کۆمیتەو پەیوەندییەکاو بەروو کەجەکەی کاردایوەی بەروست وەراوەروو تۆمەتبارکەردەی پەکەکەی لاو وەزارەتوو دلێ عێراقیوە پێوەس بە ئایرەکاوە پانیشتوو کوردستانینە، واتش: "دوورا جە ڕاسیوە و چەواشەکاریێنێ".
قسەکەروو وەزارەتوو دلێ عێراقی ئەرەیاوناش یەرێ کەسی پێوەس بە ئاویرکەوتەیوە ناوەندە بازرگانییەکانە و بازاڕەکاو کەرکوکی و هەولێری و دهۆکینە گیریێنێ و پێسەو ئەنداماو پەکەکەی بە ئەرەیاونایەکاشا ئشناسنێ. هەمان وەختەنە بانگەشە مکەرۆ دووێ کەسێ جە گریاییەکا سەر بە هێزە ئەمنییەکاو پانیشتووکوردستانینێ و پەکەکەی ئەرەسپارێنێ پەی ئی هەرمانێ. کۆمیتەو پەیوەندییەکاو بەروو کەجەکەی بە ئەرەیاوناێوی نویسیا جوابوو ئی چەواشەکارییەشە داوە.
ئینە ئەرەیاونایەکەو کەجەکەین:
"ڕاو میدیاكاوە زاناما كە پارتوو كرێكاراو كوردستانی (پەكەكە)، تۆمەتبار کریان پانەیە، كە بڕێ ئاویرشا وەنەو شارەكاو هەولێر و كەركووك و دهۆكی وەردان، ئێمە ئی تۆمەتە بێبنەمایا ڕەت مکەرمێوە، كە گردلایێو مزانانە ئی هجوومە دەزگاو هەواڵگێریی توركیا (میت) و ڕێكوزیای هەواڵگێریی پارتی دیموكراتوو كوردستان (پاراستن)ی کەردەن.
پەكەكە بە وێگێری و هەڵوێستە پرەنسیپی و یۆگێرتانەکاش بە ویەرەی وەختی سەلەمنانش، كە هێزێوەن یاگێ جێگەی متمانەو گەلاو كوردستانی و وەرکەوتوو دلێڕاسەیا، حەر یاگێونە گەل وەروو هەڕەشا و نادادپەروەری بگنۆ، پەكەكە هەڵوێستێوی درووس ورمگێرۆ و پەشتیوانیی گەلی مکەرۆ، ئارۆیچ جەنگێوی تند و بێوچان دژوو كۆلۆنیالیزموو توركیای مکەرۆ، كە هەنگام بە هەنگام عێراقی و هەرێموو كوردستانی ئەرەگیر مکەرۆ.
سوپای ئەرەگیركەرەو توركی بە پەشتیوانی و ئاسانكاریی ئیدارەو پەدەكەی زاخۆ و دهۆك و هەولێرنە بێڕێزی وێش پەی گەلەكەیما نیشانە مدۆ و بە ئاشكرا بەردەواما جە بەیاگەیاونای ئەرەگیركارییە نهێنییەكەیش.
سوپای ئەرەگیركەرەو توركی بە ئاشكرا ڕایەکاو دلێ خاكوو عێراقی موزۆرە و خەڵكی ناچار مکەرۆ بە گێڵای و وشکنای و دڵنیابییەی جە شناسنامەكاشا، دەگانشینایچ مگێرۆ و بۆردومانێ و ئاوارێشا مکەرۆ، ڕوانە تاوانەكاو سوپای ئەرەگیركەرەو توركی پەرە مسانانێ، وەختێوەنە پەدەكە ئاستوو دلێنە بەردەواما جە هامكاریكەردەی چەنیش و حكومەتەكەو سوودانییچ بێدەنگ و بێجوابا.
تۆمەت و چەواشەکاریین
سەرەڕاو بەكارئاردەی چەكی قەدەغەكریای و بۆمبی كیمیایی دژوو جەنگەوانا و گرد جۆرە تاوانێوی جەنگی و بەكارئاردەی تازەتەرین تەكنەلۆجیای پەی بۆ بەرژەوەندیی سوپاو توركی، بەڵام گەریلا ئازادیوازەکاو كوردستانی بە ئیسفادەکەردەی جە گردوو ئا توانایا هەنێشا، وەرگێریی ئی ئەرەگیركارییە باوە، دەوڵەتی فاشیستوو توركی تووشوو شكستێوی سەختی مبۆوە. سوپای ئەرەگیركەرەو توركیای چا خاڵانە تا ئیساتێ ئەرەگیرێش کەردێنێ، بەزەحمەت مجووڵیۆ و تەنیا بە کەردەینەی جلێ هێزەكاو عێراقی و پەدەكەی متاوۆ جمۆوە، وەختێوەنە جمیەرەکەما سەركردایەتیی مدرامانێوە گەورەی وەراوەروو ئی هجوومە كۆلۆنیالیزمانە مکەرۆ، بەڵام بەقووڵی ناڕازیێنمێ چا بەیاننامەو وەزارەتوو دلێ عێراقی.
وەختێ هجوومەکاو داعشی عێراقنە دەسشا پەنە كرد، جمیەرەکەما بە گردوو توانایشۆ پەی پارێزنای خەڵكوو عێراقی و گەلوو كوردی بەبێ هیچ بەرژەوەندیێوی جووڵەش كەرد، بەشێوێوی كاریگەر بەشداریما جە هەڵمەتەكاو ئازادكەردەی هەولێر، مەخمور، كەركووك، شنگال، موسڵینە دەسوو داعشیوە كەرد، باجێوی قورسما چا ئۆپەراسیۆنانە دا، تەنانەت سەرۆكوەزیرانووعێراقیچ سوپاسش کەردیمێ.
ئا تۆمەتێ كە ئێمە بازاڕ و دەگایەکاو كەركووك و هەولێر و دهۆكێما سۆچنێنی، وربەسیێ و باوڕپنەنەنکریێنێ ئێمە وەڵتەرێ وەرگێرییما وەنەو ئا شارا كەردەن و گەشمەردێما ڕاشانە دێنێ، ئی تۆمەتا پەی ویژدانوو گەلوو كوردی و عێراقی مازمێ جیا، كە بە چەمێ وێشا شایەتێ مدرامانوو ئێمەنێ.
تۆمەتوو میتی
ئێمە هیچ دوژمنایەتیێوەما وەراوەروو دەوڵەتوو عێراقی و خەڵكوو عێراقیوە نییەن، جمیەرێوەنمی كە پەی ئازادی و وەشگوزەرانیی گەلاو وەرکەوتوو دلێڕاسەی مکۆشیەیمێ، ئی تۆمەتێ بوختانێنێ لاو دەزگای هەواڵگێری توركیایوە، ئاشكران كە وەزارەتوو دلێ عێراقی وەختوو بەرکەردەی ئی بەیاننامەینە چێروو كاریگەریی ڕانمایی بڕێو لایەنانەبییەن.
سەرچەمەو ئا تۆمەتا ڕێكوزیای هەواڵگێری توركیا (میت)ا و لقەكەو هەرێموو كوردستانیش (پاراستنە) ، كە ڕێكوزیێوی تاوانكاریی میاندەوڵەتییا و هەنگام بە هەنگام هەوڵێ ئەرەگیركەردەی عێراقی و هەرێموو كوردستانی مدۆ، ئێمە هیچ پەیوەندیێوەما بە هیچ ڕووەداێوە و چالاكیێوە نییەن، جگە چانەیە ئەرەگیركەردەی توركیای مکەرانە ئامانج.
ئێمە و گردوو عێراقییوە و كوردێوە مزانمێ، كە دەوڵەتی ئەرەگیركەروو توركی لایەنێوی سەرەكییا کە هجووم مکەرۆ سەروو سەقامگیری و ئاسایشوو عێراقی، پەوکای بە پەنەوازش مزانمێ ئی بەیاننامە جە جوابوو ئا تۆمەتانە بەربکەرمێ، كە دوورێنێ جە ڕاسییوە و ئامانجشا لاڕارەبەردەی ویروڕای گردینین.
پێویسا تاوانبارە هەقەتینەکێ ئاشکرێ بکریا
داوا جە دەوڵەتوو عێراقی و وەزارەتوو دلێ مکەرمێ، كە وەرپەرسانە وەراوەروو ڕانماییەكاو هەواڵگێری توركیای مامەڵە بكەرا و جووڵیایوەکەیما بە تۆمەتێ بێبنەما نەبەساوە و تاوانبارە هەقەتینەکا ئاشكرا بكەرا.
هاموەخت داوا وەنەو گەلی دیموكرات و وێگێروو عێراقی مکەرمێ، كە هەڵوێستی پتەوشا وەراوەروو ئا درواوە بۆ، هەرپاسە هەنگامە بنیا وەراوەروو ئا هەرمان و قسا كە ئینێ هەوڵێ شەرعیەتداینە بە ئەرەگیركاریی توركیای".
