هامسەرۆکایەتی کۆنسەو ڕاوەبەری کەجەکەی ئەرەیاۋناش: "ئەگەر گەرەکما بۆ جە ڕابەر ئاپۆی بیاومێنە، مشۊم پېسە زیلانۍ بیمۍ، پېسە زیلانۍ بژیۋمۍ و ئەرەکۊشیەیمۍ.

هامسەرۆکایەتی کۆنسەو ڕاوەبەری کەجەکەی جە ئەرەیاۋنێوەنە، ٢٨ەمین ساڵیاڎوو گەشمەرڎە بیەو زیلانۍ (زەینەب کیناجی)ێش یاڎ ئاوردۆ.

دەقوو ئەرەیاۋناکەو هامسەرۆکایەتی کۆنسەو ڕاوەبەری کەجەکەی پی جۊرەنە:

"جە ٢٨ ساڵەو گەشمەرڎەبیەو هەڤاڵێما زیلانۍ-زەینەب کناجیۍ، کە بە ژیۋای، چالاکیی و هەڵوێسوو ۋێش بیە بە ڕەمزە و ڕێبازێوە جە کورڎەسانەنە، بە ڕێزو دڵسۆزی و حورمەتۆ یاڎش مارمێوە. جە کەسایەتی هەڤاڵ زیلانێنە گرڎوو گەشمەرڎا شۆڕشی و دیموکراسی بە ڕێز و منەتبارییوە ۋیرۍ مارمێوە و جارێوەتەر قەولوو سەرکەوتەی و وەفاڎاریما پەی گەشمەرڎا واوەی مکەرمێوە.

هەڤاڵ زیلانە کەسایەتیېوەشۊڕشگەرەی گەورێنە و پەنەوازا بە ژیۋای، پایەگا، بەشداری و شێوازو ۋێشۆ بە عالی بېیاومێشەنە. هەڤاڵ زیلانە ڕۊشنش کەرڎەنۆ کە جە ۋەرەنجامو عەشق و پەیوەسبېیەی بەرزیش بە ژیۋایۍ ئازاڎی کە جە ڕابەرایەتیېوە ئازاڎەنە بەرجەسە بېیەن، چالاکیۍ پا جۊرەشە کەرد. پېسە عاشقێوە گەورۍ ئازاڎی، گرڎو دەرفەتەکا ۋێش پەی ئازاڎی بەڕېکوستەی کەرد و کۊتە ئاماڎە خاسی وە. بە فراوانتەرین شێوە نیشانەش دان کە هوشییاری و ئیرادەش جە بەرزتەرین ئاستەنە ئاماڎەن و پەی ئازاڎی متاوۆ ئەنجامېوە گۆرە بەرهەم بارۊنە. ئی حەقەتینەشە نە تەنیا بە قسەکاو ۋێش نیشانە دا، بەڵکو بە ژیۋای و کرداری ۋێش بەرجەسەش کەردۆ. یۊ خسوسیەتە سەرەتاییەکاو زیلانۍ ئا ڕاسییەنە کە جە ژیۋایشەنە نیشانەش دان. کریۆ جە ژیۋای و چالاکییەکا زیلانېوە بېیاومۍ بە ئەنجامېوە چانە. زیلانە؛ کەسېوە گەورێنە کە دژمنوو ئازاڎی، ژیۋای و مرۊڤایەتیش دلېنە بەرد و هەڤاڵەکېش بە شېوېوی سەرسوڕهێنەر دڵوەشۍ کەردۍ.

هەڤاڵ زیلانە بە ژیۋای و چالاکیەکەو ۋێش ئی پەیامشە بە ئێمە دا؛ بەبێ ئانەی ئینسان خاوەن چالاکیېوە گەورە بۆ؛ نمەتاویۆ ئازاڎ بی، ئەگەر گەرەکما بۆ ئازاڎۍ بیمۍ و ژیۋایۍ ئازاڎما بۆ، مشۊم خاوەن چالاکیێوە گەورە بیمۍ و بیمۍ بە کۊششکار. ئی ئەنەیاوایە فرە نزیکا چا شێوازەو ژیۋای ئازاڎیی کە ڕابەر ئاپۆ پەی کورڎەسانی باسس مکەرۆ و دماتەر پەی سەردەموو ئێمە هۊرش سەنگنان. ڕابەر ئاپۆ ئەرەیاۋناش کە جە کورڎەسانەنە هیچ ژیۋایۍ بە بێ هوشیاری ئازاڎیی و  ئەرەکۊشای پەی ئازاڎیی نمەکریۆ و ئاڎەیچ سەرو بنەماو ئا فەلسەفەیە کۊشیای ئازادییش دەسپنەکەرد. ڕابەر ئاپۆ، دماو هۊرسەنگنایش پەی ژیۋای مۆدێرنیتەی سەرمایەداری، ئەرەیاۋناش کە ئی حەقەتینە نەک تەنیا پەی کورڎەسانی، بەڵکم پەی سەردەموو ئێمە و گرڎ شۊنێوە ڕەوان. هەڤاڵ زیلانە ئا کەسێنە کە بە قووڵی ئی حەقەتینەشە ئەزموون کەرد کە ڕابەر ئاپۆ باسش کەرۍ. چی ڕووانگۆ زیلانە نزیکتەرین کەسەنە جە ڕابەر ئاپۆیۆ. یۆتەر جە سەرنجڕاکێشتەرین خسووسیەتوو هەڤاڵ زیلانۍ ئانەنە کە حەرچنڎە ڕابەر ئاپۆش جە نزیکۆ نە دیەن، بەڵام فرە عال جە ڕاسی ڕابەرایەتیوە نزیکە بیێنە و پا جۊرە ژیۋێنە. جە حەقەتینەنە ڕابەر ئاپۆ بە ڕۊسنی ئی حەقەتینەشە وستەن ڕووە. ئینەیچ دەرئەنجاموو قوڵ بیەیۆ جە ئازاڎیی و پەرۆش بیەیش بۍ پەی ئازاڎیی. پی مەعنۍ زیلانە بەماناو ئەنەیاوای جە ڕابەر ئاپۆی و پا جۊرە ژیۋایش کەرد کە ڕابەر ئاپۆ باسش مکەرۆ. ئەگەر گەرەکما بۆ جە ڕابەر ئاپۆی بیاومێنە، مشۊم پېسە زیلانۍ بیمۍ، پېسە زیلانۍ بژیومۍ و پېسە زیلانۍ ئەرەکۊشای بکەرمۍ.

لایەنێوەتەری بەقوەتوو کەسایەتی زیلانۍ ئانەنە کە جەنگ چنی عەقڵیەتوو پیا سالاری مکەرۆ و سەرشەرە زاڵە مبۆ. هەڤاڵ زیلانە بە کردەوەکاو ۋێش نیشانەش دان کە ژەنی وڵاتپارێزتەرین، کۆمەڵایەتیتەرین، فەداکارتەرین و ئازاڎتەرینۍ گلێرگەینۍ. پی جۆرە جە پیا سالاری ۋنەپەرسایۍ تاریخیش کەردەن. ئارۆ ئی خەتۍ بیێنە بە گەورەتەرین جمیەروو ئازاڎیوازی کە بە دروشمەو ژەنی، ژیۋای، ئازاڎیی کە ژیۋای بەرەو ڕزگاری بەرۆ. جمیەروو ژەنا ئازاڎیما بە قووڵی چی حەقەتینە تاریخیە یاوانەنە، نرخنایش پەی کەردەن و پێشکەشش کەردەن.

بێ گومان سەرەکی تەرین بەربڕیەو کەسایەتی زیلانۍ فیدایی بیەین جە بەرزتەرین ئاستەنە. هەڤاڵ زیلانە جە هێڵۆو هەڤاڵ عەگیدینە ۋێش بە ڕێکوستەی کەردە و ئی هێڵێشە یاۋنا بە قولەپۊپە. مۆرەو ۋێش سەرو هێڵۆو گەریلایی بیەی دا. هەڤاڵ زیلانە نیشانەش دان کە ئانۍ کۊشیای پەی ئازاڎیی مکەرا جە ۋەرا ۋەروو دەسەڵاتی ماددی- تەکنیکی دەسەڵاتدارانە بەقوەتتەرێنۍ، ئی هێزە جە ئیرادەو بەڕێکوستەی کەسانێوە سەرچەمە مگێرۆ کە بەسیانۆ بە ئازاڎییوە و حەرپۊکەی دوورا جە دەسەڵاتی ماددییوە، بە پێچەوانۆ ئیرادە دەور گێڵنۆ. پەیلواو ڕابەر ئاپۆی کە هەمیشە واتەنش گەورەتەرین تەکنیک خودوو ئینسانیا، سەلەمیا. گەریلاکاو ئازاڎیی کورڎەسانی پا ئەنەیاوایۆ ئارۆ کۊشیای مکەرۆ و جە گرڎ شۊنێنە دژوو سوپاو فاشیستی قڕکەری و ئەرەگیری جەنگ مکەرا و گەلی و ئازاڎیی و کەرامەتوو مرۆڤایەتی پارێزنا.

ئێمە جارێوەتەر ئازاڎیوازەی ئێژاو گەلەکەیما هەڤاڵ زیلانۍ، بە ڕێزدارییوە مارمێوە وە یاڎ و سەرەو ۋێما ۋەروودەم و یاڎیشەنە منامنمێرە. جە قۆناغێوە چامنێنە، کە بە پڕۆسېوە تاریخیرە ۋییەرمۍ و ئینایمۍ جەنگێوە قورسەنە چنی دژمنی فاشیستی، قڕکەری و زاڵمی، جە گرڎ کاتێ گرنگتەر ئانەنە بە شێواز و ڕێبازو زیلانۍ بژیۋمۍ و بەشدارۍ کار و ئەرەکۊشای بیمۍ. سەرو ئەو بنەمایۍ داوا جە گەلەکەیما، دۆسا و گرڎوو ئازاڎیوازا مکەرمۍ پەی ئانەی زیاتەر جە هەڤاڵ زیلانۍ بیاومېنە و جە گرڎ شۊنێنە بە هێزۆ هەڵوێس نیشانە بڎا مشۊم بە عالتەرین شێوە جە هێڵۆو زیلانۍ بیاوانە و بەشدارۍ هەڵمەتەو ئازاڎیی بانۍ کە بە مەراموو ئازاڎیی جەستەیی ڕابەر ئاپۆی دەسش پنەکەرد. بەشدار بیەی سەرو بنەماو هێڵۆو زیلانۍ بە دڵنیاییوە سەرکەوتەی شۊنەو ۋێشەرە مارۆ."