سەبارەت بە ئەڕفای و دماتەر سەپنای سزاو یەرۍ ساڵا زیڼانی سەرو رۆنامەنوویس سلێمان ئەحمەدیرە، رۆنامەنوویسا گەرمیانی ئەرەیاۋناشا، " سنورو پەدەکەینە تۆمەتەی ناڕەوا پەی کەسا ئازاڎیواز و ڕۆنامەنوویسا ئازاڎیی وەش مکریۆ."
ڕۆنامەنوویس و هەواڵسازو بەشو عەرەبی ئاژانسوو ڕۆژنیوزی، سڵێمان ئەحمەد جە ۋەرنیشتوو کورڎەسانی مگێڵۆوە جە دەروازەو فیشخابوری جە لایەنو ئاسایشو پەدەکەیۆ بڕفانیۆ و ماوەو ٢٨٦ ڕووان ئینا زیڼانو ئاسایشوو دهۆکینە و جە ٢٩و تەمووزو ئێساڵینە سزاو یەرۍ ساڵا زیڼانیش سەرەرە سەپیان. چا بارۆ هەر یۆ جە ڕۆنامەنوویسا؛ زمناکۆ یەحیایی و شاهۆ ئیبراهیم پەی ئاژانسوو هەواڵوو فوراتی (ANF)ی قسێشا کەردە.
' بەمەڵامەتوو نەبیەی ئازاڎیی جە سنوورو پەدەکەینە ڕۆنامەنوویسۍ بڕەما '
ڕۆنامەنوویس زمناکۆ یەحیایی ئاماژەش پانەیە کەرد کە ڕۆنامەنووسا سنورو پەدەکەی بەمەڵامەتوو نەبیەی ئازاڎییوە ماواو ۋێشا جیا مازا و مەیا پەی شارەکا تەری و واتش: "ڕۆنامەنوویسا سنوورو بادینانی، هەولێری و دهۆکی بەمەڵامەتوو ۋەرتەسکبیەیۆ هەرمانەو ڕۆنامەوانی و نەبیەی ئازاڎیی چا سنوورانە و سەرەڕاو ئانەیچ جە دادگاکا پەدەکەینە تۆمەتەی ناڕەوا و نا جۆرەشا پەی وەش مکریۆ. هەرپۊکەی فرێوە جە ڕۆنامەنوویسا ئا سنورا مەنتیقەکا ۋێشا جیا مازا و ڕووە مکەرا سلێمانی."
' سنوورو پەدەکەینە ئانۍ ویروڕای جیاشا هەن ڕووبەڕوو دادگای مکریاوە '
حەرپاسە ڕۆنامەنوویس شاهۆ ئیبراهیم باسش چانەیە کەرد کە جە سنوورەکا پەدەکەینە تۆمەتەی ناڕەوا و ناجۆرە پەی ڕۆنامەنوویسا وەش مکریۆ پی جۆرە بەردەوام بۍ: "تا ئیساتێچ نمەزانوو سڵێمان ئەحمەد سەرو چێشی گیریان، داخەم نمەشۆ چا سنورانە کە پەدەکە دەسەڵاتش ئینا دەسۆ سیناریۆ وەشکەردەی فرە ئاسانا هەرکەسێوە ویروڕای جیاش بۆ سیناریۆش پەی وەش مکەرا ڕەوانەو دادگایش مکەرا و دادگاکۍ وایچ سەربەخوۍ نیەنۍ و قەرارەکێشا سیاسیێنۍ."
جە دما دماینە واتش: "جە سەرەتاوە تا ئیساتۍ ئاگاڎارو گێرتەی سڵێمان ئەحمەدین بەڵام هەڵای نەزانانما کە سەرو چێشی گیریان. ۋەردەموو گلېرگەی مېیان دەوڵەتینە ئی هەرێمە وزیۆنە چېرو پرسیارێوە، ئاڎۍ پېسە سیناریۆو حیزبێوە تەماشەش نمەکەرا تەماشەو وێنە گۊرەکەی مکەرا کە هەرێموو کورڎەسانیا."
