مەسعود پزیشکیان پېسە سەرۆککۊمارو ئێرانی هۊرچنیا
جە گەڕی دوەم و خولی چواردەهەمین هۊرچنیەو سەرۆکایەتی کۊمارو ئێرانینە، مەسعود پزیشکیان کاندیدو ڕیفۆرمخوازا تاواش بە جیاوازی ٣ ملیۆن دەنگا سەرو سەعید جەلیلی کاندیدو بنەماوازارە سەرگنۊ.
وەزارەتوو دلېینەو ئێرانی دماو جیاکەردەیۆ دەنگەکا ئەرەیاۋناش، ٣٠ ملیۆنۍ و ٥٣٠ هەزارۍ و ١٥٧ کەسۍ بەشداریشا جە دەنگداینە کەردەن، کە ئینەیچ مکەرۆنە رێژەو ٤٩.٨٪و ئا کەسا کە مافوو دەنگدایشا بیەن.
ئاماژەش پانەیچ کەردەن، جە کۆو دەنگەکانە مەسعود پزیشکیا تاوانش ١٦ ملیۆنۍ و ٣٨٤ هەزارۍ و ٤٠٣ دەنگۍ بەدەس بارۆنە و سەعید جەلیلیچ ١٣ ملیۆنۍ و ٥٣٨ هەزارۍ و ١٧٩ دەنگېش بەدەسئاوردێنۍ.
جە گەڕی یوەمەنە رێژەو بەشداری جە دەنگدای کەمتەر جە سەڎەنە ٤٠ بۍ، حەرپاسە بە پاو ئامارە ڕسمیەکا ئا مەنتیقۍ پێکئامایە نەتەوەیی و ئایینیەکێش چنە مژیوا، فرەتەرین دەنگشا بە پزیشکیان دابۍ، دلۍ مېیانوو ئێرانیچنە کە فرەیی ئەرەنیشتاش فارسێنۍ دەنگشا بە کاندیدوو بنەماواازا دابۍ.
بەشێوو فرەو ئۆپۆزسیۆنی و چالاکا سیاسی و مەدەنی هۊرچنیەی سەرۆککۆمارو ئێرانیشا بایکۆت کەردەبۍ، ئینەیچ بی بە بایسوو ئانەی کە بەشداری کەم بۆ چا هۊرچنیەینە.
چالاکا قەناعەتشا چامنەنە کە ئا رێژەی جە بارەو بەشداریکەردەی جە هۊرچنیەینە ئەرەیاۋییان، فرە کەمتەرا چا رێژە حەقەتینەو بەشداری.
