کۆمیتەو ئیکۆلۆژیی کەجەکەی پێوەس بە ئایرەکەو بەینوو مەنتێقەو چناروو ئامەدی و مەنتێقەو شەمرەخوو مێردینی، کە ١٤ کەسێش مرنێ و دەیان کەسێ بریندارێ بیێ، ئەرەیاوناێوی نویسیاش وەڵا کەردۆ.

ئەرەیاونایەکەی ئینەنە:

"هامبەشێ ئازاروو گەلەکەیمانمێ چا کۆکوشییەینە بەینوو مەنتێقەکاو شەمرەخی و چنارینە بە دەسوو DEDAŞی و دەوڵەتی وەش بی، سۆز و میهرەبانیی خودای بوارۆ سەروو ئانیشا کە مەردێنێ سەرەوەشیی جە بنەیانەکاشا مکەرمێ و هومێدوو زوو خاسۆبییەی پەی یندارەکا موازمێ. 

قسێ شایەتحاڵەکا ئاشکراش مکەرۆ دەکات کە کۆکوشییەکە، DEDAŞ ی کەردەن. DEDAŞ سەرەڕاو داواکارییە ڕسمییەکا و هۆشدارییەکاو خەڵکی چندین ساڵێن دارعەموودەکێش خاسێ نەکەردێنیوە، پەوکای بیێنێ بایسوو مەردەی و وەرپەرسی سەرەکیی ئی کۆکوشییەینە. دەسەڵاتوو ئاکەپەی هامشانوو DEDAŞ وەرپەرسا چی کۆکوشییە، بە بانگەشەکەردەی کە گوایا ئایرەکە بۆنەو سۆتەی  زەمینیوە بییەن گەرەکشانە تاوانەکەی پۆژنارە و وزاش سەروو شانەو خەڵکی.

DEDAŞ ستەم مکەرۆ نەوەک خزمەت

DEDAŞ ئایرەکەو شەمرەخی و چنارینە بە زەرەری گیانی و سرووشتی و مڕارۆبییەی سەدان ئاژەڵا، یەرێ کۆکوشیێش پێوە کەردێ. سیاسەتوو دوژمنایەتی کە ساڵانێوا بە پلانە و سیستەماتیک دژ بە گەلوو کوردی مکریۆ،یاوان حاسوو کۆکوشی و ئا دوژمنایەتییە بە ڕۆشنی نیشانە مدریۆ. DEDAŞ کە کۆمپانیاو بەشکەردەیی کارەبێن، بەردەوام گەلوو کوردستانیش بێ ئاو و بێ کارەبا ئاستەنۆ و پینەیچە زیاتەر بییەن ئەرەمەرزیاو ستەمکاری نەوەک خزمەتگوزاری. بە سیاسەتەکاش دوژمنایەتیی وەراوەروو گەلی و سروشتی و کشتوکاڵی، بیەن بەیاگەیاونوو جەنگی تایبەتی و قڕکەردەی ئیکۆلۆژی دەوڵەتوو تورکی کوردستانەنە. ئا بەنداوێ کوردستانەنە متاوانێ ئاوەو وەرکەوتوو دلێڕاسەی گلە بداوە،بە دەسوو دەوڵەتی و DEDAŞ بێ ئاو و بێ کارەبا ئازیێنێوە، کشتوکاڵ و ئاژەڵداری یاوێنێ ئاستوو دلێنەشییەی. ڕاو ستەمی بەردەوامیوە، هەژاری و بێئاوی و کۆچبەری سەروو ئی گەلەیرە سەپیێنێ.

دەسەڵاتوو ئاکەپەی نەلا دەموو ئایرەکەیوە و ڕاش وەشە کەردە پەی قۆمیای کۆکوشی، پەوکای پاسە DEDAŞ وەرپەرسا. پی کۆکوشییە، جارێوی تەر وینیا، کە گەورەتەرین کارەسات  پەی گەل و سروشتی، دەوڵەت و سیاسەتەکاو دەوڵەتینێ. ئاکەپە پێسەو بوومەلەرزەکەو مەرەشی ٦ و شوباتی، پێسەو کۆکوشیی سۆمای و ئیلچی جارێوی تەر دوژمنایەتیی وێش چەنی گەلی و سروشتی نیشانە داوە. تا ئیساتێ  دەوڵەتوو تورکی فڕۆکە و هەلیکۆپتەر و جەندرمەکاش پەی کوشتەی گەلوو کوردی و دلێنەبەردەی سروشتی و دارستانەکاو کوردستانی بەکارێ ئاردێنێ. پێسەو شارەکاو تورکیای، جەندرمێ وێشا نەوەک پەی پارێزنای سروشتی، پەی بەرژەوەندیی کۆمپانیا لایەنگێرەکاشا، پەی قڕکەردەیی ئیکۆلۆژی و کۆکوشیی دارستانەکا بەکارئاردێنێ. هێزی عاسمانیی دەوڵەتوو تورکی و گردوو دەرفەتەکاش شەو و ڕۆ پەی کۆکوشیی کوردا ڕۆبۆسکی و وەرنیشت و پانیشتنە، چوارپارچەو کوردستانینە ئامادێنێ، تا ئیساتێ پەی بەرژەوەندیی سرووشتی و گردینی بەکارێ نامێنێ وەرپەرساو دەوڵەتی کە ساڵانە بودجەو جەنگی زیاد مکەرا و شانازیی پانەیوە مکەرا، کە یۆ جە گەورەتەرین سوپاو ناتۆیشا هەنە، بودجە پەی ئایرکەوتەیوە دارستانەکانە و کارەساتی سروشتی و قەیرانوو کەشوهەوای تەرخان نمەکەرا و ئا هامکارییایچە موەرا، کە خەڵک کۆش مکەراوە.

دەوڵەتوو تورکی ڕاو ئەرەگیرکەردەی خاکوو کوردستانیوە، ڕاو سیاسەتی ئیکۆلۆژی و بەنداوی و سەنتەروو کارەبێ و سیاسەتی دژە کشتوکاڵیوە، کە ساڵانێوەن چوارچوەو جەنگینە کوردستاننە مکەرۆش، گەرەکشەن فرسەتوو ژیوای وەنەو گەلوو کوردی ببڕۆنە و پینەیچە کارەسات و کۆکوشییەکا قووڵتەرێ بکەرۆوە. پی هەرمانا واوەی بەرکەوت دەوڵەتوو تورکی بە زیهنیەتە فاشیست و بەرژەوەندیوازەکەش تەرسی حەرەگەورێنە سەروو سرووشتی و خەڵکی. بۆنەو ئی زیهنیەتەو دەوڵەتیوە کارەساتەکێما خراپتەرێ بانە و ڕا پای کارەساتی تازەی مکەرانێوە.

پێویسا وەراوەروو هەرمانەکاو دەوڵەتوو تورکیوە بێدەنگێ نەبیمێ

ڕەنگای جە ئەنجاموو ئی زیهنیەتیوە ڕووەبەڕوو کارەساتی گەورەتەری بیمێوە. پێسەو گەلاو کوردستانی و تورکیای و جمیەرە ئیکۆلۆژییەکا، وەراوەروو وێرانی و تندوتیژی و کارەساتەکاو دەوڵەتینە، وەرپەرسێنێ جە پارێزنای گەلی و سرووشتی و ئاژەڵەکا. پێویسا دژوو گردوو سیاسەتەکاو دەوڵەتی پەی کۆچبەرکەردەی ئینسانەکا و گێرتەی خاکەکەیشا، مدرامان بکەرمێ. پێویسا بێدەنگێ نەبیمێ وەراوەروو ئا هەرماناوە ڕاگیرێنێ چانەی گەل بە کشتوکاڵ و ئاژەڵدارییوە سەرقاڵ بۆ و بە گێرتەی خاک و ئاوێ، هەڕەشێ وەنەو دماڕۆیما مکەرا.

ئا چێوی کە قۆمیێ واوەی نیشانەشا دا، کە پێویسا چەمەڕوانێ هامکاریی وەنەو دەوڵەتی نەبیمێ، مشۆم وەراوەروو گردوو کارەساتەکاو دەوڵەتیوە ڕا گێرمێرە وەر و کۆشیا گەورەتەر بکەرمێ. پەوکای ئانێ لایەنگێرێ گەل و سروشت و ژیواینێ، ماو گردوو ئا کارەساتا، پێویسا چەمەڕێ هامکاریی دەوڵەتی نەکەرا، بەڵکو پێویسا یۆگێرتەی و ڕێکوستەی و مدرامان گەورەتەر بکەرا. سیاسەتەکاو دەسەڵاتی دژوو سروشتی و گەلی تەنیا بە کۆشیاێوی ڕێکوزیا و هۆشیارانەو گرد لاێوی ممدرنیۆ. پەی مدرنای کۆکوشی، پەنەوازا گرد لایێ سەفەربەرێ بانێ و پەی سرووشت و جڤاکی بکۆشیانە. پێویسا وەنەپەرسایوە جە DEDAŞی و دەوڵەتی بکریۆ، کە ئی ئەم کۆکوشییەشا کەردەن و تا ئارۆ بەردەوامێ بیێنێ جە ستەمکاری. پەی ئینەیە پێویسا کۆشیای بکریۆ.

ئێش و ئازارەکاو ئی کارەساتا واوەی بەرش موزانە، وێرانکارییە ئیکۆلۆژییەکێ کێشەی هامبەش و خەمی هامبەشوو گردیمانێ، حەر لاێوی جیهانیوە بۆ، حەر دارێو ببڕیۆوە، حەر ئاو و هەوایێوی پیسێ مکریا،  وەراوەرنە پێویسا بە هۆشمەندیی بەهایێوی هامبەشۆ بجووڵیەیمێ و پارێزگارییشا وەنە بکەرمێ. وەراوەروو ئا سیاسەتاو دەوڵەتیوە، کە چێروو نامێ "ئاسایش"ینە تیرۆر مکەرۆ، گرنگا بە هۆشیارییوە مامەڵە بکەرمێ، کە ئا دار و ئاو و هەواوە، کە لاو دەوڵەتیوە دلێنە مشۆ، بەها هامبەشەکاو دماڕۆیمانێ. کۆشیای ئیکۆلۆژی پا هۆشیاری و وەرپەرسییوە تاکە هەڵوێستا، کە ئیسفادەش پەی سروشتی و گردیما و دماڕۆیما بۆ و قەوەتتەرما مکەرۆ وەراوەروو ئی قڕکەردەیا. تەنیا کۆشیای ئیکۆلۆژیی هامبەشما متاوۆ ئی زیهنییەتە فاشیست و کۆکوشەیە ممدرنۆ. ڕاگێرتەی وەنەو کارەساتەکاو دەسەڵاتی بە کۆشیای مەیا دی".