دەوڵەتو تورکی ماوێوە دوور و درێژا گەرەکشا و کۊشش مکەرۊ پەی ئانەی ڕژێموو ئێرانی پەلکېشوو جەنگوو دژ بەکوردا بەتایبەتی ژڵېوەو ئازاڎیوازی گەلوو کورڎەسانی بەڕابەرایەتی"پەکەکە"ی بکەرۊ و پەی جابەجێکەرڎەی مەرامەکایچش کۊششۍ سەرەمڕەش کەرد.
محمەد عەلی باقری كەنی بەنامۍ وەزیروو جبەروو ئێرانی ڕۊو پەنج شەممەی و جومعەی"١٣-١٤"مانگەو شش و ٢٠٢٤ بەسەردایۍ ئاما پەی بەغڎای و دماتەر چاوە ۋێش کەرد هەولێر و سلێمانی-رە. بەپاو واچە رۆنامەوانیەكا جەبەغڎا و هەولێرۆ سەردایەكەو باقری پەی تەمامکەرڎەی و جابەجێكەردەی ئا هەنگاما کە بە ئەمیر عەبدوڵڵاهیانی و ئیبراهیم رەئیسی چنی عێراقی و هەرێموو كورڎەسانی دەسشا پنەکەردەبۍ و جەختكەردەیۆ و سووربیەیۆ سەرو رێككەوتەیەكاشا و بەندەكاو ئا جە یۆ ئەنەیاوایەی بەتایبەتی، ئا ٢٣ رێككەوتەیەی جە وەختوو سەردای نێچیرڤان بارزانی و وەفدەكەیشەنە پەی ئێرانی جە مانگەی ۋییەرڎێنە.
ئانەی یاگۍ سەرنجیا دووۍ ڕووۍ وەڵۍ سەردایەکەو باقرینە پەی هەولێری و سلێمانی؛ جە گوێر و دلۍ شارو هەولێرینە كۆگایۍ پاڵاوگەو نەوتۍ و باڵەخانېوە چن قات ئێرشا ۋەردریانە. حەرچنڎە پاڵاوگەكۍ جەهەرێموو كوردسانینە و پرۆژە زەبەلاحەكۍ یانەکەرڎەیۆ و تاوەرەكا نایاسایېنۍ و سەر بە كەسا قەرار بەدەسی و دەسلوواو دلۍ حیزبە دەسەڵاتدارەكانۍ و حیچ قازانجێوەش پەی خەڵكوو هەرێموو پانیشتوو كوردسانی نیا چنە و بەدەر جە چن گەڼەوەرێوە و چینێوە سەروو گلېرگەی كە چنەشەنە قازانج مکەرا و تەپوتۆزەكەیچش ملۊنە گڵوەو خەڵكی بەش مەینەتوو هەرێمی، بەڵام جارێوەتەر بەمەڵامەتوو ئانەی ئا موڵك و یانەی جە تەرەفوو ئەرەگیراوە ئېرشا ۋەر مڎریۊنە، بەشێوەنۍ جە دۊڵەمەنڎیی و سەرچەمەو گەلی كە مافیاكۍ دەسشا سەرەرە گرتېنۍ، سۊچنای و ئێر ۋنە وەردایشا رەوا نمەکەرۆ. جە مانگەو دووۍ ئېساڵیوە هەر جە بازاڕی قەڎیمی دهۆكیوە گېرەش تا بازاڕوو لەنگەو هەولێری و بازاروو كوتاڵ ورەشا و زەڕنگەرا و بازاڕوو قەیسەری قەڵاو كەركوكی ئێرشا ۋەردریانە و حكومەت و قەراربەدەسا هەرێمیچ فزەشا چۊوە ناما و مەڵامەتەکېشا وستۍ ئەستۆو شۆرتوو كارەبۍ و بەهانە ئارڎەیۆ پەی رەوایەتی پنەدای بە وستەیۆ ئېرەکا جە تەرەفوو دەوڵەتە ئەرەگیرەکا سەرو كورڎەسانیوە. ئا جۊرە رەوایەتیدایە ئانەی بەروزۆ کە دەوڵەتا ئەرەگیروو سەرو كورڎەسانی بەتایبەتی دەوڵەتوو ئەرەگیروو توركی و رژێموو ئێرانی دەسېوە باڵاشا دلۍ كاروبارو هەرێموو پانیشتوو كورڎەسانینە هەن و دەسەڵاتداراو ئی هەرێمیچە بەمەڵامەتوو سیاسەتی نانەتەوەیی و نادیموكراتیشا بەتایبەتی سیاسەتی نالۆژیكی و ملكەچی و تەسلیم بیەی و بەکرێگرتەیی پەدەكەی پەی دەوڵەتوو ئەرەگیروو توركی و هێزە هەژمۆنپارێزنەكا مەنتیقەکەی و میان دەوڵەتی پاسشە کەرڎەن كە چارەنوویس و گەلەكەیما و ئاینڎەو پانیشتوو كورڎەسانی ۋەروو رەحموو هێزە ئەرەگیرەکانە بۆ و ئا هېزێچە كەی گەرەکشا بۆ ئێر جە یانەی و موڵكوو گەلی و چېرخان و سەرخانوو هەرێمەكەیما ۋەرمڎا.
ئی ئېر ۋەردای و تیرۆر و تۊقنایەی جەهەرێموو كورڎەسانینە تەنیا جە سەردایەکەو باقریچەنە كوڵ نمەکریۊوە؛ بەڵكم وەڵۍ سەردایەكەو هاكان فیدانی و ئەردۆغانی-چنە پەی عێراقی و هەرێموو كورڎەسانینە بەفرۆكەی بێ فرۆكەوان هجووم کریا سەروو پاڵاوگەو بەرهەمئاورڎەی نەوت و گازی جە كۆرمۆر و بەرشیەی چن قەرارێوە جە تەرەفوو دادگای فیدڕاڵی دەوڵەتوو عێراقی و تیرۆرو سیاسەتمەدارا سەرنیشتی و ۋەرکەوتوو كورڎەسانی جە هەرێمەنە.
دەوڵەتوو ئەرەگیروو توركی بەمەڵامەتوو ئا منافەسەیۆ کە چنی رژێموو ئێرانی پەی ئەرەگیرکەردەی و دەسسەرەرەگېرتەی عێراقی و تەسلیم بیەی ئیراڎەی ئازاڎیوازی گەلوو كورڎەسانی و تەماعەو هەژمۆنپارێزنیشا و باڵادەسی جە مەنتیقەکەنە، كورڎەسانی پېسە مېڎانوو یەكلایی کەردەیۆ ملەملانێكاشا بەكاربەرا. بەتایبەتی دەوڵەتوو ئەرەگیروو توركی دماو بێ ئەنجامبیەی سەردایەكا هاكان فیدانی و ئەردۆغانی پەی بەغڎای و هەولێری و دماو سەردای نێچیرڤانی و وەفدەكەیش پەی ئێرانی، ئیتر گەرەکشا ئێری گڕگېرتەو هەناویش بە ئێر وەردای جە شارەكاو هەرێموو كورڎەسانی و موڵك و ماڵوو هاموڵاتیا مرکنۊراوە و رەنگە پەی سارێژوو زەخمەکاش و شكستەكاش سەرو دەس و گەریلاكاو ئازاڎیی كورڎەسانی و ژڵېوەی مەدەنی جە سەرنیشتوو كورڎەسانی و شكسش جە هۊرچنیەکا ٣١و ئادارو ئێساڵینە گەرەکش بۆ جە ڕاو هاندای گروپە چەتەكاو داعشی و بەرەی نوسرەی و توركمانەكا هەولێری و كەركوكی و تەلەعفەری و تەكنەلۆجیای سەروازی و جە ڕاو فڕۆكەی بێ فڕۆكەوانیۆ ئېرەکەو پانیشتوو كورڎەسانی بە تینتەر بکەرۆ و پا جۊرەیچە ئاسایشوو هەرێموو پانیشتوو كورڎەسانی جە سایەو سیاسەتەكاو پەدەكەیۆ تێك بڎۆ و ئېرو پشێوی و نائارامی و تیرۆری جەهەرێمەكەنە وەش بکەرۆ.
دەوڵەتو تورکی ماوێوە دوور و درێژا گەرەکشا و کۊشش مکەرۊ پەی ئانەی ڕژێموو ئێرانی پەلکېشوو جەنگوو دژ بەکوردا بەتایبەتی ژڵېوەو ئازاڎیوازی گەلوو کورڎەسانی بەڕابەرایەتی"پەکەکە"ی بکەرۊ و پەی جابەجێکەرڎەی مەرامەکایچش کۊششۍ سەرەمڕەش کەرد، بەتایبەتی جە ڕاو پەیوەندیەكاشۆ چنی بڕۍ جە وڵاتا عەرەبی و هاندای پەدەكەی و چن پارتێوە ۋەرکەوتوو کورڎەسانیۆ ختلۍ ڕژێموو ئێرانیش دا.
ئیساتێچ كە رژێموو ئێرانی پەرە بە عیلاقەو ۋێش چنی پەدەكەی و هەرێموو کورڎەسانی مڎۆ پەی تەسفیەكەردەی ئا هێزانە کە دەوڵەتو توركی پەشتیش پنە بەستێنۍ و ڕاگێرتەی باڵانسوو پەیوەندی سیاسی و ئابوری و ئیستخباراتی چنی دەوڵەتو توركی و وستەیرەو بنكە و سنورداركەردەی بڕۍ وڵاتۍ ئیقلیمیۍ دژبەرۍ رژێموو ئێرانی جە هەولێر، کەکی کەوتێنۍ کۆڵۍ دەوڵەتو توركی و ئەردۆغانی و باخچەلی؛ چونكی ئا هەوڵا دژوو سیاسەتە ئەرەگیریەکا ۋېشا سەرو كوردا و مەسڵەحەتەکاشا جە عێراقەنە موینا، هەر پۊکەی چی چن ڕووەنە و وەڵۍ هۊرچنیەو سەرۆككۆماری تازەینە پەی ئێرانی، رەنگە دەوڵەتوو ئەرەگیروو توركی ئێر ۋەردای جە هەرێموو کورڎەسانینە گەشتەر بکەرۆ و کۊسپ ۋەروودەم و هۊرچنیەی پەرلەمانینە جە پارێزگاكاو هەرێموو کورڎەسانینە وەش بکەرۆ و ڕا نەڎۆ پارێزگارو كەركوكی دیاری بکریۆ.
