کۆمسیۆنو ژەنا پلاتفۆرمو هۆرام-ی: ئازادی ژەنا بنەڕەتو ئازادی کۆمەڵگایەن

کۆمسیۆنو ژەنا سەر بە پلافۆرمو هۆرام-ی بەبۆنەو ٨و مارسی ڕۆجیهانی ژەنا، سەرەڕاو پیرۆزبایی و ئاشکراش کەردەن: ئازادی ژەنا بنەڕەتو ئازادی کۆمەڵگایەن و تا ژەنی پەراوێزە بوزیۆنە نەهامەتی زیاتەر ڕوو جەکۆمەڵگای مەکەرۆنە.

کۆمسیۆنو ژەنا سەر بە پلافۆرمو هۆرام-ی بەبۆنەو ٨و مارسی ڕۆجیهانی ژەناوە ئەرەیونایش دان و جە میانشەنە سەرەڕاو پیرۆزباییکەردەی جە بۆنەکەی و دەستنیشانش کەردەن: ئازادی ژەنا بنەڕەتو ئازادی کۆمەڵگایەن و تا ژەنی پەراوێزە بوزیۆنە نەهامەتی زیاتەر ڕوو جەکۆمەڵگای مەکەرۆنە. چی سەردەمەنە کە ویروو پیاساڵاری چێروو نامە جیاوازەکاوە ڕا جە ئازادی ژەناش گێرتەن ، جە لایە تەر سیستموو سەرمایەداری بە شێوە نەرمتەر کەسایەتی و ئەرزشەکا ژەناش گێرتەن نیشانێ .

 تەمامی ئەرەیاوناوکەو کۆمسیۆنو ژەنا سەر بە پلافۆرمو هۆرام-ی:

بە بۆنەو رۆ جیهانی ژەنا ، پلاتفۆرموو هۆرام-ی پیرۆزبایی ئی ڕوەیە جە ژەنا کوردستانی و بە تایبەت هۆرامانی کەرۆ.
بیەو ڕوێ پسۆ ٨ی مارسی کە بە رۆ جیهانی ژەنا ئەژناسیان ، ئا راسیەما پەێ بەر وزۆ کە هێشتا یاوای پەێ ژیوایە یەکسان و ئازاد یۆ جە ئاواتەکا ژەنا جیهانیا . تاریخ ئانەشە نیشانەدان کە هەر یاگێوە ژەنی جە ڕاوەبەری بێ بەشە کریەنە ، چا وەڵاتە یا کۆمەڵگانە نەهامەتی زیاتەر ڕوەش وەنە کەردێنێ . مڵهۆری ، ناعەداڵەتی ، کۆشتەی و نائۆمێدی بەرهەموو کۆمەڵگێوە نا یەکسانین . چی سەردەمەنە کە ویروو پیاساڵاری چێروو نامە جیاوازەکاوە ڕا جە ئازادی ژەناش گێرتەن ، جە لایە تەر سیستموو سەرمایەداری بە شێوە نەرمتەر کەسایەتی و ئەرزشەکا ژەناش گێرتەن نیشانێ .

بە جۆرێ تاومێ واچمێ کە سیستموو سەرمایەداری جە لاوازی و پەرتەوازی هێزوو ژەنا ، هێزش گێرتەن . جە هەر یاگێنە کە ژەنی وێشا رێکوستەبۆ و جە ڕاوەبەری دیموکراتیک و کۆمەڵگای بیەشا بۆ ژیوای ئارامی و یەکسانی زیاتەرش پۆوە دیار کەوتەن . پەنەوازەن کە ژەنا کوردی و بە تایبەت هۆرامانی بە رێکوستەو وێشا ، کۆمەڵگای جە ترازای جە ڕاو راسی وێش پارێزنا . پسۆ پڵاتفۆرموو هۆرام-ی ، سەرەراو مۆبارەکبایی کەردەو رۆ جیهانی ژەنا جە ژەنا کوردستانی و بە تایبەت هۆرامانی ، پەێ یاوای بە ژیوایە ئازاد و یەکسان گردوو هێزو تواناو وێما وزمێ پاڵوو داواکاری ژەنا پەێ یاوای بە ئاواتە ئینسانیەکاشا . باورما ئانەن کە ئازادی ژەنا ، ئازادی کۆمەڵگای چەنی وێش ماڕۆ و هەر یاگێ کە ژەنی چێر دەسێ و زۆڵم وەنە کریە با ، نە ژیوای هەن نە ئارامی و نە یەکسانی . پەێ یاوای بە ژیوایە ئازاد و یەکسان مشۆم ژەنا ڕوانە ڕوەشا جە وەرەتاوو ئازادی بۆ .

کۆمسیۆنوو ژەنا/ پلاتفۆرمو هۆرام-ی