ناوەڼەکۍ سەرهۊرداو ژەنی، ژیۋای، ئازاڎی کەمتەرین ڕېژەو دەنگدایشا چنە تۊمارکریا
چا پارێزگایا ۋەرکۆتو کورڎەسانی و ئێرانی، کە ناوەڼ و چەقوو ۋێنیشاندایەکا سەرهۊرداو ژەنی، ژیۋای، ئازاڎی بېنۍ، کەمتەرین ڕېژەو دەنگدای تۊمارکریان.
ڕۊو جومعەی خولی چواردەهەمین هۊرچنیەو سەرۆکایەتی کۆماروو ئیسلامی ئێرانی لواڕاوە، بە پاو ئامارە ڕسمیەکا رێژەو بەشداری چا هۊرچنیەینە کەمتەر جە سەڎەنە ٤٠ بیەن و بەمەڵامەتوو ئانەی حیچ کام جە کاندیدەکا نەتاوابێشا فرەینەو پێویستی دەنگەکا بەدەسبارا پرۆسەکە کەوتەن ٥و تەمووزی.
خاڵۍ کە یاگۍ سەرنجینە کەمی بەشداریین جە دەنگدای چا پاڕێزگایانە کە چەقوو سەرهۊردای ژەنی، ژیۋای، ئازاڎیی بێنۍ.
جە ئامارە ڕسمیەکانە ئامان، پارێزگاو سنەی جە ۋەرکۊتوو کورڎەسانی رێژەو بەشداری چنەشەنە سەڎەنە ٢٣ بیەن، ئینەیچ سەرو ئاستوو ئێرانی کەمتەرین رێژەو بەشداری بیەن، بە هەمان شێوە جە پاڕێزگاو کرماشانیچ رێژەو بەشداری سەڎەنە ٣٢ بیەن.
ئینەیچ جە وەختێنە کە جە هۊرچنیەو ساڵەو ٢٠٢١ ینە جە سنەنە رێژەو بەشداری سەڎەنە ٣٧ و جە کرماشانیچنە سەڎەنە ٤٦ بۍ.
هەرچی پارێزگاکۍ سیستان و بەلوچستانیچەنۍ کە ساڵەو ٢٠٢١ رێژەو بەشداری جە هۊرچنیەکانە چا پارێزگایانە سەڎەنە ٦٢ بۍ، بە مەڵامەتوو ئانەی کە جە ساڵەو ٢٠٢٢ێنە بی بە ناوەندێوە سەرهۊردای ژەنی، ژیۋای، ئازاڎیی، ئێساڵ رێژەو بەشداری هۊرچنیەی چا پارێزگایانە پەی سەڎەنە ٣٠ کەمشکەردەن.
پارێزگاو گیلانیچ جە سەرنیشتوو ئێرانی کە بە هەمان شێوە یۆبۍ جە ناوەڼەکا سەرهۊردای ژەنی، ژیۋای، ئازاڎیی، رێژەو بەشداری چنەشەنە سەڎەنە ٣ بۍ، ئینەیچ جە کاتێنە کە یەرۍ ساڵۍ چێوەڵتەروو جە هۊرچنیەو سەرۆکایەتی کۆمارینە رێژەکە سەڎەنە ٥٧ بۍ.
بەهەمان شێوە جە پارێزگاو گوڵستانیچ کە ساڵەو ٢٠٢١ رێژەو بەسداری جە هۊرچنیەینە سەڎەنە ٦١ بۍ، ئێساڵ رێژەکە پەی سەڎەنە ٣٦ ی وەستەنەرە.
جە خوزستانیچ رێژەو بەشداری جە هۊرچنیەو ساڵەو ٢٠٢١ ینە سەڎەنە ٥٠ بۍ، چی هۊرچنیەو ڕۊو جومعەینە ٢٨و حوزێرانی لواڕاوە رێژەکە پەی سەڎەنە ٢٩ ی کەمش کەردەن.
شارو تارانیچنە جگە جە قەزا و ناحیەکاو دەوروبەریش رێژەو بەشداری جە هۊرچنیەینە سەڎەنە ٢٣ بیەن، ئا رێژەیچە سەڎەنە ٣ کەمتەرا جە رێژەو بەشداری جە هۊرچنیەکەو ساڵەو ٢٠٢١ی
