کۊمیتەو پەیوەیوەندییەکا جبەرو کەجەکەی ئەرەیاۋناش: "دۆڵەتو تورکی پەی ئانەی هرووژمی تازە بە ئەنجام بېیاونۆ و کۊششی تازەو ئەرەگیری بارۆنە ئاراوە، هېزە سەروازییەکاش جە خاکو پانیشتو کورڎەسانینە کوۍ مکەرۊوە.

٢٢ۍ حوزێرانی کارەوانێوە گۆرە جە گەڵابەی و ترۊمبێلۍ سەروازیۍ جە ئامەدۊ بەرەو کانی موش ۋېیەردێنۍ. شەوەو ٢٣ۍ حوزێرانی کارەوانێوە سەروازی جە ترۆمبێلێ سەروازیۍ و سوپاو تورکی جە دهۊکۆ پڕێوە پەی ئامێدی. شەوەو ٢٤و حوزێرانی پەی جاری یەرەمی کارەوانێوە گۆرە جە زریپۊشی و چەکی قورسی سەروازی ڕەوانەو ئامێدی کریێنۍ. جموجۆڵە سەروازییەکۍ جە بەینوو هەرېمەکانە بەردەوامێنۍ.

جە ئەرەیاۋناکەو کەجەکەینە ئامان: "چی خاکەنە کە ئینا چێروو ۋەرپرسیاری عێراقی و پانیشتوو کورڎەسانینە. ئەرەگیرکاری تورکی بە ئەرێکەردەی ڕاوەبەرا پەدەکەی و حکومەتوو بەغڎای ئەنجام مڎریۆ."

درێژەو ئەرەیاۋناکەی پی جۊرەنە: "ڕاوەبەری بەعڎای کە بەین بەین باسوو سەروەری ۋێش و یەکپارچەیی خاکوو عێراقی مکەرۆ، پا ڕێکەوتننامەی کە نامێش نیان 'ڕێکەوتەی ئاسایشوو سنووری' و چنی تورکیای مۆرەش کەردەن، زەمینەسازی پەی ئانەی مکەرۆ کە ئەرەگیریەکاو تورکیای ئاسایی و ڕەوا نیشانە بڎۆ. جە ئاژێوە پی جۊرەنە ئینسان نمەتاوۆ باسوو ئاسایشی سنوری عێراقی و سەروەری خاکوو عێراقی بکەرۆ، جە وەختێنە کە سوپاو تورکی بە قوڵای ٣٠-٤٠ کیلۆمەترا ئامان دلۍ خاکوو عێراقی، چا مەنتیقەنە سەڎان بارەگۍ سەروازی و قەرەقولێش وەشۍ کەردێنۍ. هەرێمە ئاسمانی و زەمینییەکا پاشێلۍ مکەرۆ."

پەدەکە گرڎوو دەرفەتەکاش وستێنۍ خزمەتوو سوپاو تورکی

کۆمیتەو پەیوەندییەکا جبەروو کەجەکەی ئاماژەش پی مژارا کەرد:

"پەدەکە چی مژارەنە هەڵوێسی ئنڎە چالاک مگێڵنۆ و پەی تەمامکاری ئەرەگیری تورکی گرڎوو دەرفەتەکاو ۋێش وستەن خزمەتوو سوپاو تورکیوە. پەدەکە پارێزنای جە بنکە سەروازی و قەرەقولەکا تورکی مکەرۆ جە پانیشتوو کورڎەسانینە. جە ئیساتێچەنە پەی ئۆپراسیۆنە تازە ئەرەگیریەکا هامکاری فاڕایۆ سەروازی سوپاو تورکی مکەرۆ، ڕاسەوخۆ بەشدارو کاروبارەکا بنەوستەی، پەناگە، فاڕایۆ و لۆجیستیەکا سوپاو تورکی مبۆ و بە ئەرکوو ۋێش مزانۊش. ڕاوەبەرا پەدەکەی و بنەیانەو بارزانی پی هەڵوێسەیشا جە ۋن متەی کناچە و کوڕا گەریلاکاو ئازاڎیی کورڎەسانی، کە دژوو دەوڵەتو تورکی فاشیستی قڕکەری جەنگ مکەرا، ئنڎەو دەوڵەتو تورکی ۋەرپەرسا. پەنەوازا گەلوو کوردی ئی عیلاقە نەگریسەو پەدەکەی چنی دەوڵەتو تورکی قڕکەری بوینۆ. بە شێوێوە ئاشکرا ڕۊشنبیەنۆ کە جگە جە پارېزنای بنەیانەی و دەورووبەرەکەیش، جگە جە ۋۍ دۊڵەمەنڎکەردەی حیچ عیلاقێوەشا بە کوردایەتی و کورڎەسانیوە نیا. نە ئشیۍ پی جۊرە پەدەکە دژوو گەریلاکاو ئازاڎیی کورڎەسانی، چی ئاستەنە هامکاری دەوڵەتو تورکیش نەکەردەبیۍ.

سوپاو تورکی چا یاگانەی کە ئەرەگیرێش کەردێنۍ بە هەرێمی قەڎەغەکریا ئەرەیاۋنێنێش، هەوڵمڎا هەرێمەکەی جە خەڵکی چۆڵ بکەرا، چا مېڎانانە کە نوقتۍ وشکنای سەروازیش چنە نیانەرە و ئشناسنامەو هاموڵاتیا وشکنۆ، پەی ئاماو لووای دەگانشینەکا ۋێش سەپنۆ کە مۊڵەت جە سوپاو تورکیوە هۆرگێرا. دەوڵەتو تورکی پی ڕۍ سیاسەتوو کۆچبەریکەردەی و چۆڵکەردەی  دەگایەکا بە ڕێکوپێکی بەرۆ ڕاوە. دەوڵەتو عێراقی و دەسەڵاتداری پەدەکەی هیچ هەڵوێسێوەشا ۋەرا ۋەر پی سیاسەتەیە نیشانە نەڎا، زەمینە سازی پەی ئانەی مکەرۆ کە بەهەزاران گەنجۍ کوردی ڕەوانەو ئەوروپای بکەرۆ و چا ڕێنە بە شێوێوە تراژیدی مرانە.

ڕاوەبەرا بەغڎای و هەولێری هیچ هەڵوێسێوە جە ۋەرا ۋەرو ئەرەگیریەکا تورکینە سەرو خاکوو کورڎەسانی و عێراقیۆ نیشانە نمەڎانۍ، کە سەروو ئاینڎەو گلېرگەو عێراقی تەرسێوە جدییەنە. تەرسەو ئانەی کە ئەرەگیری تورکی هەمیشەی بۆ و چنی کاتی بواڕیۆ پەی دەسسەرەرەگێرتەی. بەڵام چنی خەمساردی هەردووە ڕاوەبەریەکەینە، حەرپاسە بێباکی و بێهەڵوێسی پارتە سیاسیەکا، چاپەمەنی، ڕۆنامەوان، هۆز، جەمەکا باوەڕداری، ڕۆشنۋیری، نویسەر، ئەکادیمییەکا و گلېرگەی عێراقی ئاسایی نیا. وە بە تایبەت پەنەوازا گەنجاو کورڎەسانی وڵاتپارێزنی جە ۋەرا ۋەرو ئی هرووژمە بێحورمەتییانا دەوڵەتو ئەرەگیروو تورکینە، بێدەنگۍ نەبا و ناڕازیۍ هێقم نیشانە بڎا.

دەوڵەتو تورکی دەسسەرو پانیشتوو کورڎەسانی-رە مگێرۆ و ئەرەگیرش مکەرۆ

پەنەوازا خەڵکوو عێراقی و سەرو گرڎیوە خەڵکوو پانیشتوو کورڎەسانی ۋەرا ۋەر بە ئەرەگیری و دەسسەرەرەگێرتەی خاکەکەیشا جە لایەنوو سوپاو تورکیوە، هەڵویسی هێقم نیشانە بڎا. پەنەوازا سیاسەتوو حکومەتەکەیشا ڕەڎ بکەراوە کە ڕەوایەتی مڎۆ بە ئەرەگیری تورکی، دژوو ئەرەگیری هەڵوێسی چالاک نیشانە بڎا؛ پەنەوازا ڕاپیمای، گلېرۊبیەی و چالاکی دژوو بیەو بنکە سەروازییەکا تورکی سەرو خاکوو عێراقیۆ بکەرا. ۋەروو ئانەی دەوڵەتو تورکی ئەرەگیری بە پاشێلکەردەی گرڎ جۆرە ئەخلاق و یاسێوە میان نەتەوەیی ۋەرووچەما دنیێوە بەشێوێوە ئاشکرا خاکوو کورڎەسانی ئەرەگیر مکەرۆ. ئەرکی  بنەڕەتی گرڎ کوردۍ و عێراقیێوەن دژوو ئی ئەرەگیریەو تورکی مرداوە.

ۋەروو ئینەیە پەنەوازا گرڎوو گەلا عێراقی و سەرو گرڎیۆ کورڎ بە پاو پیمەرە مرۆڤایەتییەکا و ئازاڎیی جە دژوو ئەرەگیری دەوڵەتو تورکی مرداوە، دەنگشا هۊربڕا و ئەرەبکۊشا."