کوردسانیێ ١٠١ ەمین ساڵیادوو پەیماننامەو لۆزانینە جەمێ بیێوە و پەیامشا کیانا: "ئی نکۆڵییە ١٠٠ ساڵییەما قبووڵ نەکەردەن و قبووڵش نمەکەرمێ". دژوو هجوومی ئەرەگیرکاریی دەوڵەتوو تورکی داواشا کەردە پەی گەورەکەردەی کۆشیای.
شاروو لۆزانوو سویسرایەنە، ١٠١ەمین ساڵیادوو پەیماننامەو لۆزانی بە ڕاپیمای و جەمۆبییەی شەرمەزار کریا، کوردسانیێ بە سەرمەشقایەتیی ٣٦ پێکئامایە سیاسییا دلێشانە یەنەکە و جمیەروو گۆڕانی و ئیدارەو وێڕاوەبەریی وەرنیشتی و کەجەدەکە-ئە و تەژەکە-ئە و پەیەدە و پیک مەیدانوو پیۆنێرێرسینە کوێ بیێوە و تا مەیدانوو چاتیاو دێ ئۆچی ڕاشا پیما، کە پەیاماننامەکەش دلێنە تاوتۆ کریا. بەشیو جە ڕیکوزیا و ئەرەمەرزیا سویسرییەکا و دۆساو کوردی پەشتگیرێ چالاکییەکەی بێنێ.
زوبەیدە زومروتە: قبووڵما نەکەرد، وە قبووڵش نمەکەرمۍ
دماو دەیەقێوە ڕێزگېرتەی هامسەرۆکەو کەجەدەکە-ئە زوبەیدە زومڕوتە سەرنجش وست سەرو تراژیدیاکاو پەیماننامەو لۆزانی سەرو گەلوو کوردی، حەرپاسە ئاماژەش پانەیە کەرد هجوومەکۍ ئیساتۍ دەوڵەتو ئەرەگیرکەرو تورکی پەی سەرو پانیشتوو کورڎەسانی بناغەکەش پەی پەیماننامەو لۆزانی گێڵۊوە، واتش: "ۋەرپەرسوو هەر کۆمکوژی و تاوانێوە کە ١٠٠ ساڵېن جە کورڎەسانەنە قۆمیۆ، ئانێنۍ کە پەیماننامەکەشا ئیمزاکەردەن. گۆشەگیری ئیمراڵی و هجوومەکۍ سەرو ۋەرنیشتیچ بەرەنجاموو ئی پەیماننامەینۍ. بە ئەرەکۊشای ئی پەیماننامەیە ماڕمۍ. ئی پەیماننامەما قبووڵ نەکەرد، وە قبووڵیچش نمەکەرمۍ".
ڕیل: پەنەوازا گلېرگەی مېیاننەتەوەیی ۋەرپرسیاریی هۊربگېرۆ
پەرلەمانتاری سویسری، لۆرانس فێلمان ڕیل ئاماژەش پانەیە کەرد کە دەوڵەتو تورکی ئارۆ جە قەرەباغ و ۋەرنیشت و پانیشت و سەرنیشتوو کورڎەسانی دژوو گەلا جەنگ مکەرۆ، ئاماژەش پانەیە کەرد هەچ کەس ئیمزاش چێروو پەیماننامەو لۆزانینە کەردەن، ۋەرپەرسا چی تراژیدیایا و پەنەوازا گلېرگەی مېیاننەتەوەیی دژوو تورکیای هەڵوێس برمانۆ.
"گۆشەگیری قبووڵ نمەکریۆ"
ڕیل سەرنجش وست سەرو گۆشەگیری ڕابەرو گەلوو کوردی عەبدوڵا ئۆجالانی، واتش: "ئی هەلومەرجەو گۆشەگیری سەرو عەبدوڵا ئۆجالانی قبووڵ نمەکریۆ. مشۆم ئی هەلومەرجۍ پېسە ئەشکەنجەی تەماشە بکریا. چی دماییانە، ٦٩ براوۍ خەڵاتوو نۆبڵی بە ئەرەیاۋنێوە داواو ئازاڎیی عەبدوڵا ئۆجالانیشا کەرد. ئاڎیچۍ واتشا چارەسەر بە ئاشتی و دیالۆگ مېنە دی. مشۊم گلېرگەی مېیاننەتەوەیی چی ئاستەنە ۋەرپرسیاری ۋێش جابەجێ بکەرۆ".
"ئینایمۍ چنی ئەرەکۆشای شمەی"
دماتەر ئەڼامو مەجلیسوو شارەوانی لۆزانی دەیڤید پایۆت و جمیەرو ژەنا سویسرای ماریۆن نۆڤێتە قسېشا کەردۍ، سەرنجشا وست سەرو کارەساتەکاو لۆزانی و پەشتگیری ۋێشا پەی ئەرەکۊشای ئازاڎیی بەربڕی.
فواد عومەر: دمایی پی شەرمەزارییە سەڎ ساڵییە باردێنە
دماتەر بەنامۍ پەیەدەیۆ فواد عومەر واتش: "ئێمە لۆزانما قبووڵ نەکەرد، وە قبووڵیچش نمەکەرمۍ". سەرنجش وست سەرو ۋەرپرسیاری هێزە مېیاننەتەوەییەکا جە جەنگ و کۆمکوژی سەرو کوردا و واتش: "دمایی پی شەرمەزارییە سەڎ ساڵییەیتا باردۍ".
دماتەر هەزاران کورڎەسانیۍ بەرەو مېڎانوو چاتیاو دێ ئۆچی ڕاپیمایشا کەرد کە پەیاماننامەکەش چنە تاوتوێ کریا. چا گلېرۆبیەیۍ کریا.
ئایدار: ئا سنوورا سەڕمېوە کە پەی ئێمە کیشیێنۍ
ئەڼامو کۆنسەو ڕاوەبەری کەجەکەی، زوبەیر ئایدار ئەرەیاۋناش کەجەکە پەی چوار پارچەو کورڎەسانی ئەرەکۊشۆ، واتش: " ئا سنوورا سەڕمېوە کە پەی ئێمە کیشیێنۍ، پەیماننامەو لۆزانی قبووڵ نمەکەرمۍ. تا ئەسڕیەیۆ ئی سنوورە کیشیایا، ئەرەکۊشایما بەردەوام مبۆ".
حەرپاسە ئایدار سەرنجش وست سەرو گۆشەگیری ئیمراڵی و داواش کەردە گرڎ کەسۍ خاوەنداری جە هەڵمەتەو ئازاڎیی بکەرۆ، حەرپاسە سەرنجش وست سەرو هجووم و ئەرەگیری دەوڵەتو تورکی پەی سەرو پانیشتوو کورڎەسانی، واتش: "جەنگەوانەکۍ ئازاڎیما مڎرامانێوە گۊرە مکەرا، گەریلاکېما تەماموو کورڎەسانی پارێزنا. تەماموو کورڎەسانی ئینا چێروو تەرسێنە. پۊکەی مشۊم ئێمە پاڵ و جەنگەوانە قارەمانەکامانە بمردمۍ کە مڎرامان مکەرا، وە پەشگیری جە مڎرامانەکەیشا بکەرمۍ".
"ئەرەکۊشای هامبەش دژوو ئەرەگیری ئەنجام بڎەیمۍ"
بەنامۍ چڼین لایەنا سیاسی چانیشا نوێنەراو یەنەکەی و جمیەروو فاڕیایۆ قسۍ کریۍ. قسەکەرا تەئکیدشا کەردۆ کە پەیماننامەو لۆزانی قبووڵ نمەکەرا و داواشا جە گرڎ لېوە کەرد، دژوو هجوومە ئەرەگیریەکا دەوڵەتو تورکی ئەرەکۊشای هامبەش ئەنجام بڎا".
چالاکییەکە بە بەرزکەردەیۆ درووشما دمایش پنە ئاما.
