کۊمیتەو جوانا پەکەکەی ئەرەیاۋناش، کە جە قۆناغێوە پی جۊرەنە کە جەنگوو مەنەی و نەمەنەی ملۊڕاوە، جوانۍ کورڎەسانی ئەرک و ۋەرپرسیاری گۆرەشا ئینا ئەستۆنە و داواش جە گەنجاو کورڎەسانی کەرد کە خاوەنداری جە ئەرکی تارېخیشا بکەرا.
جە ئەرەیاۋناکەینە ئامان، "ئارۆ پەی ژیۋایۍ ئازاڎیی، جگە جە جەنگی حیچ هۊرچنیێوەتەر نیا ۋەروو دەسانە".
ئێمە سەرۍ گنمۍ
جە ئەرەیاۋناکەینە ئامان:
" جوانۍ کورڎەسانی جیای ئانەی بانۍ بە نێچیرو چنگەو بازی کۆلۆنیالیستی، مشۊم جە کەشەکامانە بە شێوێوە شکۆمەنڎ بانۍ بە هەڵۆی ئازاڎیی.
گیانبازی جەوهەری زینڎەو پەکەکەیا. ئی جەوهەرە جە ڕاو زیلانۍ، سەماکا، سارۍ و روکەنەکاوە، رۆژهاتی و ئەرداڵەکاوە خوڵقیان. حوزەیران مانگێوەنە کە گیانبازی پەکەکەی جە کەسایەتی گەشمەرڎە زیلانێنە بیێنە بە ڕەمزە. راسی زیلانۍ زەریفتەرین و پڕجۆش و خرۆشتەرین گوزارشت و بەربڕیەی ژیۋایۍ ماناڎارین. راسی زیلانۍ جە ۋەرا ۋەروو ۋۍ هۊرخەڵەتنای، دروۍ، دەسەوسانی و بۍ ئەرەکۊشاینە گەورەتەرین کاروەداین؛ بانگەوازی ئازاڎیی و ئاپۆگەرییا. کەسایەتی زیلانۍ هەڵوێستێوە قەوتوو بۆمبی ئەتۆمیا جە ۋەرا ۋەر بە گرڎ جۆرە کۆیلایەتی و کاروەدایێنە بەرامبەر پا سیستمەو تاکگەرایی کە مرۆڤەکا مکەرۆ بە وەرگۍ ۋەرا ۋەر بە یۆترینی. حەقەتینێوە کە جە زیلانێنە مێنە کایۆ تەنیا چالاکی نییا. ئانە راسی و ئەوینوو ژیۋای ئازاڎییا کە جە زیلانێنە مۍ دی. فەلسەفەو جە ئامێزگێرتەی بەهاکان کە جە لایەنوو گرڎوو مرۆڤایەتیوە خوڵقیێنۍ و پارېزنای و زیڼەکەردەی گیانبازی پارتەکەیمانە. زیلان پەی ژیۋای گیانبازی مکەرۆ، مانیفیستۆو ئازاڎیمانە. سەرو ئا بنەمایۍ ئێمە گرڎو گەشمەرڎاما جە کەسایەتی فەرماندە زیلانێنە بە رێزو پنەزانای و تامەزرۆیۆ یاڎشا مارمێوە و بەرێزۆ سەرەو ۋێما ۋەردەموو یاڎوو ئاڎیشانە منامنمێرە. پېسە ژڵێوەو جوانا ئاپۆیی ئێمە جارێوەتەر قەولوو هەڤاڵ زیلانۍ واوەی مکەرمێوە کە بە هەڵوێسوو ئاڎۍ کە هێڵەو ژیۋای و جەنگی خولقنۆ، بژیۋمۍ و ئەرەکۊشمۍ.
ڕابەر ئاپۆ تەعبیرا جە بەکۊمەڵایەتیبېیەی و کۊمەڵگەرابېیەی
ئا راسیەو رزگاری کە هیواو مرۆڤایەتیا، بە هەڵوێس، ژیۋای و ئەرەکۊشای رابەر ئاپۆی خوڵقیان. رابەر ئاپۆ گەورەتەرین گیانبازی ژیۋای ئازاڎین. سەراپاو ژیۋای ۋێش پەی گەلوو کوردی و مرۆڤایەتی گوزەرنا و گرڎ ڕوۍ ٢٤ سەعاتۍ جەنگێوە دژوار و سەختش کەرد. ئاڎ داکۆکیش جە دۆزی ئازاڎیی گەلوو کورڎەسانی کەرد، کە تا ئا کاتە کەس نەیارۍ جە کورڎسانەنە نامۍ وڵاتەکەو ۋێچش بەرۆ. بە جۆش و خرۆشێوە گۆرۆ، بە وەشەسیای و قەرارداری ئەرەکۊشایۆ، ژیۋایش هۆناوە. ئانەی جە کەسایەتی ۋێشەنە ئەقڵیەتوو 'من من'یش دلېنەبەردەن، رابەر ئاپۆن. رابەر ئاپۆ سەرتاپا گوزارشت و بەربڕیەی کۆمەڵگەرایی و بەکۆمەڵایەتیبیەیا. خوڵقنەرو شێواز و هێڵۆو ئەرەکۊشای کە پارتەکەما خوڵقنانش ئاڎا و جە ۋەرا ۋەر بە گرڎوو جۆرە چەمکەکا ئەسڕیەیۆ و پاکتاوی مردۆنە. چالاکی هەڤاڵ زیلانۍ چالاکی دڵسۆزیا پەی ئا هێڵۍ کە چنی رەنج و کۊششی مبۆ بە مایۍ پەرەسانای پەرجوئاسای. حەرپاسە هەڵوێسوو گەریلا قارەمانەکا کورڎەسانی جە زاپ، ئاڤاشین و مەتینانە چەتەکۍ دەوڵەتو تورکی فاشیستیشا دلېنەبەردۍ، گوزارشتا جە دڵسۆزی و وەفاڎاری پەی رابەرایەتی و فیداکارییانە جە راسی رابەرایەتی.
گرنگتەرین مەڵامەت کە ڕابەر ئاپۆ جە سیستەمو ئەشکەنجەو ئیمراڵینە ئازیانۆ ئا گېیانبازییە کۊمەڵایەتیەنە. ئیمپریاڵیزم و هامکارۍ و خزمەتکاراش، ڕاسی ئایدۆلۆژیکی ڕابەریما، سیستەموو کۊمەڵایەتی کە گەرەکشا خوڵقنۊش و ژیۋای ئازاڎ کە گەرەکشا بە زېڵۍ ۋێشۆ ئامێتەس بکەرۊ، پەی ۋێش پېسە تەرسېوە گەورۍ موینۊ. ڕابەر ئاپۆ جە ٧ ساڵیوە ئەوەپەرسایش جە ژیۋایۍ درۆیینەی کەرد، کە دروێ دلېشەنە فرۍ بېنۍ، خیانەت و هامکاری چنەشەنە فرە بۍ، کۆیلێوتی ئارەزومەندانە پېسە چارەنوویسی قبوڵکریابۍ، ئا ژیۋایشە قبوڵ نەکەرد. پەی ژیۋایۍ ئازاڎی گرڎ کاتۍ ئینا دلۍ گېڵای و ئەرەکۊشاینە. ڕابەرایەتی چەرخو کۆلۆنیالیزمی و کۆیلێوتی کە مۆدێرنیتەی سەرمایەداری گەرەکشا پېسە چارەنویسۍ ڕەهایش پنەبکەرۊ، مردنا. گەمە و پلانە چەپەڵەکۍ دوژمنیش سەرو گەلو کورڎی و گەنجاو کورڎی پووچۍ کەرڎېوە.
کەشەکاو کوردستانی پەی چەتەکاو فاشیستا مبۆ بە قەبرسان
سەبەبوو توڕەیی دوژمنی و هجوومی بێباکانەش پەی سەروو ڕابەر ئاپۆی ئینەنە. تەنانەت تابووتوو ئیمرالیچنە هەناسەدای ڕابەر ئاپۆی ئاستەنگ مکریۆ. هەوڵێ مدانە کەسایەتیی ڕابەر ئاپۆینە هەناسەو گەلوو کوردی و گەنجاو کوردی بگێران.
ڕژێمی فاشیست و ئینسانکوشو تورکی بییەی وێش سەروو قڕکەردەی گەلوو کوردی بنیات نیان. ساعیبوو عەقڵیەتێوی فاشیستییا، کە گولانەتەرین دەستکەوتەکاو گەلەکەیما و کۆشیای ئێمە بە گەورەترین هەڕەشێ پەی سەروو وێش موینۆ. چەمەڕوانی و هومێدورچنیەی جە عەقڵیەتی چانەیوە پێسەو هومێدواستەی ژیواین جە جەلادێوە. ئینەیچە مبۆ بە وێخەڵەتنای . ڕابەر ئاپۆ کە ساعیبوو تایبەتمەندیێوی شۆڕشگێڵنانەیا واتش، 'من فێڵە وەنەو کەسی نمەکەروو ناکەم و فێڵەم وەنە نمەکریۆ'. مشۆم ڕاسیی بۆ بە ژیوای بنەڕەتیی ئێمە، مشۆم گەنجێ ئاپۆیێ پا زوانە کە میاواشنە جوابوو دوژمنی فاشیستی بدانێەوە. ڕابەر ئاپۆ ئیساتێنە سەروو خاچوو ئەشکەنجەی و گۆشەگیریوە ئیمرالیینە ئی هەرمانێ مکەرۆ. گەریلاکاو ئازادی ئا قارەمانێ ئیساتێنە زاپ و ئاڤاشیننە و مەتینانە کۆشیاێوە چانە مکەرا. گەریلاکاو ئازادی بە ئۆپەراسیۆنی شۆڕشگێڵنانە کیمیاوی دوژمنیشا بێکاریگەر کەردەن و کەشەکاو کوردستانیشا کەردێنێ بە قەبرسانوو چەتەکاو فاشیستا. ڕژێموو فاشیستی کە شانازیی بە درۆنە جەنگکەرەکاش و تەکنەلۆژیای بەرزیشۆ مکەرۆ، یۆ بە یۆ بە عاسمانوو کوردستان مکەرانە ئامانج. ڕژێمی فاشیستی وەروو چەماو جیهانیوە دلێنە مشۆ. دوژمنی فاشیست وەراوەروو گەریلا فیداییەکاو کوردستانینە شکسش ئاردەن.
هەرمانە و وەرپەرسیی تارێخیی گەنجا
جە پڕۆسێوی تارێخیی چانەنە، کە جەنگوو مەنەی و نەمەنەی مکریۆ، گەنجاو کوردستانی هەرمانە و وەرپەرسیی گەورەشا ئینا سەروو شانەیوە. گەنجاو کوردستانی تارێخوو کۆشیای ئێمەنە هەمیشە سەرمەشقێنێ و هێزوو کۆشیای هەڵمەتێ و دەسکەوتەکانێ. واتەی، "گەنجێ فیدایی ڕابەر ئاپۆینێ" تەنیا دروشمێو نییەن. ئینە ڕاسی و میراتێوا، کە بە ونی و ڕەنج وەش بییەن. پێویسا گەنجاو کوردستانی بیاوانە و چەنی ژەنا خاستەر جە ڕابەرایەتی بیاوانە. گەنج بەشێوە چا گلێرگەیە کە ڕابەر ئاپۆ فرەتەرین هەوڵێ، پەیوەندی و هێزش پنە بەخشان. هامڕایی ڕێبازو ڕابەر ئاپۆی یانێ یۆترین قبووڵکەردەی، پارێزنای و وەڵیوستەی ئا بەهایا کە ڕابەرایەتی خوڵقنێنێ.
ڕابەر ئاپۆ پەی گەنجاو کوردستانی دەرفەت و ئیمکانوو کۆشیای گەورەش ڕەخسنان. ئیساتێ زیاتەر جە جاران بوار و فرسەت ئینا وەردەسوو گەنجاو کوردستانینە و متاوا هەستوو هەقۆسانایشا جە ڕووەبەڕووبییەیوە دوژمنینە بەربوزانێ. گرنگتەرین یاگێ کۆشیای ئازادیی کەشە ئازادەکاو کوردستانینێ. گەریلاو ئازادیی کوردستانی هێزوو هەقۆسانای گەلەکەیمانێ. هومێدوو ژیوای ئازادینێ. گەریلاکاو ئازادی نە تەنیا هێزێوی جەنگەرانێنێ، بەڵکوم بنەماو ژیوای ئازادینێ کە ئایدۆلۆژی و فەلسەفەو ژیوای ڕابەر ئاپۆیشا ژیواینە پراکتیزە کەردەن. پارتوو ئێمە پارتێوی گەنجانەن. مشۆم گەنجاو کوردستانی گەریلاکاو ئازادی بکەرانە مۆدێل و نموونەو ژیوای وێشا. مشۆم قیبلێ کۆشیای کەشەکاو ئازادیی کوردستانی با.
دوژمن هەوڵێ مدۆ گەنجاو کوردستانی چی ڕاسییە و کۆشیای دوور بوزۆوە و مەحکوومو نەوەشیی خۆفناکوو تاککڕەوییما بکەرۆ. گەرەکشا گەنجا بوزۆنە دۆخێوە کە تەنیا ویرێ جە وێشا بکەراوە و جە پەیوەندیی کۆمەڵایەتیی وێشا دوور گێرا و نامۆیینە بژیوا. پەی ئانەیچە گرد شێوازێوی جەنگی تایبەت و دەروونی بەکارمارۆ. نامۆبییەی خیانەتکەردەین جە سروشتوو خودوو ئینسانی. ڕابەرایەتی واتش، یەک کورد نەمەنەن خیانەتش جە وێش نەکەردەبۆ. بە مانێوە تەرە ئا ڕاسییەشە بەروست، کە جە سروشتوو وێشۆ دوورا. ئارۆ یاگێوەنە ئینسانەکێ بەڕاسی پاکێ بکریانێوە و وێشا چەنە موێزانێوە، کۆشیای پەی ئازادی و کەشەکاو کوردستانی. ئا گەنجێ پەی بژێویشا هەرمانە پەی دوژمنی مکەرا؛ ئینە چارەنویسوو ئادیشا نییەن. چارەنویسوو ئادیشا نییەن، کە پێسەو پەنابەری بەرەو ئەورووپا بژیوا. گەنجێ ئاپۆیی ئیتر چارەنویسوو وێشا منویساوە.
کەسێوە هەن، کە زوڵم و ستەموو دەوڵەتوو تورکی دڕندەی و بەربەری نەوینۆ، کە دژوو گەلەکەیما مکەرۆش؟ ئایا ساتێوە هەن کە قینی و سووکایەتی وەراوەروو گەلەکەیما نەکەردێبۆ؟ مەگەر ئینسان متاوۆ نکۆڵیی چانەیە بکەرۆ، کە وەختێ سروشت، دەشتە و کەش و گەل و گردوو زیندەوەرەکاما مسۆچا، چندە کەیفش پانەیە ئێ؟ کەسێوە هەن ئانەیە نەژنەوۆ کە کوردێ مەیلشا ئازادیی ژیوایا، چە بێڕێزیێوە وەراوەروو مەردەکاشا مکریۆ؟ پێویسا گەنجاو کوردستانی دەسبەردارێ گەمەو یەرە مەیموونی بانە و دڵ و مەژگشا پەی ئی حەقیقەتە سۆچنەرانەیە بکەراوە و ئیتر پەشتگۆشش نەوزا. ئا زۆرداری و دڕندایەتییە کە تورک وەنەو گەلەکەیماش مکەرۆ، پێویسا ئەوەڵ جە وێش بپەرسۆ. ئیتر چی بیابانوو قڕکەردەی و فاشیزمەینە بەردەوامیی بە ژیوای نمەدریۆ. پێویسا گرد گەنجێوی کوردی بوینا و بژنەوا کە وەختوو قەراری ئامان. پێویسا ڕاو هامڕا زیلانێنە کاریگەری و لایەنەکاو فاشیزمی تاریک و نەوینیای جە گرد وەختێوە زیاتەر بیاونیانە. ڕاو زیلانێ بە فیداکاری پەی خەتەو ئازادی و ڕابەر ئاپۆی، سەرمشقەو ئی خەتێ بێ. هامڕا زیلانە هەستش پانەیە کەرد و وەڵیوینایش کەرد ئا وەختە دوژمنێ دڕندێ یارای ئانەیشا بۆ هجووم بکەرا سەروو ڕابەریما ئا وەختە گردوو جیهانی موڕنۆ. پێسەو گڕکانێوە دلێ لایەنگێراو فاشیستیی بەربەریینە تەقاوە و جیهانەکەشا خاپوور کەرد. پێویس بێ هەقە بکریۆوە و وەنەو دوژمنی بپەرسیۆوە. ئادە پا چالاکییە داستانێوی هەقەی گەورێ ئێمەش کەردۆ.
جگە جە گژیای هیچ بەرێوە تەر نییەن
ئیساتێنە زەمین و عاسمانوو کوردستانی پەڕێنێ بەهانێ هەقسانایۆ گەنجە ئاپۆییا. ئیمراڵییوە تا گردوو دەگایەکاو کوردستانی حەر جۆرە هجوومێوی دوژمنی مشۆم هۆکاروو ئانەیە بۆ بە زیلانێ و هەقەو وێش بکەرۆوە. حەقیقەتوو ڕابەرێتی و پارتەکەیما پێسەو هێزی وەرپەرسی وەش بییەن. پیسەو هەقکەرەوێوی گەورەی بە حەرفی سوور نامێ وێش سەروو پەلەکاو تارێخیوە نویستۆ. کە کوردستان کابوسوو ئەرەگیرکەر، هامکار و گرد جۆرە چەتێوا. هەرپاسە بییەن بە هومێدی گەورەو گەلە بندەسا و ئازادیوازا. دەسەبەرکەردەی ئازادیی جەسەیی ڕابەر ئاپۆی کە ئی حەقیقەتەش خوڵقنان، بنەڕەتیتەرین هەرمانەو گەنجە ئاپۆییانە. ئارۆ ڕۆو دیداروو حەقیقەتەکاو ڕابەر ئاپۆین. ئارۆ ڕۆو فراوانکەردەی خەتەکاو گەریلاو ئازادیی کوردستانین. ئارۆ ڕۆو هەقکەردەیۆن جە عەقڵیەتی فاشیستی و قڕکەری. ئارۆ ڕۆو مسۆگەرکەردەی ئازادیی جەستەیی ڕابەریمانە. ڕۆ ڕۆو ئانەینە، کە گەنجاو کوردستانی خاوەنداریی جە وەرپەرسی و هەرمانەی تارێخییەو وێشا بکەرا.
سەروو ئی بنەمێوە پێسە تەڤگەروو گەنجە ئاپۆییا، ساڵوەگێڵوو چالاکیی هامڕا زیلانێنە جە وەختێوەنە، کە هجوومە دڕندانەکاو دوژمنی زیاتەرێ بیێنێ، داوا وەنەو گەنجاو کوردستانی مکەرمێ: خەتەو گەنجە وەڵاتپارێزناو کوردستانی، کە خەتەو جەنگی و کۆشیای زیلانێنە. جگە جە کۆشیای ژیوای ئازادی هیچ چارێوە تەر نییەن. وەختوو هەقکەردەیۆن جە دوژمنی. جیای ئانەیە گەنجاو کوردستانیما با بە نەچیرێ چنگەو بازی ئەرەگیرکاری، پێویسا کەشە شکۆدارەکامانە با بە هەڵۆو ئازادیی. دوژمنی وەحشی و دڕندە بە ڕۆحوو زیلانێوە بوزارە واری و بەرەو سەرکەوتن هەنگامە بنیا."
