کەجەکە بەتندی دەسەڵاتی قڕکەر و نەژادپەرس و فاشیست و ئەرەگیرکەروو ئاکەپە-مەهەپەیش شەرمەزار کەرد، کە سەبەبوو ئی ئایرەینە و بییەن بایسوو ئێش و ئازاروو گەلی، واتش: "پەنەوازا گەلەکەما هیچ هومێدێوەش بە دەوڵەتی نەبۆ، وێش هەرمانەی پەنەوازە بکەرۆ".
کۆنسەو ڕاوەبەریی کەجەکەی پێوەس پا ئایرەیوە کە مێردین و ئامەدنە کەوتەنۆ، ئەرەیاوناێوی نویسیاش وەڵا کەردۆ:
کەجەکە ماچۆ: "مەنتێقەکاو شەمرەخی و چنارێی سەر بە مێردین و ئامەدینە، بۆنەو تەلوو کارەبێوە ئاویر کەوتۆ و بی مایێ کارەساتێوی گەورەی. ئەنجاموو ئا ئاویرەینە زمینوو دەیان دەگایانە کەوتۆ، بەداخۆ چند کەسێوی ئێمە مەردێ و هەڵای ژمارەشا بە تەمامی نەزانییان. دەیان کەسێچ بریندارێ بیێ، موچیۆ دلێ بریندارەکانە، چەنەسانە وەزعەش خراپەنە، قەیرێ خەمبارێنمێ پا دۆخەیە سەروو گەلەکەیمارە ئامان، هاتووە. ئەوەڵ هومێدوو سۆز و میهرەبانیی خودای پەی مەردەکا موازمێ، سەرەوەشی ونەو بنەیانەکاشا و قەومەکاشا و گەلوو شەمرەخی و چنارێ و گردوو گەلەکەیما مکەرمێ. هومێدوو زوو وەشبییەیوە پەی بریندارەکا موازمێ، هوەمێد مکەرمێ بریندارەکێ بەزوویی بیاوا تەندرووسیێوی خاس و زەرەری زیاتەر نەوینان.پەی ئینەیچە، پەنەوازا پزیشکێ وەڵاتپارێزنێ و کارمەنداو تەندرووستی و ئەرەمەرزیا تەندروستییە دیموکراتیکەکێ سەفەربەرێ بانە و گردوو دەرفەتەکا سەفەربەرێ بکریا، پەنەوازا هەوڵێوی فرەلایەنێ بدریۆ".
"پەنەوازا گەلەکەما هیچ هومێدێوەش بە دەوڵەتی نەبۆ، وێش هەرمانەی پەنەوازەو وێش بکەرۆ"
ئەرەیاونایەکەو هامسەرۆکایەتیی کۆنسەو ڕاوەبەریی کەجەکەینە ئامان:
"گەلەکەما دەمودەس سەفەربەربی، گردوو دەرفەتەکاو هامکارییش بەکارێ ئاردێ پەی وەنەقۆمیایاو کارەساتەکەی، ئینەیچە ڕاگرییش چانەیە کەرد کارەساتەکە گەورەتەر بۆنە. هەرپاسە ئەرەمەرزیا دیموکراتیکەکێ دەرفەتەکاو وەریشا سەفەربەرێ کەردێ. پەنەوازا ئی هەڵوێستەو گەلەکەیما بەرز برمانیۆ و ئینەیچ نموونەو پەشتیوانیی کۆمەڵایەتیی وەڵاتپارێزانەین و مانادارا. بۆنەو ئی پاڵپەشتییە مانادارەیوە مەبارەکبایی وەنەو گەلەکەما مکەرمێ، سڵام و ڕێز و سوپاس و پنەزانایشا پێشکەش مکەرمێ. پێسە موینیۆ نە دەوڵەت و نە دەسەڵات بە هیچ شێوێوی گرنگیی بە گەلوو کوردی و پەنەوازییەکاو گەلوو کوردی و ئێش و مەینەتییەکاو گەلوو کوردی نمەدانێ. بە پێچەوانەوە، سەبەبوو ئا کارەسات و مەینەتییا دەوڵەت و دەسەڵات وێشانێ. پەنەوازا گەلەکەما پەرسۆوە چا دەوڵەت و دەسەڵاتەیەم بکەرۆ کە بییەن بایسوو ئی کارەساتانە. بەڵام هەمان وەختەنە پێسەو ئیساتێ پەنەوازا برینەکاو وێش بە هەستوو پەشتیوانی و هامکارییوە ساڕێژ بکەرۆ. دەسەڵاتی قڕکەر و فاشیستوو ئاکەپە-مەهەپە، دەوڵەتێوە نمازۆوە پەی راوەبەردەی هەرمانوکاروو گلێرگەی. دەوڵەت بەتەمامی بییەن دوژمنوو گەلی و دوژمنوو گەلوو کوردی. پەنەوازا گەلەکەما ژیوای سروشتی و دیموکراسیی وێش ڕێک بوزۆنە، بە ئیرادەی ڕێکوزیاو وێش سەروو کێشەکاوە بمدرۆنە و بۆ بە هێزوو چارەسەری. پێسە چی نموونەنە موینیۆ، هۆشیاریی پەشتیوانی جڤاکی و ئیرادە ڕێکوزیاکەش فرە قەوەتا، ساعیبووو زیهنیەتێوا، کە تواناو چارەسەرکەردەی هەر جۆرە قۆرتێوەش هەن. پەنەوازا گەلەکەما هیچ هومێدێویش بە دەوڵەتی نەبۆ، وێش هەرمانەی پنەوازەش بکەرۆ. دەوڵەتی بندەسوو دەسەڵاتوو ئاکەپە-مەهەپەی کە دوژمنوو کوردییا، ئامرازێوەن پەی کوشتەی کوردا. فڕۆکێ و هەلیکۆپتەرێش پەی بۆ کوشتەی کورد هەنێ، بەڵام وەختێو مێ سەروو باسوو کوشنایوە ئا ئاویرەیە کە کوردی مسۆچنۆنە، فڕۆکێ و هەلیکۆپتەرێ نییەنێ. پەنەوازا ئینەیە بزانمێ و پەشتیوانیی وێما زیاتەر بوزمێنە وەڵێ، دەرفەتەکاما هامبەش بکەرمێ، برینەکاما ساڕێژ بکەرمێ، زیاتەر وێما ڕێک بوزمێ و ژیوایما بپارێزنمێ.
"بێگومان ئی ئاویرە بە ئەنقەس کریانۆ"
ئەرەمەرزیاو بەشکەردەی کارەباو دیجلەی (DEDAŞ) کە سەبەبوو ئی ئاویرەیەنە، بەشێوەن جە سیاسەتوو قڕکەردەی کوردا. DEDAŞ پێسەو ئەرەمەرزیێوی کۆکوشی و تاڵانکەری و قڕکەری هەرمانە مکەرۆ. پێسەو ئەرەمەرزیایەکای تەروو قڕکەردەی، پەی چەوسنایۆ و تاڵانکەردەی و چۆڵکەردەی و بێئینسانکەردەی کوردستانی مکەرۆ. دەسش ملوو سروشت و سەرچەمەکاو کوردستانیرە گێرتەن و سەرچەمەکاو وەڵاتی و ڕەنجوو گەلی فاڕان پەی ئامرازوو تاڵانکەردەی. سەرچەمەکاو کوردستانی پەی بۆ چەوسنایوە گەلوو کوردستانی بەکارمارۆ. ڕژێمی فاشیستی ئاکەپە-مەهەپەی تەنیا گەلوو کوردی نمەکوشۆ، چەنیچش جوگرافیاو کوردستانیچ مکوشۆ. گەرەکشەن بە دزی و تاڵانکەردەی جوگرافیاو کوردستانی، کوردستانی بکەرۆبە یاگێوی کە ئینسان نەتاوۆ دلێشنە بژیوۆ و پینەیچە کۆکوشیی کوردی مکەرۆ، گرد قڕکەردەێوی سرووشتی کوردستانەنە، پێسەو ئی کارەساتوو ئاویرکەوتەیوە ئێساتێ، سەر بە هەمان سیاسەتینێ. بێگومان ئی ئاویرە بە ئەنقەس کریانۆ. ئامانجەکەش دلێنەبەردەی سرووشتوو کوردستانی و کوشتەی گەلوو کوردی و زەرەریاوناین پی گەلەیە، تا دوورش بوزانێوە جە ماواو وێش و بێبەشش بکەرا چنە، پەنەوازا گەلەکەما ئی ڕاسییە بزانۆ، پێسە وەڵات و سرووشت و کولتوور و ئشناسنامە و شکۆو وێش بپارێزنۆ. پەنەوازا گەلەکەما بە وەڵێوستەی و وێپارێزنای پەنەوازییەکاش بیاونۆ یاگێ و قۆرتەکاش چارەسەرێ بکەرۆ، پێسە پلانسازیی بکەرۆ و ژیوایش بوزۆنە وەڵێ.
دەسەڵاتوو ئاکەپە-مەهەپەی بکوش و ئەرەمەرزیا کۆنتراکاو ژیتەمی نەژادپەرسی و فاشیستی و قڕکەری و ئەرەگیرکەری و تاڵانکەری، کە بە کەردەیوەی ئی ئاویرەیە واوەی گەلەکەماشا ڕووەبەڕوو ئێشی و مەینەتی کەردۆ، بەتندی شەرمەزارش مکەرمێ. پەنەوازا گەلەکەما هەم دژوو ئی فەرمانە قڕکەرێ و ئەرەگیرکارییێ بکۆشییۆ، پەرسۆوە و هەم هەڵوێستی یۆگێرتەو وێش بەردەوام بکەرۆ. ئی ڕەوشە قەیرێو سەختا، بێجگە جە قوربانی و بریندارەکا، سەدان یانێ و زەمینێ و باخچێ خەڵکی سۆتێنێ، ئاژەڵەکێ خەڵکی مڕارێ بیێنیوە و زەرەرێوی فرە کەوتەن. پەوکای پەشتیوانیی تەمام بەرموزمێ پەی گەلوو کوردستانی و گەلوو شەمرەخی و چنارێ، بە پاو گرد دەرفەتێوی وەردەسیما هامکارێشا بیمێ، واوەی سەرەوەشی وەنەو تەماماا گەلەکەیما و بەتایبەت گەلوو شەمرەخ و چنارێ مکەرمێ، داوا جە گرد لێوە مکەرمێ پەشتیوانیی گەلوو شەمرەخی و چنارێ بکەرا".
