین ساڵوەگەڕو قۆناغەو ١٥و ئابیوە پەی ئاژانسوو هەواڵوو فوراتی (ANF)ی قسێشا کەردۍ و ئاماژەشا پانەیە کەرد کە هەتا دمانەفەس جەنگ مکەرا و ئی جەنگیە تا سەرکۆتەی بەردەوام مکەرا.

'بە هێڵۊو عەگیدەکاوە بەباوەڕیۆ هەناگامە منیەیمۍ'

گەریلۍ یەژا ستاری دیجلە فراتە قۆناغەو ١٥و تەباخیش پیرۆزکەردە و واتش: "ئینایمۍ دلۍ جەنگێوە فرە سەختینە. سات بە سات سەرو هێڵۆو گەشمەرڎە عەگیدی جەنگەکەما ملۆڕاوە. سوپاو تورکی ئەرەگیری واچۍ، بە تەکتیکەکاش متاوۆ ئیراڎەو گەریلای بماڕۆ. بەڵام ئینە وەرمۍوەن و حەجگیز پاسە نەبیەن. جەنگو مەڕەکاما وەڵۍ وست، جەنگی ئاسمانیما وەڵۍ وست. سات بە سات بەرەو سەرکۆتەی گۆرەی هەنگامە منیەیمۍ. هەتا دما هەنگام بە زېڵۍ فەرماندە عەگیدیوە باوەڕدارێنمۍ. ڕابەرایەتی ماچۆ؛ جەنگ شۆنەو فەرماندەکەیشەرە مگێڵۆ. ئی جەنگە فەرماندەیی ۋێش جە کەسایه تی هەڤاڵ عەگیدینە دیۆ و ئیساتۍ ئی زېڵۍ بە سەرمەشقایەتی چڼین هەمڕایا دڵسۆزی بەردەواما. ئی سەرمەشقیە بەردەواما."

'هەر ۋێش قۆناغەو ١٥و تەباخی شۆڕشێوەن'

گەریلاو هەپەگەی چراڤ جودی جە قسەکاشەنە سەرنجش وست سەرو فرۆکەی بێفڕۆکەوانو سوپاو تورکی ئەرەگیری و پێسە هۆرسەنگنایش کەرد: "١٥و تەباخی ڕۊو ژیۋایۆ گەلوو کورڎین. ڕۆو 'نەخێر'ین پەی کۆیلایەتیی. ساڵەو ٢٠٢٤ پی رۆحێەتۆ دەسشپنەکەرد. ڕۊو نەورۆزی بە مزانی وستەیرە وارو درۆنی جەنگیوە خێرامای کریا. هەرپاسە چالاکیەکۍ دۆغانی و ئاخین موشی متاویۆ پېسە یەکەمین گولۍ نامێش بنریۆ. چونکی هەریۆ چی هەنگاما جە ئاستوو ١٥و تەباخینە بەرۍ کۊتۍ و همێڎێوە گۊرەشا خوڵقنا."

جە بەردەوامی قسەکاشەنە، گەریلا چراڤ واتش: "١٥و تەباخی ۋێش بە ماناو شۆڕشێوە مۍ. چونکی قەرارو قڕکەردەی و کوشتەی گەلێوە دریابۍ، بەڵام بە قۆناغەو ١٥و تەباخی ئی گەلە هۆرئێستۆ و دژوو قڕکەردەی مرداوە و وەرێسەو کۆیلایەتیش پڕچنا. پۊکەی ئی ڕووە نەک بەتەنیا پەی گەلوو کوردی، پەی گرڎوو گەلا جیهانی گرنگیێوە گۊرەش هەن. پېسە جەژنێوە ئی ڕووەیە پیرۆز مکەرمۍ، پا مۆراڵەیچۆ گەلەکەما خێرامایش ۋنە مکەرۆ."

'گەریلا سەرو هێڵۊو ١٥و تەباخی هەنگامە منیۆ'

گەریلاو هەپەگەی ڕوبار سەرحەد هۊرسەنگنایش پەی ئاژەو وەڵۍ ١٥و تەباخی کەرد و واتش: "یووەمین گولۍ کە بەدەسوو فەرماندە عەگیدی تەقا، ئەرەگیرکەرش وست دلۍ شۊکێوە گۆرەیۆ. چونکی ئەرەگیرکەرەکۍ باوەڕیشا چامنەبۍ کە کورد دمایش پنە ئامان و جارێوەتەر سەرە بەرنماراوە. پۊکەی گولۍ یووەمە فرە ماناڎارەبۍ. جە ئیساتێچەنە گەریلا سەرو ئا قۆناغۍ هەنگامە منیۆ. ئەرەگیر واچۍ پەرە بە تەکنیکی مڎەیمۍ و دمایی بە گەریلای مارمۍ. کەچی ئانەی ئیساتۍ دلێنە مشۆ گەریلا نیا، بەڵکم سەروازەکۍ سوپاو ئەرەگیرێنۍ. ڕوانە ۋێشا کوشاوە، پەی ڕاوەبەردەی ئی جەنگیە گرڎ چێوۍ تاقی مکەراوە. ئاڎۍ پەی زەڕی جەنگ مکەرا، بەڵام جەنگو گەریلای پەی ئازاڎی گەلەکەیش و پەی شکۆو مرۆڤایەتییا. پۊکەی ماچمۍ هەتا دمایی گژیەیمۍ و ئی جەنگیە هەتا سەرکۆتەی بەردەوام مکەرمۍ."