خەڵکوو وەشەویس و هۆرامان و کوردەواری ، بە داخەوە ماموسا جەمیڵ ئەحمەدی پسۆ یۆ جە هەسێرەکا دنیاو هۆنەروو هۆرامان و کوردستانی جە دماو ماوێوە نەوەشی ، بە بێدەنگی و کت و پڕ جیاش ئاستیمێ و دەنگش پەی هەتا هەتایی بی بە ئاسمانی . ماموسا جەمیڵ نەوسووڎیی پسۆ یۆ جە کۆڵەکەکا گورانیی و سیاوچەمانەو هۆرامانی جە ماوەو ٦٠ ساڵا هەرمانێ هۆنەرییە ، بە سەڎان ئاوازێ و سیاوچەمانێش پەی چینی دماو وێش تۆمارێ کەردێ . دەنگوو ماموسا جەمیڵی یۆ چا دەنگە ڕەسەنا مەحاڵوو هۆرامانی بێ کە سروەتێ سرووشتی و نەتەوەیی پسۆ سیاوچەمانەیشا جە فۆتیای پاڕیزنا . بە جۆرێ تاومێ واچمێ کە دەنگش ، دەنگوو هێزی ، ئارۆ و سەوای بێ .
پڵاتفۆرموو هۆرام-ی پسۆ ئەرکێ ئێخڵاقی و نەتەوەیی سەرەڕاو سەروەشی جە خانەوادە ، کەس و کار و خەڵکوو وەشەویسوو هۆرامانی ، خەموو جە دەسداو سان و سیاو چەمانەی ، بە خەموو گرد هۆگرێ سیاوچەمانەی و گورانی هۆرامیی زانۆ . هەر پاسە بە ئەرکوو وێش زانۆ کە پەی پارێزناو ئاسارە هۆنەریەکا ماموسا جەمیڵ نەوسوودی هەنگامێ بنەڕەتیە جە چوارچێوەو هەرمانە فەرهەنگیەکا وێش جە پڵاننامەو دماڕۆینە دیاری کەرۆ . دماجار داواما جە خەڵکوو وەشەویس و مەحاڵ و هۆرامانین کە جە هەر یاگەنە کە هەنێ بە مەراسمێ تایبەت و جیاوازێ یادو ئا هۆنەرمەندە گەورەیە بەڕز گێرا . باوڕیچما ئانەن کە تا گۆشداری دەنگوو ماموسا جەمیڵی مەنا ، ماموسا جەمیڵ یادش جە دڵ و ویرەکانە زینەن .