کەسایەتی و ریش چەرمەکۍ هۆزەکا هرووژمەکۍ حکومەتو دیمەشقی و هێزەکا دیفاع وەتنیشا پەی سەرو دێرەزوری شەرمەزار کەردۍ و دژوو دەسوەردایەکا دەوڵەتو ئەرەگیرو تورکی داواو یۆگێرتەیشا کەرد.
بە مەڵامەتوو هرووژمەکا ئی دماییەو هێزەکاو حکومەتو دیمەشقی و دیفاع وەتەنی (وەرگریی نیشتمانی) پەی سەرو شار و مەحاڵەکا ۋەرکۊتوو کانتۆنوو دێرەزوری، ١٣ کەسۍ گەشمەرڎۍ بیۍ کە زاوڵێچشا چنەبێنۍ، حەرپاسە زیاتەر جە ١٢ کەسایچ زامڎارۍ بیۍ. سەبارەت پی هرووژما هەر یۆ جە ڕیش چەرمەو هۆزو سەفای، محەمەد تورک سوعان و ڕیش چەرمەو هۆزو ئەل عەبدوڵا شێخ ئیبراهیم هادی پەی ئاژانسیما قسێشا کەردۍ.
هرووژمەکۍ پەی سەرو ئیدارەو ۋێڕاوەبەری و قەسەدەینۍ
جە سەرەتاو قسەکاشەنە محەمەد تورک سوعان هرووژمەکێش شەرمەزارۍ کەردۍ و واتش: "ئی هرووژمۍ جە لایەنو هێزەکاو حکومەتوو دیمەشقی و دیفاع وەتەنییوە ئەنجام مڎریا، بەڵام ۋێشا پېسە سوپاو هۆزەکا نیشانە مڎا، هەرچڼە هیچ نامێوە نیەنە بەنامۍ سوپاو هۆزەکاوە. ئی هێزۍ خۆبەخۆ ئی نامێشا نیێنە ۋێشاوە، هرووژمەکۍ پەی سەرو ئیدارەو ۋێڕاوەبەری و قەسەدەینۍ، بەڵام ئی قسۍ قبوڵکریۍ نیەنۍ. چونکی ئاژێوە پی جۆرە نیا ئارانە. ئی هرووژمۍ ئاژاوەگێڵنی دەوڵەتو تورکینۍ پەی مەرامو مەسڵەحەتەکا ۋێش. هەمیشە بانگەشەو دلێنەبەردەو ئیدارەو ۋێڕاوەبەری مکەرۆ و گەرەکشا پڕۆژەو نەتەوەی دیموکراتیکی ئیدارەو ۋێڕاوەبەری جە بەین بەرۆ."
جە دمادمایی قسەکاشەنە محەمەد تورک سوعان داواو پەشتیوانیکەردەی هێزەکاو قەسەدەیش کەرد و ئاماژەش پانەی دا هێزەکۍ قەسەدەی هێزۍ گرڎیمانۍ و سوورییەکۍ یەک ڕا و یەک مەرامشا هەن.
'ئامانجما دەسەبەرکەردەی ئارامییا'
شێخ ئیبراهیم هادی هرووژمەکۍ سەرو دێرەزوریش شەرمەزارۍ کەردۍ و واتش: "ئامانجی بنەڕەتی هۆزەکا مسۆگەرکەردەی ئارامییا جە هەرێمەکەنە. پېسە هۆزەکا گرڎ کاتۍ ئینایمۍ چنی هێزەکاو قەسەدەی. هیواڎارێنمۍ گەل جە دژوو هرووژمەکا مردۆوە و خاوەنداری جە خاکوو ۋێشا بکەرا. ١٣ کەسۍ چی هرووژمانە کوشیۍ، ئینە یاگۍ قبوڵکەردەی نیا. قەسەدە و ئیدارەو ۋێڕاوەبەری نوێنەرایەتی گەلاو هەرێمەکەی مکەرا. هیچ کاتێ ڕێبازی نەژاڎپەرسی و نەتەوەپەرسیش نەگێرتەنەنە ۋەر. گرڎوو پێکئامایەکاش ئینۍ چنە و ژیۋایۍ هامبەشی واڵە و برایانەش بنیاڎنیان. پۊکەی بە واڵە و برایەتی گەلاوە هرووژمەکا ماڕمۍ."
