٢٤٧ ڕوۍ سەرو بڕفانای ڕۆنامەنوویس، سلێمان ئەحمەڎیرە جە لایەنوو چەکڎارا پەدەکەیۆ بە ئەمرەو میتی تورکی ۋییەرۆنە، قەرار پاسەن کە ٣٠ی ئی مانگۍ بە تۆمەتەی ناڕەوا دادگایی بکریۆ و پرۆسەکەیچ سەرنجوو رای گرڎی دلېینەی و بەریش سەرا.
سلێمان ئەحمەڎ خەڵکوو جندرێسین سەر بە عەفرینی ئەرەگیرکریای و ئەزموونوو چڼین ساڵا کاری ڕۆنامەنوویسیش هەن جە هەمان کاتەنە هەواڵسازو بەشوو عەرەبی ئاژانسوو هەواڵوو ڕۆژنیوزین، پېسە ڕۆنامەنووسێوە ئشناسیای جە نزیکۆ شۊنیرە لوایش پەی پێشئامایەکا ۋەرکەوتوو دلېڕاسەی کەردەن و پابەڼ بیەن بە بنەماکاو ڕۆنامەوانی.
سلێمان ئەحمەڎ ٥ ساڵۍ هەواڵسازوو بەشوو عەرەبی رۆژنیوزی بۍ، جە ١و تشرینی یووەم و ٢٠٢٣ ێنە بەسەردای لووابێوە پەی لاو بنەیانەکەیش جە حەڵەب. جە ٢٥ و تشرینوو یووەم و ٢٠٢٣ وەختۍ جە ۋەرنیشتۆ گێڵێوە پەی پانیشتوو کوردسانی جە دەروازە سنووری پیشخابورینە جە تەرەفوو هێزەکاو پەدەکەیۆ بڕفانیا.
ڕۆژنیوز ئاژانسێوە هەواڵییا و بە زۋانەکا کوردی (سۆرانی، کرمانجی)، تورکی و عەرەبی جە چوارچێوەو هێڵەو ئازاڎیی، وڵاتپارێزنیی، ژەنی و ژیۋگەینە هەرمانەو وێش مکەرۆ، ناوەندەکەش ئینا شارو سلێمانینە جە پانیشتوو کورڎەسانی.
پرۆسەو بڕفانای و تۆمەتبارکەردەی سلێمان ئەحمەڎیی
دماو ۋییەردەی شش ڕووا سەروو بۍ سەروو شۊنبیەی سلێمان ئەحمەڎیرە، ئاسایشوو پەدەکەی جە دهۆک ئەرەیاۋنێوە پەڕ جە بانگەشە و تۆمەتی بێ بنەما و دوور جە راسیش وەڵاکەردۆ و بانگەشەو ئانەیش کەرد کە سلێمان ئەحمەڎ پەیوەندیش بە هەرمانەو رۆنامەوانیوە نییا. جە ئەرەیاۋناکەینە دڎانش پانەیرە نیا کە سلێمان ئەحمەڎشا بڕفانان و هەڕەشۍ سزادایش کەردە.
ئینە جە کاتێوەنە، جە حیچ بەند و ماددێوە یاساکاو عێراقینە ئەندامبیەی جە پارتوو کرێکارا کورڎەسانی یان هەر پارت و لایەنێوەتەرینە تاوانە نییەنە، ئینەیچ ئانەی بەر وزۆ کە دەسبەسەرکەردەکەو ئا ڕۆنامەنوویسەیە بە تەمامی سیاسییا و بە ڕانمایی میتی تورکی کریان.
سلێمان ئەحمەڎ جە ماوەو هەشت مانگا گێرتەیشەنە تەنیا جارێوەیچ ڕاش پنە نەڎریان بنەیانەکەیش بوینۆ، تەنیا یەکجار چنی بنەیانەکەیش بە تەلەفۆن پەی ماوەو دووۍ دەیەقا قسێش کەردێنۍ. تاکو ئیساتۍ جە گرڎوو مافەکا یاساو زیڼانی و مرۆڤایەتی بێبەشکریان. دماو هەشت مانگا تەنیا جارێوە دەرفەتوو ئانەیش پەی ڕەخسیا کە چنی پارێزنەرەکەیش کۆ بۆوە. ئینەیچ بە پێچەوانەو یاسا میان دەوڵەتییەکا مافوو مرۆڤی و بنەماکاو ڕۆنامەوانی منریۆرە.
دەوروو سلێمان ئەحمەڎی جە مڎرامانوو دژ بە داعشینە
سلێمان ئەحمەڎ جە وەختوو هرووژموو داعشی پەی سەرو ۋەرنیشتی و پانیشتوو کورڎەسانی دەسش بە کاری ڕۆنامەوانی کەرڎ و چا کاتەیچنە دەورێوە عالش بۍ جە ڕووماڵی کەردەی مڎرامانوو هێزە کوردییەکا دژوو داعشی. جە کاتوو ڕووماڵی جەنگوو داعشینە چڼین جارۍ ژیۋایش گنۆنە مەترسییوە، جە کاتوو جەنگوو داعشینە بێ جیاوازیی و باکگراوندێوە سیاسیی کاری ڕۆنامەوانی ۋێش کەرد، چا ڕوانگۆ خزمەتێوە فرە مکەرۆ چڼین بەرهەمۍ ئێش و مەینەتییەکا گەلوو کوردی و ڕاسی ڕووەدایەکا میاونۆ بە ڕای گرڎینی ناوچەکەی و جیهانیچ.
پرۆسەی یاسایی و دادگاییکەردەیۍ چەمەڕاکریای
تا ئیساتۍ یەکجار ڕا بە سلێمان ئەحمەڎیی دریان پارێزنەرەکەیش بوینۆ، چا ڕێوە زانیا کە قەرارا ٣٠ـی حوزێرانی ڕۆو دادگاییکەردەی سلێمان ئەحمەڎین، هەرچنە سلێمان ئەحمەڎ بەبێ تاوانی و بە مادەو (١)ی جە یاساو ژمارە ٢١و ساڵەو ٢٠٠٣ۍ پەرلەمانوو هەرێموو کورڎەسانی دەسبەسەرکریان و دادگای مکریۆ، ڕای گرڎیی داواو دەموودەس ئازاڎ کەردەیش مکەرا و ڕێکوزیا میان دەوڵەتییەکاو مافو مرۆڤیچ جە نزیکۆ شۊنیرە لوای پەی ئی پرۆسەیە مکەرۆ و داوا جە پەدەکەی مکەرا ڕێز جە ئازاڎیی ڕۆنامەوانی بگێرۆ و گرڎوو ڕۆنامەنوویسا بێ تاوانی کە سەرو کاری ڕۆنامەوانی گیریێنۍ ئازاڎۍ بکریا.
نرخنای جە ڕوو ڕۆنامەوانی و مافوو مرۆڤیوە
گێرتەی سلێمان ئەحمەڎیی جە ڕوو ئازاڎیی ڕۆنامەوانی و مافەکا مرۆڤیوە بە پاشێلکاریێوە گەورە منریۆرە. تواناو ڕۆنامەنوویسا پەی کارکەردەی بە ئازاڎیی فرە گرنگا پەی ئانەی گلێرگەکۍ دەسشا بە زانیاریی ڕاسی بیاوۆ. ئاژەو سلێمان ئەحمەڎیچ ڕەنگوەدای ئا ئاڵنگارییەینە کە نەک تەنیا تاک بەڵکم ڕۆنامەنوویسا بە گرڎی ڕووبەڕووش باوە کە پەدەکە بەنامۍ حکومەتوو هەرێموو کورڎەسانیۆ ڕۆنامەنوویسا گێرۆنە و پەی سلێمان ئەحمەڎی و ڕۆنامەنوویسا تەریچ تۆمەتەو سیخوڕیی و تێکدای ئاسایشی نیشتمانی مڎۊنە پاڵشا، بە ئەنقەس چالاکییە پیشەییەکا ڕۆنامەنوویسا شێونۆنە.
ئەنجام و چەمەڕاییەکۍ
چنی نزیکبیەیۆ دادگاییکەردەی سلێمان ئەحمەڎیی کە قەرارا جە ٣٠ـی ئی مانگېنە بلۆڕاوە، سەرنجی گرڎینوو دلێینەی و میان دەوڵەتی سەرو ئی دادگاییە چڕ مبۆوە. داوا مکریۆ کە جە چوارچێوەو یاساکا ڕۆنامەنوویسینە جە هەرێموو کورڎەسانی پرۆسەو دادگاییکەردەیۍ دادپەروەرانەی ئەنجام بڎریۆ و سلێمان ئەحمەڎیچ ئازاڎ بکریۆ. ئی ڕووەدایە جارێوەتەر ئانەما پەی بەر وزۆ کە پەرسوو ئازاڎیی ڕۆنامەوانی و مافوو مرۆڤی جە مەنتیقەکەنە پەنەوازا جە ڕوانگېوە فراوانتەرۆ هۊربسەنگیۆ.
