کۆمیسیۆنو زۋان، کولتوور و پەروەردەیی کۆنگرەو نەتەوەیی کورڎەسانی (کەنەکە) سەبارەت بە هرووژمە ڕەگەزپەرسییەکا دەوڵەتو تورکی پەی سەرو بەهاکا گەلوو کوردی ئەرەیاۋنێوەش وەڵا کەردۆ.

جە ئەرەیاۋناکەینە ئامان: " ئا کوشتەی، کۆمکوژی و تاڵانکاریۍ دەوڵەتو فاشیستو تورکی ساڵانێوەن سەرو کوردارە مسەپنۆشا وەسۍ نییەنۍ، ئیساتۍ دژوو سەمای و ئاوازی کوردیی و هۊرپڕای ۋێشا پنەمەگیریۆ و جوانۍ گەلەکەیما گێرا و وزاشا زیڼانۆ. جەلایەنو شارەوانییەکا سەرنیشتوو کورڎەسانیوە کە ئینۍ دەسو حکومەتینە، نویستەیەکۍ، هێما و تابلۆکۍ کە بە زۋانی کوردی نویسیێنۍ سەرو جاڎەکاوە کۆ مکریاوە و سەڕیاوە حەرپاسە پەیکەرو ئەحمەدی خانی-شا ماڕان، چڼین تاوانۍ تەرێشا کەردێنۍ."

جە درێژەو ئەرەیاۋناکەینە ئامان: "ئەگەر ئینە بەردەوام بۆ و بێدەنگی بۆ ۋەرا ۋەر پی تاوانا دژ بە نەتەوەو کوردی، پیلانە ڕەگەزپەرسییەکۍ فراوانتەرۍ با و تەنانەت بەتاوانەو ئانەی گەلەکەما زۋانی تورکی نمەزانا سزای گۊرێشا مڎا. ئینە سەرەتاو شەپۆلێوە تازۍ فاشیزمی و ڕەگەزپەرسینە. کۆمارو فاشیستی تورکی گەرەکشا دەسکۆتەکا ئەرەکۊشای ١٠٠ ساڵەو گەلەکەیما دلێنە بەرۆ، چونکی گەلوو کوردی جە ۋەرکۊتوو مېیامینینە بەبەردەوامی سەرو خاکو ۋێشۆ هەزاران ساڵېن مژیۋۆ و خاوەن تاریخێوە قەڎیمین. ۋەرو ئانەی گەرەکشانە بە کردەوەی ڕەگەزپەرسی سامانوو نەتەوەیی کوردی، کولتوور، هونەر و ئەدەبیات و تاریخەکەیش سەڕاوە.

هەر نەتەوێوە بە زۋان، ئەدەبیات، کولتوور و هونەرو ۋێشۆ مژیۋۆ. ئەگەر ئی چێوۍ نەمەنا، بە دڵنیاییوە ئا نەتەوە ۋەرە ۋەرە تاریخەکەش نمەمەنۆ و دلێنە مشۆ.

ئی کۆمارە فاشیستە زیاتەر جە ١٠٠ ساڵان کۆمکوژییش سەرو ئێمەی کوردیرە سەپنان، بەڵام مشۆم ئانەی بزانمۍ کە خراپتەرین کۆمکوژی دلێنەبەردەی و تاونایۆ گەلوو کوردی و گەلا تەرو دلۍ تورکیاین و دلېنەبەردەی بەها نەتەوەیی و مرۆییەکان. پەی دمایی ئاردەی و لاوازکەردەی ڕەگەزپەرسی، سەرەتا ئەرەمەرزیێکۍ، ڕۆشنۋیرا، سیاسەتمەدارا کوردی و پەنەوازا گەلوو کوردی و کورڎەسانی بە گرڎیی هەڵوێسی نەتەوەپارێزنی ۋێشا جە ۋەرا ۋەرو دەوڵەتو تورکینە نیشانە بڎا و گرڎوو یانە و کەمپ و شۊنەمایەکا ژیۋای بە ڕەنگەی نەتەوەیی بڕازناوە و زېڵۍ نەتەوەیی قەوەت بکەرا."