بەپاو ئامارېوە جە مانگەو جۊزەردانینە ٩ کۊڵبەرۍ و کاسبکارۍ کوشیېنۍ و زامڎارۍ بېیێنۍ، ٢٧ چالاکۍ کورڎیچ جە لایەنو هېزە ئەمنییەکا ئێرانیوە گیریێنۍ و چا مانگېنە ئەوەتەقای ئەڵغامی شش قوربانیێش چنە کۊتێنۍ.
تۆڕەو مافوو مرۆڤوو کورڎەسانی ئامارەو پاشێلکارییەکا مافوو مرۆڤیش جە مانگەو جۆزەردانی (٢١و ئایاری -٢١و حوزەیران)ی وەڵاکەردۆ و بە پاو ئامارەکۍ چا مانگېنە دووۍ کۆڵبەرۍ بە نامەکاو سینا رەسوڵزادەی و هەژیر مەحمودپوری جە سنوورو بانەی و سەردەشتینە بە تەقەو هێزە سەروازییەکا دەوڵەتو ئێرانی کوشیێنۍ و کاسبکارێوەیچ جە سەردەشتەنە بەنامۍ رەحیم ئیبراهیمی بە مەڵامەتوو ئانەی کە هێزەکاو دەوڵەتی شۊنیش کەوتێبێنۍ، کۊتەبۍ دلۍ رووبارێوە گیانش جە دەسدابۍ.
هەر چا ماوەنە چوار کۆڵبەرۍ بە تەقە و دووۍ کۆڵبەرێچ بە دایۋنەی و ئەشکەنجەدای جەلایەنو هێزەکاو دەوڵەتیوە زامڎارۍ کریێبێنۍ. حەرپاسە دووۍ هاموڵاتیېچ جە مەنتیقێوە سنووری شارو شنۆینە بە تەقەو هێزەکاو پاسەوانوو سنووری دەوڵەتو ئێرانی زامڎارۍ بیێبێنۍ.
جە بەشێوە تەرو ئامارەکێنە باس چانەیە کریابۍ، کە جە مانگەو جۆزەردانینە ٢٧ چالاکۍ سیاسیۍ و مەدەنی، هونەری، کولتوریۍ کوردی جەلایەنو هێزە ئەمنییەکا ئێرانیوە جە پارێزگاکا ئیلام، کرماشان، سنە، ورمێ و خوراسانینە گیریێنۍ.
هاموەخت ئاماژە بە حاڵەتێوە کوشتەی ژەنا کریان جە ماوەو مانگەو جۆزەردانینە کە ئاڎەیچ ژەنێوە بیێنە جە پیرانشار کە جە لایەنو هامسەرەکەیشۆ کوشیێنە.
سەبارەت بە قوربانیاو ئەوەتەقای ئەڵغامی و بیمیچۆ ئامان، کە دووۍ هامووڵاتیۍ جە شارەکاو شنۆی و بانەینە بە مەڵامەتوو ئەوەتەقای ئەڵغامی و بیمیۆ کوشیێنۍ و ٤ کەسۍ تەریچ جە شنۆ و پیرانشارەنە زامڎارۍ بیێنۍ.
جە گوزارشتەکێنە ئاماژە بە بەردەوامی فشارەکا پەی سەرو زیڼانیا سیاسی و بنەیانۍ گیانبەخشایا سەرهۊرداو ژەنۍ، ژیۋای، ئازاڎیچ کریان.
