ئەندامو مەجلیسی پەژاکی مەزڵوم حەفتەن سەبارەت بە جە قەنارەدای چالاکا ڕامیاری جە ئێرانەنە ئەرەیاۋناش: "مشۊم ئېمە هەرمانېوە بکەرمۍ کە شیەینە و کوشتەی و جە قەنارەدای پەی ڕژێمی گرانتەر تەمام بۊ. کاتېو شیەینەیش قورس و گران بی ئانە ئا کاریە نمەکەرا"
ئەندامو مەجلیسی پارتوو ژیۋای ئازاڎیی کورڎەسانی، مەزڵووم حەفتەن جە قەنارەدای غۆڵامڕەزا رەسایی جوانی یارسانی جە لایەنو رژێمووو ئێرانیوە شەرمەزار كەرد و ئەرەیاۋناش؛ رژێمو ملی ـ مەزهەبی قاجاری چنی بێ پەرس و جواب شاتەیمور بانیارانیشا كوشت، رژێموو مەزهەبی ـ ملی ئیسلامی ئێرانیچ هامشێوەو قاجارەكا رەزا رەساییشا بێ پەرس و جواب جە قەنارەدا، هەردوویشا خاوەن یەك لۆژیك و زیهنیەتەنۍ، تەنیا نامێشا جیاوازەنە، یۆشا قاجارا و ئەویتەرشا ویلایەتو فەقێ. ئانەیچ كردەوێوە نامرۆڤانە و ناعادلانەن و شەرمەزارش مکەر و سەرەوەشی جە بنەیانەی و كەس و كاریش و گەلوو كورڎی بەگرڎی مکەرو.
حەفتەن ئەرەیاۋناش؛ رژێمو ئیسلامی ئێرانی ۋێشا بە هەمڕایا حسێنی و بەردەوامی بنەیانەو عەلی مزانا كەچی جە مانگەو موحەرەمی و ئەربەعینی و بەنامۍ شیعەی عەلەوییۆ حكومەتی ڕاوەبەر مکەرا، بەڵام هامشێوەو یەزیدەكا جوانا كورڎی و بەلوچی و عەرەبی و گەلا تەری جە ئێرانەنە مڎا قەنارە.
مەزڵووم حەفتەن؛ سەبارەت بە مەڵامەتوو فرەبیەو جە قەنارەدایەکا جە لایەنو رژێمو ئێرانیوە ماچۆ؛ بەدەس پنەکەردەی شۆڕشوو ژەنی، ژیۋای، ئازاڎیی كە سەرمەشقایەتی ژەنا كورڎی و كورڎا و بەلوچی و نەتەوەكا تەرو ئێرانی ئاما ئاراوە، رژێم گەرەکشا گەلوو كورڎی و بەلوچی بێدەنگ بکەرۆ و گەرەکشا هامشێوەو دەیەكا ۋییەرڎەی دەنگوو ئازاڎیوازا و سەرمەشقا گلێرگەی و گەلاو ئێرانی جە زیڼانەکانە كپ بکەرۆ. پۊکەی مشۆم گەلا و پێكئامایەکا دلۍ ئێرانی جیا جە شناسنامەی نەتەوەیی، ئەتنیكی، ئاینی و مەزهەبی و رەگەزی بە وێڕێکوستەی و فشار وستەی سەرو رژێمی و بەهەستكەردەی بەۋەرپرسیاریی مرۆڤی و دیموكراتی و ئەخلاقی و نیشتیمانی هەوڵ بڎەیمۍ دیاردەو جە قەنارەدای جە ئێرانەنە پێچیۆوە.
ئارۆ رژێموو ئێرانی شۊنپاو یەزیدی هامچەرخیش گرتەنۆ
مەزڵووم حەفتەن سەبارەت بە جە قەنارەدای جوانی یارسانی"غوڵامڕەزا رەسایی" ماچۆ؛ كوشتەی حكومەتی غوڵامڕەزا رەسایی، جوانی یارسانی كرماشانی شەرمەزار مکەر و هامخەمی ۋێم پەی بنەیانە و كەس و كارو رەسایی، خەڵكو سەهەنە، كرماشانی و گەلوو كورڎی بەگرڎیی بەربڕوو. بێگومان ئانەی جە یەرە شەممەی ۋییەرڎۆ جە زېڼانو دیزڵئابادی و جە قەنارەدای غۆڵامڕەزا رەسایی پێكئامان یاگۍ شەرمەزاریا پەی رژێمی. خەڵكو یاری و كرماشانی گرڎ مزانا سەردەموو قاجاڕەكانە جە مېڎانوو سەزەینە "مێڎانوو كرماشان"ی شاتەیموری بانیارانی هامشێوەو غۆڵامڕەزا رەسایی کوشیا. ئا كاتە حكومەتو قاجاڕی سەرو دەسەڵاتیۆ بۍ. حكومەتێوە میلی ـ مەزهەبی بۍ. ئارۆیچ ویلایەتوو فەقێن و مەزهەبی ـ ملییا. فرە جە یۆی جیۍ نیەنۍ، نامێشا جیانە، یۆشا شا و ئەوی تەرشا ویلایەتو فەقێن. پەی کوشتەو پێكئامایەکا تەری و باوەڕدارا یاری یۆنۍ و جیاوازیشا نییا. ئا كاتە كە قەرارو كوشتەی شا تیمور بانیارانی دریا، واتشا بێ پەرس و جواب کوشدێش. ئارۆیچ ئانەی جە زیڼان و دیزڵئابادینە سەرو غۆڵامڕەزا رەسایی-رە ئامان، هەمان چێوا و هەمان كردەوەن. بێ پەرس و را و جواب؛ کوشتەین. بێگومان رژێمو ئێرانی بە ۋێش ماچۆ؛ ئێمە ئەهلوو عەلی، هەمڕۍ ئیمام حسێنینمۍ. ئیساتێچ هامكاتە چنی مانگەو موحەڕەمی و وەك پېسە ۋێشا ماچا ئەربەعینا. جە حەقەتینەنە ماچا ئێمە هەمڕۍ و شۊنکۊتۍ حسێنینمۍ، حسێن جەغەریبی و بێكەسی و زوڵم و ناعەدالەتینە کوشیا، زەینەبە و هەمڕێکێش گیریۍ. ئانەی جە زیڼانو دیزڵئابادینە کەردەنشا هەر هەمان چێوا. هەر واوەی بیەیۆ رووەدای كەربەلاین. بەڵام ئارۆ حسێن و یەزید جیاوازێنۍ و یاگێشا فاڕیێنە. ئانۍ كە ئارۆ ۋێشا پېسە شۊنکۊتا حسێنی و بنەیانەو عەلی موینا و بەنامۍ شیعەی عەلەوییۆ حكومەت ڕاوەبەر مکەرا كارێ مکەرا كە یەزیدیەكا نەکەردەنشا. كوشتەو غۆڵامڕەزا رەسایی، تاكە كەسێوە یاخود شەخسێوە بەتەنیا نییا. بەتەنیا كوشتەی تاكێوە كورڎی، یاخوڎ تاكێوە یارسانی نییا. ئانە پاشخانێوە تاریخی و دوور و درێژش هەن. باوەڕ مکەرو کە هەر كەسێچ پا چەمۆ تەماشەو ئا كوشتاریە مکەرۆ.
ئارۆ كوشتەی كورد، بەلووچ، عەرەب و ژەنۍ، بیەن بە رۆژەڤێوە سەرەكی و بیەن بە دیاردێوە. بەدەسپنەکەردەی شۆڕشوو ژەنۍ، ژیۋای، ئازاڎیی و بەتایبەت قەرارو حكومەتی هۊرگیریان، بە مەڵامەتوو ئانەی كە شۆڕشوو ژەنۍ، ژیۋای، ئازاڎیی مەڵامەتوو فاڕیای ریشەییش دلۍ گلېرگەو ئێرانی و ناوچەكەی و دنیاینە چنی ۋێش ئاورڎەن. جە ئێرانەنە خاڵێوە هۊرچەرخنایش ئارڎەن ئاراوە. جە حەقەتینەنە سەرمەشقایەتی ئا شۆڕشەیە ژەنی و كورڎ بێنۍ، هەڵبەتە بێ مافییا ئەگەر بواچمۍ گەلا تەریچ دلۍ شۆڕشەکەینە یاگێشا نەگرتێنە، بەڵام سەرمەشقایەتی ژەنۍ، كورڎ و بەلوچ دیاریكەرۍ بێنۍ. پەی ئانەیچ قوربانیشا دا. بە دەسپنەکەردەی شۆڕشوو ژەنۍ، ژیۋای، ئازاڎیی قەرارێوە حكومەتی دریا، و قەرارشا دان كە گەلوو كورڎی و بەلوچ پەنەوازا بێدەنگۍ بکریا. پەنەوازا تەسلیمۍ با و جوابوو ئا كردەوا کە دەسشا پنەکەردێنۍ بڎاوە. ئەگەر تەماشە بکەرمۍ چا کاتۆ تا ئارۆ حەرچنە پاشخانێوە ۋێش هەنش، بەڵام بە شێوێوە ئاسایی و جە ئاستی هەرە بەرزەنە كوردكوژی، بەلوچ كوژی و فشارو سەرو ژەنا و جە قەنارەدای ژەنا بیەن بە دیاردێوە و پەرسێوە گۆرە . جە حەقیقەتەنە مشۆم هەر كەسێوی ئازاڎیواز، دیموكراتیكواز و هەر تاكێوە، جیا جە شوناسی ئاینی، مەزهەبی، نەتەوەیی و رەگەزی بەپاو ۋەرپرسیاری ئەخلاقی و ئەركی كۆمەڵایەتی جە ۋەرا ۋەر پا كردەوا رژێمی هەڵوێس نیشانە بڎا.
حەقەو شۆڕشوو ژەنۍ، ژیۋای، ئازاڎیی جەكورڎ و بەلوچی مکریۆوە
مەزڵووم حەفتەن سەرو فشارەکا سەرو گەلی و جە قەنارەدایەکا پێسە ماچۆ؛ ئا زەخت و فشارۍ ئینۍ سەرو رژێمی، نمەتاوۆ جە وەرا ۋەرشانە مردۆ و تەنگەتاو بیەن؛ مەخابن ئا فشارایچە سەرو گەلا دلێینەو ئێرانیرە بەتاڵ مکەرۆوە. بەتایبەتی سەرو كورڎی و بەلوچی و ژەنێرە هورشمجۆ. جە شۊنۍ تەرۆ ئینا چێرو زەختی و فشارینە، كەچی ئانەی سەرو گەلیرە بەتاڵ مکەرۆوە. خەڵك ئانەی قبوڵ نمەکەرۆ. گەندەڵی گۊرە، سۆڵتانە دزەكۍ، جە سوڵتانوو سكەیۆ گێرەش تا سوڵتانوو زەڕی و نەوتۍ، بەشێوێوە جیاجیا دۆڵەمەڼنیەکا گەلا دزا و كەس ۋنەشا نمەپەرسۆوە. تەنیا كۆڵبەرۍ كورڎی و بەلووچی، ڕووانە بەقەناس کوشیا. ئا مرۆڤۍ پەی سفرەو یانەی و زاوڵاشا كە بێ نان و ئاوەنۍ گەرەکشانە چێوۍ پێڎا بکەرا و ڕووانە کوشیا و بانۍ بە قوربانی. كەس چانیشا نمەپەرسۆوە. هامكات ئانە كوشتەی پلە بە پلەن. ئا رژێمە پاسە حسام مکەرۆ كە ئەگەر كۆمكوژی سەرو كورڎی و بەلوچی و گەلا تەریرە ڕاوەبە بکەرۆ، كاروەدایەکۍ جە ۋەرا ۋەرشەنە فرۍ نمەبا، پۊکەی مۍ و بەردەوام ئا كردەوەیە واوەی مکەرۆوە. ڕووانە بەشێوێوە پلەبەپلە ئا كۆمكوژییا ئەنجام مڎۆ. هەر ڕووەو كۆڵبەرێوە کوشۆ. هەر ڕوۍ ئینسانۍ جە قەنارە مڎۆ، هەر ڕووۍ بەلوچۍ کوشۆ، ژەنی جە قەنارە مڎا، ئانە كۆمكوژیێوە پلەبەپلەن. جە ۋەرا ۋەرو ئی کردەوا رژێمینە هەڵوێس پەنەوازا. بێگومان رژێم تەماشە مکەرۆ كە ئا كردەوۍ ئەنجامشا مڎۆ شیەنەشا پەیش هەرزان تەمام بۆ. واتە پەیش خەرجێوە کەم مەسرەف مکەرۆ. ئەگەر خەرجییەكەش فرە بیۍ، رژێم زوو زوو ئا كردەوە نامرۆڤانا واوەی نەکەرێوە. ئەگەر ئارۆ گەلوو كورڎی و بەلوچی کوشیانە و ئینسانی جیاواز جە قەنارە مڎریۆ و فشار سەرو زیڼانیا سیاسی هەن، ۋەرو ئانەی باجش كەمە پەی رژێمی. هەر مرۆڤێوە ئازاڎیواز كە هۊرگیرو شناسنامەی چەپگەرییا پەنەوازا جە ۋێش پەرسۆنە كە ئێمە مشۆم چێش بکەرمۍ كە ئا شیەینەی پەی رژێمی گرانتەر بكەرمۍ. پەی ئانەی ئەگەر كەسێوە جە قەنارەدریا حیسابوو ۋێش بکەرۆ، هەرپاسە بەئاسانی ئا كردەوا واوەی نەكەرۆوە. ئەگەر شیەینەکەیش بەرز بۆ، ئانە کەسی مەڎۆ قەنارە، كۆڵبەرۍ نمەکوشۆ. نزیكبیەیۆ رژێمی چنی ژەنۍ، چنی زیڼانیا سیاسی و چنی گەلەكەیچ جیاوازتەر مبۆ، ئا وەختە ناچارا كە ئیراڎەشا بەبنەما بگێرۆ و حیسابشا پەی بکەرۆ.
رژێم چا ڕوۆن ئامان سەرو دەسەڵاتەی تا ئیساتۍ گەرەکشا بەفرت و فێلە و پیلانە گەلوو كورڎی بەكار بارۆ و پا جۆرە نزیكو پەرسوو كورڎی بیەنۆ. هەر چی ماوەنە بۍ كە پەی هۆرچنیەکا جە لوڕستانۆ گێرەش تا ورمێ ئاموشۆو ڕەوتشا بۍ. جل و بەرگی كوردی و جلۍ لوڕیێش پۊشۍ و بەلوڕی و كوردی قسێشا کەردە. بەخەڵكیشا وات كە شۆڕشگێڵنێنۍ، فیداكارێنۍ، مێمان دۆسێنۍ، سنورپارێزنێنۍ، سنورپارێزنای و هێزو ئی وڵاتیە ئینا دەسوو شمۆ، ئێمە خزمەتكارۍ شمەنمۍ و ئینۍ و چنڼانی تەرێچ. بەڵام بڎییەیدۍ چن ڕووۍ سەرو ئا قسارە نەۋییەرڎەن، فرەو جە قەنارەدایەکا جە كوردا و لوڕی پێكئامێنۍ. ئاخۆ ئاڎۍ حیسابوو ئانەی نمەکەرا كە ئا گەلە ئانڼە كوڵ ویر نمەکەرۆوە كە ئا چێوا خێرا جە یاڎ بکەرۆ. جەناوچەكەنە و سەرو ئاستی مېیاننەتەوەیی حیسابی گۊرەشا پەی ۋێشا کەرڎەن. جە ناوچەكەنە هامپەشتی و هامكاری سەفەوی و عوسمانی پەی كوردكوشتەی رێككەوتەیش سەر کریان و پێکئامان. کورڎەسان و ناوچە كوردیەكۍ، ئەرەگیر و دەسبەسەر و کوشا و جە قەنارە مڎا و تاڵان مکەرا، كۆڵبەرۍ کوشا و گرڎ چێوۍ سەرو كوردارە مارۆ. هەر جە ۋەرنیشتۆ گێرەش تا سەرنیشت، پانیشت و ۋەرکۊت سەرو كورڎی هامكاری عوسمانی و سەفەوی هامچەرخ سیاسەتوو قڕکەردەی بەهامبەشی و بەشێوێوە پەلەپەل بەراش ڕاوە. گرڎ كەسۍ مزانۆ كە دۆسایەتی ئانیشا كوڵ خواینا"مۆقەت"، ڕووۍ حیسابی راسشا چنی یۆترینی مۍ ئاراوە و ئانە ئا كاتەنە كە خەڵكو كورڎی و کورڎەسانی یەكلاكەرەوۍ مبا.
كورڎی ئازاڎ بەهزر و رامانوو رابەر ئاپۆی گەرەکشا شەرافەتمەندانە بژیۋۆ
مەزڵووم حەفتەن سەبارەت بە كپ کەردەی دەنگو گەلا و بەتایبەتی كورد و بەلوچی دماو دەسپنەکەردەو شۆڕشو ژەنۍ، ژیۋای، ئازاڎیوە ماچۆ؛ تاریخشا مزانمۍ كە كورد و کورڎەسان خاوەن دەورێوە ژیۆستراتیژی و ژیۆپۆلیتیكیا. ئەگەر كەسانێ یاخود لایەنێوە بەهەر مەڵامەتۍ حیسابی غەڵەت و خراپ بکەرۆ، ئەگەرش هەن كارەساتی قەرەبوو نەكریاوە بۍ ئاراوە. كوشتەی حكۆمەتو غۆڵامڕەزا رەسایی، یا كەسا تەری كە ئارۆ ئینۍ چێرو پەتەو قەنارەینە، پېسە شەریفەی محەمەدیۍ و پەخشان عەزیزیۍ و كەسانۍ تەری مشۆم حسابوو ئانەی بكەرا، كە كوردكوژی، عەرەبكوژی، بەلوچ كوژی و ژنكوژی و جە قەنارەدایشا ۋنە قبوڵ نمەکریۆ و شیەیشەنە گران مبۆ.پەنەوازا حیسابوو ئا چێوا بکەرا كە ڕۆو ئارۆی حیسابشا پەی ئا مژارا کەردەن بلاوە ۋێشارە. ئارۆ کە تەماشە بکەرمۍ، ئا پرسیارۍ وەشە بۆ كە ئاخۆ دماو شۆڕشوو ژەنۍ، ژیۋای، ئازاڎیی قەرارشا دا كە بەلوچستانی و کورڎەسانی بێدەنگ بکەرا، ئانە قەرارێوە درێژخایەنوو حكومەتیا. ئەگەر پاسە بۆ ئا رێككەوتەیە ئیستخباراتی و ئەمنیەتیۍ چنی حكومەتوو ئاكەپە و ئەردۆغانی چنی هێڵۊو خیانەتی بنەیانەو بارزانی ۋەرا ۋەر بە بەكوردی ئازاڎی ئەنجامش مڎا، ئانەی سەرو گەلا، بەتایبەتی سەرو كورڎی ڕاوەبەرش مکەرا قەراری یەكلاكەرەوەن و یەكسەرەن، ئانە متاوۊ هامسەنگیۍ فرە مەترسیڎار و خراپ جە ناوچەکەنە چنی ۋێش بارۆ. پۊکەی مشۆم گرڎ کەسۍ حیسابوو ئانەی بكەرۆ و نەواچا كە كورد هەر كوردو بنەیانەو بارزانییا كە جە ئاخروو سەڎەینە پێوەرەش نیێنۍ ، سەرو ئانەی کە كورد خیانەتكار و بەكرێگرتەن، وەشکریاو دەسو جبەرین، كورد ئامێرا و متاوۆ سەركوت و خەڵكەكەو ۋێش بکەرۆ، ئانە ئینۍ غەڵەتەنە. ئارۆ كوردی تازە كە بەپاو هزر و رامانوو رابەر ئاپۆی كاروخەبات بەرۆڕاوە، جیاوازا و شناسنامێوە تازەن جە ۋەرکۆتوو مېیامینینە. ئا كوردە نمەبۆ بە نۆكەرو كەسی و دەسوو كەسی ماچ نمەکەرۆ. پەی ئانەی شەرەفمەنڎانە بژیۋۆ قوربانیش پەی مڎۆ. قوربانیەكەیچش چڼە قورس بۆ، ئانە ئامادەن كە ئا قوربانیە بڎۆ. كوردی تازە جە مەردەی باكش نییا. جە ژیۋای نۆكەری و بەکرێگرتەیی تەرسۆ، پۊکەی بە هۊرپڕایۆ مێنە دلۍ مېڎانەکەی. ئا کەسۍ كە ئاڵاو ئازاڎیی و دیموكراسیشا بەرز کەردەنۆ، بەپاو ئا فكر و فەلسەفەیە كار مکەرا. بۆنەو كوشتەی حكومەتیی غوڵامڕەزا رەساییۆ پەنەوازا چێش بكەرمۍ، مشۆم كارێ بكەرمۍ كە جە قەنارەدای نەمەنۆ. پەرسەکە ئانە نیا کە ئانەی سیاسیە جە قەنارە نەڎریۆ، نا. شناسنامە چێش بۆ با بۆ، ژەنینە، جوانا، سیاسیا، پیشەییا، شناسنامەش چێشا جیاواز نییا، مشۆم ئێمە كارێ بكەرمۍ كە جە ئێرانەنە بەگرڎیی جە قەنارەدای نەمەنۆ. پېسە پەژاكی كەمپینێوەما دەس پنەکەرڎەن كە نا پەی جە قەنارەدای، بەڵێ پەی ژیۋای ئازاڎیی و دیمۆكراسی، پەی ژیۋای بەكەرامەتی و شەرەفمەنڎانەی و پەی ئانەی كاروخەبات مکەرمۍ.
بەڕێكوستەبیەی رژێمی ناچار بەچوكدایرە بكەردۍ
بانگەوازیم پەی گرڎ کەسۍ ئازاڎیوازی ئانەنە كە جیا جە شناسنامەكەیشا، هەوڵ بڎەیمۍ كە جە قەنارەدای نەمەنۆ ، گرڎ ڕووۍ كورڎ، بەلوچ، بەهایی، ژەنی و كەسۍ تەرۍ بە بەهانۍ جیاجیای گیریانە و کوشاشا. مشۆم ئێمە كارێ بکەرمۍ كە شیەینەو كوشتەی و جە قەنارەدای پەی رژێمی گرانتەر تەمامیۆ. كاتێ شیەنەش قورس و گران بی ئانە ئا كاریە نمەکەرا، مشۆم بزانمۍ كە ئەگەر رژێم یۆ جە زیڼانەنە بڎۆ قەنارە، ئانە جبەرۆ كەسێوە پەی پەشتیوانی ئا كەسا كەم مبۆوە، ئەگەر جبەرۆ كەسێوە یاخود هێز بۆنە كە فشار بوزۆ سەرو رژێمی ئا وەختە رژێم جە قەنارە نمەڎۆ چونكی ناچارا حیساب بکەرۆ. ئەگەر جە ڕۊزگارو ئارۆینە كەسێوە جە قەنارە مڎریۆ، جیاواز نییا كە كورڎ، بەلوچ یا هەر كەسۍ تەر بۆ، ژەنی یا هەر كەسی تەر؛ چونكی مرۆڤا، مشۆم پەرسمۍ جە ۋێما، سەرو مرۆڤ بیەکەیش مشۆم جە ۋێما پەرسمۍ، پەی گەلوو كورڎی و گرڎوو ئا كەسا كە قوربانی ئا ناعەدالەتیانۍ، ماچوو، رێكوستەبیەی شەرتا، هامفكری و یۆگێرتەیی شەرتا، سەرو بنەما و هەست و ۋەرپرسیاریەتی نەتەوەیی، نیشتیمانی، ئەخلاقی، مرۆڤیی، كۆمەڵایەتی و رێكوستەبیەی نەتەوەیی و كۆمەڵایەتی، رژێم ناچار مبۆ جە ۋەرا ۋەر بە داواكارییە رەواكا گلێرگەینە چۆك بڎۆرە و گەلایچ بەئازاڎیی بژیۋا.
