دما بەدماو کۆتەیۆ کارەساتوو ئێرکۊتەیۆکەو مەنتیقەکا بەینوو مێردینی و ئامەدی، سەبارەت بە دەمەوا نەلای و دماکۊتەی دۆڵەتی پەی کارەساتەکەی، ناڕازیۍ فرەو خەڵکو هەرېمەکەیش ۋنەکەوتۆ.

چا بارۆ فەرحانە ئەردەمە، کە کەسێوە نزیکش بەمەڵامەتوو ئێرەکەیۆ گیانس جە دەسدان، پەی ئاژانسوو هەواڵوو فوراتی (ANF)ی قسېش کەردۍ و واتش: "نە ئشیۍ ئێرەکە ئانڎە فراوان بیۍ. بەڵام بە مەڵامەتوو فرەیی سیاوایۆ ئێرەکە بە خێرایی وەڵابیۆ. حەر ۋێش چی هەرێمەو ئێمەنە فرە بەکەمی کارەبا هەنە، ئا ئامێرە کارەبایۍ هەنێما بەمەڵامەتوو خراپی کارەبێوە گرڎ خراپۍ بیێنۍ، ڕۊو کارەساتەکەی چنی ئامایۆ کارەبۍ جە کۊڵەکۍ کارەبا کێوە ئێر کۊتۆ. دماتەر بە مەڵامەتوو ئا شۆرەتوو کارەبێوە ئێرەکە کەوتۆ. کەمتەر جە ١٥ دەیەقا ئێرەکە یاوا دلۍ دەگێکێما. ئانۍ کۊششا کەرد پەی ئانەی ئێرەکەی کوشناوە گیانشا جە دەسدا. ئینە گرڎ دەرەنجاموو کارەکا وێستگەو بەرهەمئارڎەی کارەباو دیجلەین DEDAŞ کە یانە و ژیۋای ئێمەش کاولکەرد. جە ئیساتێنە کێ ۋنەپەرسایۆش ۋنە بکەرۆ؟ کێ ۋێش بە تاوانبار مزانۆ؟ هیچ کەسێ مەوزۆش ملوو ۋێش. ۋەرپەرسا ئێمە تاوانبار مکەرا!

هەلیکۆپتەرو ئێرکوشنایۊیشا ڕەوانە نەکەرد

گەر کوردۍ نەبیێنمۍ ئانە ئینەما ملەرە نۍ. پەی مەردەی جیاشا ئاستیمۍ. زاوڵۍ و ئاژەڵەکێما قیمەتشا نیا لاو ئاڎیشاوە. کەسوکارما سۆتۍ، ڕەنجوو ئێساڵیما گرڎ بی قەلەپڕووت. ئایە کارەسات چینەی گەورەتەر چێشا؟ چێشیتەرما ملەرە بۍ؟ ۋەرووچەماماوە ئینسانەکۍ سۆچێنۍ. دەگا و یانەکېما سۆتۍ. گەر دەوڵەت هەلیکۆپتەرش کیاستەبیۍ ئانە ئێرەکە تا سەرسەعب بەردەوام نەبۍ. بەڵام نە کیاناش."

ۋەرووئانەی کوردێنمۍ وازشا چنە ئاردیمۍ

هاموڵاتیە ئامینە حەسەنە باسش چانەیە کەرد کە دماو ئانەی ئێرەکە کەوتۆ تیمەکۍ ئێرکوشنایۆ ئاماڎۍ بێنۍ، بەڵام سوپا بە ئەنقەس ڕاش ۋنەگێرتۍ و واتش: "چڼین سەعاتۍ جە چەمەڕایی ئێرکوشنایۆیما کەرد ، ١٠ کەسۍ گیانشا جە دەسدا بەڵام ئێرکوشنەوەکۍ کە ڕۆبیۆ ئینجا یاوۍ. گرڎ خەریکۍ ڕزگارکەردەی زامڎار بێنمۍ، ٤ کەس چا کۊششانە گیانشا جە دەسدا. نەیاوێنمێنە چێش ڕووە مڎۆ، چێشما ملەرە ئامان، ئێرەکە فرە ۋەرفراوان بۍ، دەوڵەت ناما فریایماوە، ئینە چارەنوویسوو کوردبیەیمانە. گرڎ کاتێ کارەساتما سەرەرە مۍ. جە ئێرکۊتەیۊکەینە بەس ۋەروو کوردبیەیما دەوڵەت ناما فریایماوە و جیاشا ئاستیمۍ پەی ئێرەکەی".