جە سەنتەری ڕۊشنویری شاروو کەرکووکوو پانیشتوو کوردسانینە، زیادتەر جە ٢٠ کەسا جە ڕۊشنویری، نویسەری، سیاسەتمەداری، پیای ئاینی، چالاکی، ڕۊنامەنویسا، مامۊسۍ و کەسایەتیۍ کۊمەڵایەتیۍ و کەسانۍ وەڵاتپارێزۍ شاروو کەرکووکی، کوۍ بیێوە پەی تاوتۊکەرڎەی دماییتەرین فاڕیایەکا، جە یاسای تایبەت بە ورچنیەی ئەنجوومەنوو پارێزگاکاو عێراقی و سەپنای یاساێوە تایبەت بە شاروو کەرکووکی، کە بیێنە یاگۍ مشتومڕی لاو سیاسەتمەداراوە، دەزگاکاو ئەرەیاونای و تەنانەت لاو هاموەڵاتییایچ، حەرپاسە ناکۊکی سەروو سەپنای ئا بڕگە یاساییەو تایبەت بە کەرکووکی، ناکۊکییش قووڵ کەرڎەنۊ بەینوو هەردووە حزبە دەسەڵاتدارەکاو کوردینە.

دماو کۊبییەیۊکەی و تاوتۊکەرڎەی یاسای تازۍ تایبەت بە ورچنیەی ئەنجوومەنوو پارێزگاکاو عێراقی و شیکەرڎەیوە دلێنەو یاسا تایبەتەکۍ تایبەت بە پارێزگاو کەرکووکی، کەسایەتییەکاو شاروو کەرکووکی، کۊنگرە ڕۊنامەوانییەکەنە ئەرەیاوناشا، کە گرد هامڕێنۍ سەروو ئانەی جە کەرکووکنە لیستی هامبەشوو کوردی بۊ و کەسۍ شایسێش پەی کاندید کریا، داواشا جە دڵسۊزاو خەڵکی و خاکی کەرڎە، بەشڎارۍ با جە سەروستەی ئی پڕۊژەینە.

مەلا فەرمان محەمەد، نویسەر و چەمداری سیاسی، بە نامۍ ئامادەبییاوە هەڵوێسوو وێشا پێسە کەسایەتییەکاو شاروو کەرکووکی ئەرەیاونا و قسێش پەی دەزگایەکاو ئەرەیاونای کەرڎە و واتش: "ئێمە جەمێوە جە کەسایەتییە خەموەراو کەرکووکی کوۍ بیێنمێوە، جە کۊبییەیۊکەینە یاساو ورچنیەی ئەنجوومەنوو پارێزگاکاما شییە کەرڎۊ، تا بزانمۍ تا چ ئاستێوە ئینا مسڵەحەتوو کوردینە کورڎە یا دژەو کوردینە، ئێمە پێسە کەسایەتییەکاو کەرکووکی ڕەخنەمان جە دەسەڵاتوو ڕاوەبەروو ئی شارەیە هەن، حەرپاسە ڕەخنە جە هەردووە حزباو دەسەڵاتی کوردی گێرمۍ، کە یەک دەنگۍ نەبێنۍ جە پارێزنای بەرژەوەندییە نەتەوەییەکاو کوردینە جە بەغدانە، پەی پارێزنای خاکی و نشتمانیما، مشۊم بەرژەوەندییە نەتەوەیییەکاما وەڵی گردوو بەرژەوەندییەکای تەریوە با".

مەلا فەرمان واتیچش: "خەڵکوو کەرکووکی دڵنیا کەرمێوە، کە بارودۊخی سیاسیی کوردی خاسا، مشۊم ئێمەی کورد هەرمانە پەی یەکلیستی و یەکدەنگی کەرمۍ، جە ورچنیەی تازەنە، مشۊم جە ڕاو فشاروو خەڵکیوە، حیزبە کوردییەکا ناچارۍ یەکڕیزی کەرمۍ، ئێمە پێسە کەسایەتییەکاو کەرکووکی وێما بە ساعیبوو شارەکەی مزانمۍ، فشار وزمۍ سەروو حزبەکاو دەسەڵاتی بۊنەو سەرکەوتەی گەلوو کوردیوە".

سەبارەت بە دۊخوو ئیسەو شارەکەی، نامەبریا واتش: "ئیسەنە کەرکووکنە پڕۊسەو بەعەرەبکەرڎەی شارەکەی درێژەش هەن، کەرکووک تا ئیساتۍ ئینا چێروو حوکمی سەروازینە، دۊخوو شاروو کەرکووکی جە گرد ڕوێوە خراپا، ئێمەیچ پێسە کەسایەتی و هاموەڵاتییا بە گردوو حەوڵ و تواناو وێماوە جە ڕاو فشاروو خەڵکیوە، فشار جە دەسەڵاتی کوردی و دەسەڵاتوو بەغدای کەرمۍ، پەی بەدەسئاورڎەی مافوو هاموەڵاتییاو شارەکەی، کە ئیساتۍ هاموەڵاتییاو شاروو کەرکووکی جە سادەتەرین مافەکاشا بێبەشێنۍ، کە هاموەڵاتییاو شارەکەی بێکارەبۍ و بێئاوێنۍ، خەڵکیچ کوشیۊ، وەلێم هاموەڵاتی مەتاوۊ دەنگوو ناڕەزایەتی بەرز کەرۊوە".

جە ئاخیرۊ مەلا فەرمان واتش: "ئێمە ئەنجوومەنێوە مەرزنمێرە، کە سەروو بنەماو هاموەڵاتیبییەی هەرمانە کەرمۍ، پەی بەدیئارڎەی مافی تەماموو نەتەوەکاو شاروو کەرکووکی بۍ جیاوازی، جە ڕاو فشارکەرڎەیۊ جە دەسەڵاتیوە هەرمانە کەرمۍ پەی وەشگوزەرانیی کەرکووکی".

س.ز