کۆمیتەو دیپلۆماسی کە جە پارت و ڕێکوزیا کورڎییەکا پێکمۍ، بە سەرمەشقایەتی کۆنگرەو نەتەوەیی کورڎی (کەنەکە)ی پەی جاری ٢٨ ەمینی کوۍ بیێوە.

کۊبیەیۆکەی جە ناوەنڎوو کەنەکەینە جە بروکسل کریا، بێجگە جە نوێنەروو پارتەکا پانیشتی و ۋەرکەوتی و سەرنیشتی و ۋەرنیشتوو کورڎەسانی، کەسایەتیەکۍ پېسە محەمەد ئەمین پێنجوێنی و تاهیر کەمالی زادەی و ئەکادیمیستی پېسە شڤان سەعیدی ئاماڎۍ بێنۍ.

وتارەو سەرەتای جە لایەنو نوێنەرو یەنەکەی جە ئەوروپانە شێخ شەماڵ و ئەنداموو دەسەی ڕاوەبەری کەنەکەی زوبەیر ئایداری پێشکەش کریا.

"هجوومی جدی سەرو ۋەرنیشتی هەن"

سەرۆکەو دەسەی پەیوەندییەکا جبەروو ئیدارەو ۋېڕاوەبەری سەرنیشت و ۋەرکەوتوو سوریای، ئیلهام ئەحمەدە جە گلېرۊبیەکەینە سەرنجش وست سەرو هەوڵەکا پەی بە ڕسمی ئشناسای ئیدارەو ۋېڕاوەبەری سەرنیشت و ۋەرکەوتوو سوریای ، واتش: " ئێمە دەسکەوتۍ فرۍ و قوربانیدایۍ فرێما هەنۍ. جە ۋەرا ۋەروو هجوومەکانە مڎرامانێوە جددی هەن. دەوڵەتو تورکی و بە تایبەتی ڕژێموو ئەردۆگانی جە ۋەرنیشتەنە تاوانەی دژ بە مرۆڤایەتی دژوو گەلوو کورڎی ئەنجام مڎۆ. دەسەڵاتدارا تورکی گرڎ کۊششۍ مکەرا پەی ئانەی هۊرچنیەی جە سەرنیشت و ۋەرکەوتوو سوریاینە نەکریۆ. کۊششەکێشا جە عێراق و سوریانە پەی ڕاگێرتەین جە هۊرچنیەی. تورکیا چی مەجالەنە گرڎ سازشێوە مکەرۆ".

حەرپاسە سەرنجش وست سەرو پەیوەندیی و گفتوگۆکاشا چنی ڕژێمو سوریای و واتش: "ڕژێم نمەتاوۆ بە ئیراڎەو ۋێش سیاسەت بکەرۆ، داردەس و جبەرین، چونکی جە ڕوو ئابووری و سیاسییوە ئیفلاسش کەرڎەن، ئینا چێروو کاریگەری دەوڵەتا تەرینە و نمەتاوۆ سیاسەتی سەربەخۆ بکەرۆ".

"ڕزگاری بە یۊبیەی نەتەوەییرە مویەرۆ"

نوێنەرو ژڵێوەو گۆڕانی میران ساڵەح ئەرەیاۋناش حکومەتوو پانیشتوو کوردسانی بە قەیرانێوە سیاسی و ئابووریرە موییەرۆ، جە ئاکامەنە گەل کۆچ مکەرۆ و ماواو ۋېشا جیامازا، چی ڕوا دماینەینە چڼین هاموڵاتیۍ کوردی جە ڕاو کۆچینە گیانشا جە دەسدا.

لاو ۋێشۆ سەرۆکوو کۆمەڵی ئیسلامی کوردسانی حیکمەت سەربڵند ئەرەیاۋناش دوژمن پەی دلېنەبەردەی دەسکەوتەکا گەلوو کوردی گرڎ چېوۍ مکەرۆ، واتش: "ئێمەی کورد تەنیا بە یۊبیەی متاومۍ ئی هجووما ماڕمێنە. پۊکەی مشۊم کورد دلۍ ۋێشانە ئایدۆلۆژیا و باوەڕ و مەسڵەحەتە حزبیەکا بوزانە لاوە و سەرو مسڵەحەتە نەتەوەییەکا سیاسەت بکەرا، ڕزگاری ئینا چینەینە".

بەنامۍ پەژاکیۆ سیامەند موعینی ئاماژەش پانەی کەرد ئێران ئینا قۆناغێوە ئاڵۆز و دژوارەنە، واتش: "مشۆم کورد جە دەوروو ستراتیجێوە هامبەشینە یۆبگېرا و ئەرەکۊشا. نمەبۆ کورد جە هۊرچنیەینە پەشتگیری حیچ کاندیدێوە بکەرۆ. چونکی گرڎ دوژمنۍ کوردینۍ. ۋێش هۊرچنیەکە دژە دیموکراسی و نایاساییا. ئینە شانۆگەرییا".

"پانیشتوو کوردسانی ئینا قەیرانەنە"

نوێنەرو یەنەکەی جە ئەوروپانە شێخ شەماڵ سەرنجش وست سەرو مەترسییە جدییەکا سەرو ۋەرنیشتی و گرنگی یۆبیەی پارتە کوردییەکا، واتش: "جە پانیشتوو کوردسانینە هەمان کێشە هەن. قەیرانێوە سیاسی و چەقبەسیۍ قووڵ هەن. وەختۍ تەماشەو ٢٠ ساڵا وەڵتەری مکەرمۍ، ئازەو پانیشتی فرە عالتەر بۍ. ئینە بەرئەنجاموو سیاسەتۍ غەڵەتیا".

دماتەر محەمەد ئەمین پێنجوێنی مەڵامەتوو کێشەکاو کوردیش گېڵناوە پەی پارچەبیەو کوردا و داواش کەردە کورد یۊبیەی ۋێشا پێکبارا، واتش: " بە تایبەت جە ئەوروپا و جیهانەنە پێویسا خەباتی دیپلۆماسی بکریۆ. لاو کەمیۆ ئنڎەو کارەکا کوردسانی قیمەتشا پنەبڎا. بەڕاو من چارەسەر و سەرکەوتەی کێشەو کوردی ڕەبتا پا کاریۆ".

ئەکادیمیسیان جە زانشتگەو شانخی چینی، شڤان سەعید سەرنجش وست سەرو دەورو کوردی جە جیهانەنە و واتش: "هێزەکاو پېسە چین، هیندستان، ئەمریکا، ڕووسیای و یۊبیەی ئەوروپای ئاگاڎارۍ جوگرافیاو کوردینۍ، بەڵام کورد ئاگاڎاروو جوگرافیاو کوردی نیا. چونکی خەتەو ئابووری جە چینۆ پەی ئەوروپای بە خاکی کوردارە موییەرۆ. کوردسان گرنگی ستراتیجیش هەن. پێویسا کورد چانەی بیاوۆنە و بەپاو ئا هۆشیارییە مامەڵە بکەرۆ. ئی هێزۍ عال ئینەی مزانە. بەڵام داخەم مەشۆ ئێمە ئاگاڎارۍ ئینەی نیەنمۍ".

"کۆنفرانسی نەتەوەیی ئەنجام بڎەیمۍ"

دماتەر ئەنداموو دەسەی ڕاوەبەری کەنەکەی زوبەیر ئایدار سەرنجش وست سەرو ئاژەو کوردا و واتش: " جە پانیشتوو کوردسانینە نموونەو کەرکوکی ئینا ۋەرووچەماوە. پەی ۋەرنیشتیچ هەمان چێوا. شارەکۍ عەفرینی و سەرێکانیما جە دەسدۍ. هجوومەکۍ ئینۍ ئاستێوە بەرزەنە. هجوومی جەستەیی و هجوومی دەروونی هەن. هێزە ئەرەگیرەکۍ ئێمەی کوردی بەش مکەرا و هجووم مکەرانۍ سەرما. گرڎما باس جە یەکڕیزی مکەرمۍ، بەڵام هیچ هەنگامېوە کردەییە نمەگیریۆنە ۋەر. هجوومەکۍ ئانەما پەی بەروزا کە پێویسا دەموودەس کوۍ بیمێوە. با ئێساڵ قەراروو کۆنفرانسی نەتەوەیی جابەجێ مکەرمۍ کە ساڵەی ۋییەرڎۍ جە کۆنفرانسوو لۆزانینە سەرو ئی پرسیە دریابۍ".

دماتەر کۆنفرانسەکە بە بەشوو پێشنیارەکا بەردەوام بۍ. چی بەشەنە نوێنەروو پارتەکا قسېشا کەردە و چڼین پێشنیارۍ کریۍ، دەسنیشان کریا پەنەوازا کۆنفرانسوو لۆزانی پەی یەکڕیزی کوردی کە ساڵەی ۋییەرڎۍ لوواڕاوە، پی نزیکەنە بلۊڕاوە.