بەپاو ئامارە ڕسمیەکا، پارتی دەسەڵاتدار جە هۊرچنیەکا ڤەنزوێلاینە بە ٥١.٢٠٪و دەنگەکا سەرکۊتەیش بەدەسئارد. بەڵام باس چانەیە کریان کە ئەنجامو سنوقەکا و پەرسوو جوەکا چنی یۆی ناکۆکېنۍ. ئەمریکا داواو واوەی ئەژمارایۆ دەنگەکاش کەرد.
ئەنجوومەنو نیشتمانیی هۊرچنیەکا ڕۊو یەکشەممەی ئەرەیاۋناش کە نیکۆلاس مادۆرۆ سەڎەنە ٥١.٢٠و دەنگەکاش بەدەسئاردێنۍ و پەی خولی یەرەمی پېسە سەرۆکو ڤەنزوێلای هۊرچنیانۆ.
نیکۆلاس مادۆرۆ، سەردارو ڤەنزوێلای شەوەو دووەشەممەی ئەرەیاۋناش، واوەی هۊرچنیەیشۆ پەی سەرکۊتەی ئاشتی و سەقامگیری بیەن. مادۆرۆ سەبارەت بە ئامارەکا، ئەرەیاۋناش، سیستەمو هۊرچنیەی جە ڤەنزوێلانە ڕۊشنا و هیچ گرفتێوەش نیا چنە.
ئا ئەنجامۍ کە جە لایەنو ئەنجومەنو نیشتیمانی هۊرچنیەکاوە ئەرەیاۋیێنۍ، پێچەوانەو فرەو پەرس و جوەکان کە سەرکۊتەی ئێدمۆندۆ گۆنزالێزی کاندیدو ئۆپۆزسیۆنی نیشانە مڎا.
ئەمریکا داواش کەردێنە ئەژمارایۆ دەنگەکا بەشێوێوە دادپەروەرانە و شەفاف ئەنجام بڎریۆ.
