چوارچوەو ٥٦ەمین ئەرەنیشتەی مافەکاو ئینسانوو ئەنجوومەنوو مافەکاو ئینسانوو نەتەوە یۆگێرتەکانە جنێف، بە سەرمەشقایەتیی جمیەروو دۆستایەتیی بەینوو گەلانە دژوو ڕەگەزپەرستی (مراپ) بە ناموونیشانوو "مافەکاو ئینسانی تورکیانە" کۆنفرانسێوە بەسیا.  

کۆنفرانسەکەنە حەریۆ جە ئیبراهیم بیلمەزی پارێزنەروو نویسگەی یاسایی سەدەی، پەلەمانتاروو پەرلەمانوو ئەوروپای لاورا کاستەل و سیاسەتمەداروو کوردی فرات ئانلی بەشدارێ بێنێ.

کۆنفرانسەکەنە گۆشەگیریی سەختوو سەروو ڕابەروو گەلوو کوردی عەبدوڵا ئۆجالانی و هەرمانە نایاسایییەکاو دەوڵەتوو تورکی کە کوردستانەنە مکەرۆش قسەوباسش بارەوە کریا.

نوێنەروو مراپوو نەتەوە یۆگێرتەکا جیانفرانسۆ فاتۆرینی کۆنفرانسەکەش بەرد ڕاوە، ئەوەڵنە پارلەمانتار لاورا کاستەل فۆرت قسێش کەردێ، قسەکاشنە سەرەنجەش وستە سەروو گۆشەگیریی سەختوو سەروو ڕابەروو گەلوو کوردی عەبدوڵا ئۆجالانی و واتش: "ئۆجالان پەی ملوێنا کوردا پێسەو سەرکردەی موینیۆ و کارەکتەری گرنگوو پرۆسەو چارەسەریین تورکیانە. ماوەو ٢٥ ساڵان ئینا زیندانەنە و ٤٠ مانگێن هیچ زانیاریێوەش بارەوە نییەن. ئی گۆشەگیرییە بە ماناو ڕاگێریکەردەی چارەسەری مێ تورکیانە، هەمان وەختەنە گۆشەگیری پێسەو مۆدێلێوە زیندانەکانە مبریۆ ڕاوە."

'پەنەوازا نەتەوە یۆگێرتەکانە هەنگامەی پێویسە بنریۆ'

لاورا کاستەل فۆرت بانگەوازش وەنەو نەتەوەیۆگێرتەکا کەردە، دژوو نایاساییەکا تورکیانە هەنگامەی پێویسە بنیۆ و واتش: "پێویسا نەتەوە یۆگێرتەکێ دژوو نایاساییەکا تورکیانە و بەتایبەت دەربارەو گۆشەگیریی ئیمراڵی هەرمانە و هەڵویست برمانۆ."

پارێزنەر بیلمەز: هیچ یاساێوە ئیمراڵیینە نییەن

پارێزنەروو نویسگەی یاسایی سەدە ئیبراهیم بیلمەز لە کۆنفرانسەکەنە ئاماژەش دا بە لایەنی سیاسیی گۆشەگیریی ئیمراڵی، ئانەش دەسنیشان کەرد بنەڕەتوو قەیرانەکاو تورکیای، جەختکەردەیۆن جە ناچارەسەری پەرسەو کوردی.

بیلمەز بانگەوازش وەنەو ئەنجوومەنوو مافەکاو ئینسانوو نەتەوەیۆگێرتەکا و ئەرەمەرزیا وەرپەرسەکا  کەرد وەراوەروو نایاساییەکانە، کە ئیمراڵیینە مکریۆ هەنگامەی پەنەوازە بنریۆ.  

فرات ئانلی: مافە بەدەسئامێکێ ئینێ چێروو هەڕەشەو هجوومانە

سیاسەتمەداروو کوردی فرات ئانلی باسوو ئانەیش کەرد، کە دەوڵەتوو تورکی کوردسانەنە هجوومی ئەرەگیرکاری مکەرۆ و هجووم مکەرۆ سەروو بەها بەدەسئامایەکاو گەلوو کوردی.

درێژەو قسەکاشنە فرات سەرنجەش وستە سەروو هجوومەکاو دەوڵەتوو تورکی سەروو هەرێمەکاو پارێزنای مەدیای و وەرنیشتوو کوردستانی و واتش: "مەیلوو ئی هجووما دلێنەبەردەی مافەکاو گەلوو کوردین."

دماو جوابوو پەرسەکا، کۆنفرانسەکە دماییش ئاما.

ئەرەنیشتەی ٥٦ەمینوو مافەکاو ئینسانوو ئەنجومەنوو مافەکاو ئینسانوو نەتەوەیۆگێرتەکانە ١٨و حوزەیرانیوە دەسش پەنە کەردەن و تا ١٢و تەمووزی بەردەوام مبۆ.