هامسەرۆکایەتی کۆنسەو ڕاوەبەری کەجەکەی ئەرەیاۋناش، هرووژمی ڕەگەزپەرسی پەی سەرو پەنابەرا پلانێوە ئاکەپە-مەهەپەینە دژوو گەلا و واتش: "داوا جە گرڎ کەسێ مکەرمۍ پەی پەشتیوانی جە گەلوو سوریای خاوەن هەڵوێسۍ با و دژوو هرووژمەکا فاشیستا هەڵوێسشا بۆ."
هامسەرۆکایەتی کۆنسەو ڕاوەبەری کەجەکەی ئەرەیاۋنێوەش سەبارەت پا هرووژمە ڕەگەزپەرسیا کە جە قەیسەریوە دەسشاپنەکەردەن وەڵاکەردۆ. کەجەکە ئەرەیاۋناش سەرۆکی فاشیست ئەردۆغان پەی جابەجێکەردەی پلانە گڵیاوەکاش و پارېزنای دەسەڵاتەکەیش، دەسش بە سیاسەتێوەکەردەن حەرپېسە چنی جە سوریانە، جە تورکیایچەنە مرۆڤەکا دژوو یۊترینی بەکار مارۆنە، واتش: " پارادایمی نەتەوەی دیموکراتیکی ڕابەر ئاپۆی، گەرەنتی پێوەرە ژیۋای گەلان."
دەقوو ئەرەیاۋناکەو هامسەرۆکایەتی کۆنسەو ڕاوەبەری کەجەکەی پی جۆرەنە:
"چن ڕووێوەن پەنابەراو سوریای جە تورکیانە هرووژمشا مکریۆنە سەر، گەلاو سوریای ئەشکەنجە مکەرا، مڎاشا ۋنە، یانە و ترۆمبێل و کارگەکاشا سۊچنا. ئێمە ئی هرووژمە ڕەگەزپەرسی و فاشیستیا کە جە لایەنوو دەوڵەتیوە ئەنجام مڎریا شەرمەزارۍ مکەرمۍ. ئی ئاژە کردەوێوە نامرۆڤانەن و مشۊم دمایش پنە بۍ، مشۊم گەل ئاگاڎارۍ گەمە پیلانگێڵنییەکا حکومەتوو ئاکەپە-مەهەپەی فاشیستی و ڕەگەزپەرسی با و بە هەستیاریوە نەگنانە دامەو پیلانەکاشاوە. نمەبۆ ئینسان جە ۋەرا ۋەروو گەلانە بە قینی و تووڕە بۆ، نمەبۆ هەستی خراپش بۆ و کردوەی هرووژمکەرانە نیشانە بڎۆ. ئا کردەوۍ دوور جە مرۆڤایەتینۍ. حکومەتوو ئاکەپە-مەهەپەی جە فرەو گەمە گڵیاوەکانە بەشدارێنۍ. هەوڵ مڎا گەلا بکەرا گژۍ یۆیرە و پلانە گڵیاوەکاشا جابەجێ بکەرا. ئی هجوومۍ کە جە قەیسەریوە دەسشا پنەکەرد و بەرەو مەنتیقەکا تەریچ تەشەنەشا کەرد، گەمە و ویستوو ئاکەپە-مەهەپەیا دژوو گەلا. پۊکای داوا جە گرڎ کەسێ مکەرمۍ ۋەرپرسیارانە نزیکۍ ئاژەکەی باوە.
ئاکەپە-مەهەپە بە بەردەوامی دای بە سیاسەتەکاش سوریای مکەرۆ بە مېیانوو کۆمکوژی
دەورو ڕژێموو فاشیستی ئاکەپە – مەهەپەی جە وەشکەردەی و قووڵکەردەیۆ ئاژاوەگێڵنیەکا سوریاینە ڕۊشن و ئاشکران. بی بە مەڵامەتوو پەرەسانای جەنگی بەئەنقەسی و بە پلانە ملیۆنان کەسێش جە سوریاوە پەلکێشۍ تورکیای کەردۍ. ساڵانێوەن بە سیاسەتوو پەنابەراوە جە ئەوروپای باج مسانۆ، جە ڕاو چەتەکاشۆ جەنگی ئەرەگیری و کۆمکوژی دژوو کوردا و گەلاو سوریای ئەنجام مڎۆ. ڕژێموو فاشیستی تورکی جە سەرنیشتوو سوریای بە پلانەو میساقی میللی بە هەمان عەقڵیەتوو عوسمانی تازەی هەوڵوو ئەرەگیری مڎۆ. ڕژێموو ئەرەگیروو تورکی ساڵانێوەن پەی قوڵکەردەیۆ جەنگوو سوریای پی مەرامۆ گرڎ هەوڵێوەش دان. دەوڵەتو تورکی خاوەنوو چڼین چەتا فاشیست و دڕندەین کە تاوانەی دژ بە مرۆڤایەتیش پنە ئەنجام دێنۍ و جە گرڎ بوارێنە پەشتیوانی و زەڕ و چەکش دێنۍ پنە و ۋەرا ۋەر بە گەلا هانیش دێنۍ. ئاڎ کوشتەی و کۆمکوژیش کەردەن. ئا هێزە فاشیستە، تاریک پەرسە و تاوانکارەی کە جلۍ ئایینیێشا وەرەنە بێنۍ پەروەردەش کەردۍ و پاڵپەشتیش ۋنە کەردۍ و پېسە کەرەسەی سیاسەتوو پاوان وازی ۋێش بەکارش ئارڎۍ. کاتێ دیشا بە تەنیا چەتەکۍ وەسۍ نیەنۍ، بە ئاشکرا ۋێشا هجوومشا کەرد سەرو خاکوو ۋەرنیشتی و سوریای و ئەرەگیرشا کەرد. دیمۆگرافیاو ئا شۊناشە فاڕا کە ئەرەگیرێش کەردێنۍ. خەڵکش کۆمکوژ کەرد و ئاوارۍ و دەربەدەرێش کەردۍ. کوشتەی، ئەشکەنجە، دەسدرێژی و گرڎ جۆرە دڕندەیێوە بی بە بەشێوە جە ژیۋای ڕوانەی جە شۊنە ئەرەگیرکریایەکانە. حکومەتوو ئاکەپە-مەهەپەی بە پاگیریوە بەردەواما جە سیاسەتوو فاڕای سوریای پەی ناوەندێوە کۆمکوژی گەلا. گەرەکشا و هەوڵ مڎۆ نەک تەنیا سوریا، بەڵکو جە تورکیایچەنە هەمان ئاژە پەی بەدیئارڎەو پلانە گڵیاوەکاس جابەجێ بکەرۆ.
ئینە دروۍ و چەواشەکاریێوە گەورەن کە ئەردۆغان ۋەرگیری جە گەلوو عەرەبی مکەرۆ
ڕێبازوو حکوومەتوو ئاکەپە – مەهەپەی پەی پەنابەرا سووری جە چوارچێوەو ئی سیاسەتە گڵیاوەینە ملۆڕاوە. ئینە دروۍ و چەواشەکاریێوە گەورەن کە تەیب ئەردۆغان و پارتوو دادی و گەشەپنەدای و گەلوو عەرەبی و سوریایشا وەش مسیا و ۋەرگریشا ۋنەمکەرا. ڕۆ بە ڕۆ زیاتەر ڕۊشن بۆوە کە ئینە فێڵەنە و ڕاس نییە. تەیب ئەردۆغانی فاشیست، هیچ دۆسایەتی و هەستۍ ئەرێنیش ۋەرا ۋەر بە گەلوو عەرەبی نییا. گرڎوو هەوڵەکاش ئانێنۍ گەلوو عەرەبی جە دژوو کوردی و گەلوو کوردی جە دژوو عەرەبی بەکار بارۊنە و جەنگوو یۆترینی بکەرا. بە هەمان شێوە گەرەکشا گەلوو کوردی دژوو گەلوو تورکیای و گەلوو عەرەبی جە دژوو گەلوو تورکیای بەکار بارۊنە. هەوڵمڎۆ گەلا بە ناچاری دژوو یۊترینی جەنگ بکەرا، هەوڵ مڎۆ حکومەتە وڕاکەیش بە زینڎەیی بازۊوە. گەرەکشا کورد کە دادپەروەرانەتەرین و ڕەواتەرین ئەرەکۊشای جیهانی پەی ئازاڎیی و دیموکراسی ڕاوەبەرمکەرۆ، بە بێ ۋېڕاوەبەری و بێ پارێزنای مەنۊوە. گرڎ چێوۍ پەی یاوای بە مەرامەکاش بە شێوێوە ناحەق مبەکار مارۆ. هەوڵ مڎۆ گەلوو عەرەبی پېسە ئامرازێوە پەی ئی عەقڵیەتە ئەرەگیریە گڵیاوەیە و کۆمکوژییە بەکار بارۆ. هرووزمە ڕەگەزپەرسی و فاشیستییەکا دژ بە گەلوو سوریای جە تورکیا، دەرئەنجاموو سیاسەتوو دژە گەلا ڕژێموو فاشیستی ئاکەپە-مەهەپەین.
ئێمە متاومۍ واڵە و برایەتی گەلا بنیاڎ بنیەیمۍ
ئێمە پېسە گەلا هێز و دوور وینایما پەی پېوەرە ژیۋای هەن. متاومۍ و مشۊم جە گرڎ شۊنێنە، بە هۆشیاری جە واڵە و برایەتی و پېوەرە ژیۋای، بەبێ دەسکاری سنوورەکا و نیایرەو سنووری تازەی، یان فاڕای ئەرەنیشتا، ژیۋایما بنیاڎ بنیەیمېوە. ئاواتی بنەڕەتی ئێمە ئانەنە کە مرۆڤەکۍ پېوەرە و بە یەکسانی بە هەستی ئارامی، عەشق و برایەتی پېوەرە بژیومۍ. ئێمە پەی ئانەی هەوڵ مڎەیمۍ. ئێمە پېسە ژڵێوەو ئازاڎیی کوردی، ڕێبازێوە چامنەما هۊرچنیەن. گەلوو کوردیچ پی جۊرە نزیکۍ باوە، گرڎوو گەلا پېسە واڵە و برای موینمۍ. پارادایموو نەتەوەی دیموکراتیکی ڕابەر ئاپۆی زامنوو پێوەرە ژیۋای واڵە و برایەتی گەلان. ئەنەیاوای نەتەوەی دیموکراتیک، کە بریتیا جە ئەنەیاوای مرۆڤەکا جە ئازاڎیی پێوەرە ژیۋای جە عەشقی، ئاشتی و برایەتی و یەکسانی، وردتەرین و بەقیمەتتەرین ڕانە پەی ۋییەرنای قۊرتەکا.
جارێوەتەر ئی هرووژمە ڕەگەزپەرسی و فاشیستیا شەرمەزار مکەرمۍ. داوا جە گرڎ کەسێ مکەرمۍ بە یۊگێرتەی چنی گرڎوو گەلا سوریای و بەتایبەت گەلوو عەرەبی جە دژوو ئی هرووژمە فاشیستیا باوە.
