کەژار وەراوەروو زیادبییەی زارۆڵەکرێکارا و ئەشکەنجەدایشا کوردسانەنە و سەرانسەروو ئێرانینە کاردایۆش نیشانە دا و ئینەش بە نیشانێ لاوازیی یاواینەی و کولتووری و سیاسەتی غەڵەتوو حکومەتی نامێنیا، داواو شۆنیرەلوای جیددیش پەی کەرد.
گلێرگەو ژەنە ئازاداو وەرکەتوو کوردسانی (کەژار) ئەرەیاوناێوەنە سەبارەت بە زیادبییەی ژمارەو زارۆڵە کرێکارا و ئەشکەنجەدایشا ئەرەیاوناش:" ئانە نیشانێ لاوازیی کولتووری و هاموەخت سیاسەتی غەڵەتوو وحکوومەتوو ئێرانین. ئاماژەش بە ڕووەدای تندوتیژی و عەزیەتدای زارۆلاو کوردی کەرد مەریوانەنە و جەختش کەردۆ ئانە مەریوانەنە ڕووەش دا، تەنیا بەشیوا چا تندوتیژییە و هەژارەییە سیستماتیکییە، کە ملوو گلێرگەو ئێرانیرە سەپیان و هەوڵی ئانەیە مدا نەوەی تازەی بچەوسناوە".
ئەرەیاونایەکەو کەژاری پێسنەنە:
"بەرزبییەیوەی ژمارەو زارۆڵە هەرمانکەرا و کەردەی تندوتیژیی وەراوەرشاوە نیشانێ سیاسەتی غەڵەتوو کۆماری ئیسلامیی ئێرانییا.
ماوەو یەرە ڕۆی وەڵینینە هەوڵوو چەوسنایوەی و تندوتیژی دژوو زاروڵا دلێشانە زارۆڵێ هەرمانکەرێ، بە شیوەی وەرفراوان ئی جارە مەریوانەنە دەنگش ئاما، ئا زارۆڵێ بە نرخەو گیانیشا نان پەیدا مکەرا و بە نرخیوی فرە کەم گرد چێوێوی ژیوایشا مبەخشا.
هەرپاسە ناچار بە هەرمانکەردەی زارۆلا تا چە ڕاددێوی کاریگەرییش سەروو ڕۆح و جەستەیشا هەن،پەوکای پەنەوازا ئەوەکۆڵیای بنچینەیی پەی ئی قۆرتەیە بکەرمێ، کە سیستمی گەندەڵ پەی وەڵابییەیۆ دۆخێوی چینەش وەش کەردەن.
ئا قوربانییە گولانێ، کە بەدرێژایی شەووڕۆی خەریکێب هەرماێ قورسێنێ، تا بتاوا ئازاریوە جە ئازارەکاو بنەیاکاشا کەمە بکەراوە، ئیسەتێ بیێنێ بە ئازارێوە تەرە پەی گلێرگەی. لاێوە تەرۆ بەرزبییەیوەی فرەو ژمارەو زارۆڵە هەرمانکەراوەرکەوتووکوردستانینە و ئێرانەنە هاموەختا چەنی پەرەسانای بێهەرمانی دلێ چینەکاو گلێرگەینە، کە بەداخۆ دەرەنجامی فرە وێڕانکەرش چۆوە مگنۆوە. بەکارئاردەی زارٶلا پەی کەمکەردەیوەی هەژاری، ڕاسیینە بە ماناو لاوازیی یاواینەی و کولتووری و هەمان وەختەنە سیاسەتی غەڵەتوو حکومەتین کە نمەتاوۆ فرسەتی گونجیا پەی گەشەو زارۆڵا دابین بکەرۆ.
ئانە کە ڕۆشن و ئاشکران تندوتیژیی سیستماتیکی دەوڵەتی پیاسالارین و سەرمایەداری و چەوسنەرا،کە لاو یاسێو پارێزنیان. لاو ئادیشاوە ئینسان تەنیا ئامرازێوا و تندوتیژیشا لاوە ڕەوان!
هەژاری سیستماتیک بەرز بییەنۆ و ژەنی و زارۆڵێ پێسەو هەرمانکەرێوە هەرزانی زیاەتر جە گردوو چینەکا ڕەنج مکێشانە.
ئانە کە ماوەو یەرە ڕۆی وەڵینینە شاروو مەریوانینە ڕووەش دا، ڕاسینە تاوانا و هەم خیانەتێوا وەراوەروو ئیساتێ و ئایندەو ئا زارۆڵاوە مکریۆ و جیاکرایی سیستموو پەروەردەی و تندوتیژیی بنەیانەیی و زەرەرە کۆمەڵایەتییەکێش ناچارێشا مکەرۆ هەرمانە بکەرا و لاێوە تەریچۆ سەرڕاو ئانەیە کە زارۆڵەییوە جە گرد چێوێوی بێبەشێ کریێنێ، ژیوایشا ئینا خەتەرەنە. جیاتیی چارەسەرکەردەی قۆرتەکا، حکومەت بەتەمامی قۆرتەکیش وستێنێ پەشتەو گۆشا و پاسە ڕەوایەتییش دان بە تندوتیژیی ساعێب هەرمانەکا. بەرکەوتەن کە ساعیب هەرمانی مەریوانی سەرەڕاو تندوتیژی وەراوەروو هەر یەرە شاگردەکاش تووشوو تاوانێوی قرسی بییەن بەڵام سزا نەدریان! ئینەیچ ڕێک بە ماناو هەماهەنگیی ڕژێمی و سیستموو سەرمایەداری و قازانجین. مشۆم ئانەیچە وەرەچەم بگێریۆ ئانە کە مەریوانەنە ڕووەش دا، بەشێوا چا تندوتیژی و هەژارییە سیستماتیکییە کە سەروو گلێرگەی ئێرانیرە سەپیان و هەوڵێ مدریا ئیرادەو نەوەی تازەیچ بماڕا و باراشآ چۆکێرە.
وەروو ئانەیە بارودۆخوو زارۆڵا و ئایندەشا بەردەوام یۆن جە نیگەرانییەکاو کەژاری، یانێ بەجیددی کاردایوە نیشانە مدەیمێ و سەرەڕاو شەرمەزارکەردەی هەرمانە تندوتیژییەکا، هەوڵی مدەیمێ زارۆڵا جە هەرمانە بەزۆرا نەجات بدەیمێ و ئانەیچ بە بەشیوە جە کۆشیای وێما مزانمێ و داوا جە چالاکا مکەرمێ، کە بەجیددی بلا شۆنەو ئی بابەتارە، چونکوم بارودۆخوو ئیساتێ زارۆڵا کاریگەریێوی وەرفراوانش سەروو دماتەروو گلێرگەی هەن."
