دەوڵەتو فاشیستی تورکیای گرڎ هەوڵۍ مڎۆ تا هەرێموو پانیشتوو کورڎةسانی ئەرەگیر بکەرۆ، ئی ڕژێمە جە ئەرەگیریەکاش جە ۋەرنیشت و سیاسەتوو کۆمکوژیی کورڎی جە پانیشتوو کورڎەسانینە بەردەواما، بەڵام ئاخۆ مەراموو ڕژێمو تورکیای چی هرووژمە فراوانەو سەرو پانیشتوو کورڎەسانی و ئێراقینە چێشا؟ ئاشکران ئێرو ئا جەنگە فراوانەی ناوچەکە و جیهانش گێرتەنەرە، نەخشەو ژیۆپۆلۆتیکی فاڕۆ و شێوە و ڕەنگێوە تازە نەخشنۆوە، ڕژێمو فاشیستی تورکیای گەرەکشا فرەتەرین قازانج چی جەنگەنە چنۆوە و ۋێش بکەرۆ بە تەرەفێوە قەوەت و هەژموونگەرێوە هەرێمیی. ڕژێمو تورکیای بە بژاردەو پڕۆژەو (ڕاو گەشە)ی و ئا ڕێڕەوە بازرگانییەی قەرارا جە ئەورووپا و تورکیا و موسڵ و بەسڕە و خەلیج و قەتەر و ئیمارات و هیندەرە وییەرۆ، حەرپاسە پڕۆژەو (لاجورد) کە ڕێڕەوی بازرگانی بەینوو ئەفغانستانی و تورکمانستانی و بەحرو خەزەری و ئازەربایجانی و گورجستانی و تورکیاین، حەرپاسە ڕاڕەوو (زەنگزوور)ی جە قەوقاسیا، هەوڵ مڎۆ ئا ڕێڕەوە بازرگانییۍ کە ئێران هەوڵ مڎۆ وەششا بکەرۆ، تێكشا بڎۆ، گەر تورکیا بتاوۆ ئی کاریە بکەرۆ، ئێران گۆشەگیر مکریۆ و ڕووبە ڕوو خنیکیایۍ خرابی ژیۆپۆلەتیک مبۆوە، تورکیا هەوڵ مڎۆ ۋێش بکەرۆ بە هێزێوە گۊرەتەرو ۋەرکۊتوو مېیامینی، جا ئێران و گەلاو ئێرانی دلۍ ئاساوو فشارەکا ۋێشەنە هاڕۆنە، پانتورکیزم ئێرانی بە قووڵایی ستراتیجیی ۋێش مزانۆ، هەر ۋەروو ئینەی هەر پلانێوە پەی ئێرانی کیشیۆ، تورکیایچ یاگێ ۋێش چنە مکەرۆوە، مەراموو تورکیای جە هرووژم و سەرو پانیشتوو کورڎەسانینە، ئانەنە تا زەمینەسازیی ئی کاریە جە ئێراقەنە فەراهەم بکەرۆ، هەوڵ مڎۆ پی هرووژمەیە گەلوو کورڎی بماڕۆ و پیلانەی چەپەڵەو ۋێش پەی بیەی بە هێزێوە گۆرەتەری جە ناوچەکەنە دەس وزۆ.

پەدەکە و بنەیانەو بارزانیی چی ئەرەگیریەنە بە شێوێوە چالاک نۆکەرۍ تورکیاینۍ، وەختۍ ماچمۍ «بارزانیی تا پەردەو گۆشیش جە خیانەتەنە نوقم بیەن» بڕۍ کەسۍ و لایەنۍ پنەشا ناوەشا! بەڵام قسەکۍ ئێمە تەمام حەقەتینەنە. ئانۍ هەڵای جە جیاوازیی «کورڎی ئازاڎی» و «کورڎی کۆیلە»ی نمەیاوانە! پەکەکە تەڤگەرۍ کورڎی ئازاڎین، ناپاکیی بارزانیی و پەدەکەیچ تەمام ئاشکران. وەڵتەر نیمەو خاکو پانیشتوو کورڎةسانی (کەرکووک، خانەقین، بەدرە، مەندەلی ناوچەکا تەرو کورڎا فەیلی) بیێنۍ بە قوربانیی مشەوەری دەسەڵاتوازیی بنەیانەی گەندەڵوو بارزانیی. ئیساتێچ نیمەکەی تەرو خاکو پانیشتوو کورڎةسانی جەلایەنو بنەیانەو بارزانییوە پێشکەش بە ڕژێموو فاشیستی تورکیای مکریۆ، پېسە چنی بارزانیی شەنگالش پێشکەش بە داعشی کەرد، ئیساتێچ سەراپاو خاکو پانیشتوو کورڎەسانی و ناوچەکا هامسنوورو ۋەرکۊتوو کورڎەسانی، مکەرۆ بە سەوقاتی تورکیای فاشیستی، ئینەیچ پەی ئانەی ئەردۆگان بتاوۆ ئا ڕاڕەوەی مەتڵەبشا، تا بەسڕە درێژش بکەرۆوە.

ئەرەگیریەکۍ سوپاو تورکیای و ناپاکیی بنەیانەو بارزانیی دژ بە کورڎا، هەر بە پانیشتوو کورڎەسانیوە نەمردانۆ، بەڵکم مەترسیی گۊرەش پەی ۋەرکۊتیچ وەشکەردەن، چونکی تورکیا گەرەکشا تاوانبارە چەکڎارەکا پېسە داعشی و پێڕە سەلەفیی و ئیخوانییەکا هامپەیمانۍ ئەردۆگانی جە سنوورەکا ۋەرکۊتوو کورڎەسانینە بنەپنە وزۆ، ئینە هەڕەشێوە گۊرێنە پەی سەرو بیەو گەلوو کورڎی و مشۆم ئینەی بە کەم نەگېرمۍ، ڕژێموو فاشیستی تورکیای تەنانەت بەزەییش بە دارزەیتوونەکا عەفرینی و وەزەکا زاگرۆسیچەرە نمێوە، پەی یاوای بە وەرمەکاش بە گرڎوو هێزو ۋێشۆ گەرەکشا کوردا سەرو نەخشەو ۋەرکۊتوو دلێڕاسەیۆ سەڕۆوە و پاکتاوشا بکەرۆ. پەکەکە و گەریلاکاو ئازاڎیی تاکە جمیەرێوەنۍ دژوو ئی مەترسیی و فاشیزمەیە مردێنێوە، هەر ۋەرو ئینەی پاڵپەشتیی جە پەکەکەی جەلایەنو هەرکوردێوە ئازاڎیوازی و گرڎوو کورڎەسانیوە، مژارێوە فرە گرنگ و چارەنوویسسازا، پەکەکە پارێزگاریی جە مەسڵەحەتوو کوردا مکەرۆ جە هەر چوار پارچەو کورڎەسانینە. مڎرامانوو پەکەکەی ۋەرا ۋەر بە هرووژمەکا سوپاو تورکیای پەی پارێزنای بیەی و ئازاڎیی و ئایینڎەو سیاسیی کوردا ۋەرکۊتوو کورڎەسانی و گەلا تەرو ئێرانی، فرە ماناڎارا، پەکەکە بە ڕۆحییەتێوە نیشتمانپەروەریی و ئازاڎیوازانۆ سینەش نیان ڕووە و سوپاو تورکیایۆ، مسۆگەر گەریلا ئاپۆییەکۍ دەرزێوە تاریخی بە پانتورکیزم و ئەردۆگانی مڎارە و وەرمەکاش زڕنا.