پەنج ڕوێ جەی وەڵتەر واتە دووێ مانگێ، ٣ هاموڵاتیێ مەدەنیێ بە نامەکێ (موحسین حاجی، سەفەر سەلیم، حەسەن سدیق)ی، بە سەردای لوێنێ دەگاو زێوی دەڤەرو دێرەلوکێی سەر بە ئامیدیی جە پارێزگاو دهۆکی و باڵەپڕە جەنگیەکێ تورکیای کەردێنێ ئامانج و جە ئاکاتەوە تا بە ئارۆ شەممە، بێسەروشۆنێ بێنێ و کەسوکارەکێشان هەواڵشان نەزانێنێ.
ئارۆ دمایی شۆنیەرەلوای ئاشکرا بی کە هەر یەرێشان بە بۆردومان گیانشان جەدەستدان و کەسوکارەکێشان پەی ئاوردەی تەرمێ یەرە قوربانیەکەی شیێنێ یاگێ ڤییەرەکەی و تەرمەکێشان دیێنێوە و ئاوردێنێوە پەی دێرەلوکێی و بڕیارە ئێشەو ئەسپەردێشان بکەرانێ.
زانیان کە (موحسین حاجی، سەفەر سەلیم، حەسەن سدیق) پێمەرگێ یانەنشینێ بیێنێ.

ئینە یەکەم جار نییەن کە باڵەپڕە جەنگیەکێ تورکیای ئەرەگێری و فاشستی هاموڵاتیێ مەدەنیێ پانیشتو کوردستانی مەکەرانێ ئامانج و شەهیدێشان مەکەرانێ، بەڵکو تا ئیسە سەدان هاموڵاتیێشان شەهیدێ و بریندارێ کەردێنێ.
ئانە یاگێ نیگەرانییەن، بێدەنگێ و بێهەڵوێستی حکومەت، پارلەمان، پارتێ و لایەنە دەسەڵاتدارێ و ئۆپۆزسیۆنەکێ هەرێمی و ئێراق-یەنێ وەرانوەر بە بۆردومانێ و هێرشەکێ تورکیا و شەهید و بریندارکەردەی هاموڵاتییە مەدەنیەکان.