جە ماوەو ئی یەرە ساڵەینە و بەتایبە جە زمسانو ساڵەو پاریوە چ گورزۍ و شکسێوەشا جە پاو چالاکییەکا گەریلایۆ واردەن. هێزەکاو گەریلای بە دەسێوەشا تفەنگ و دەسەکەی تەریچشا بە کامێراکاشاوە سات بە ساتو هرووژمەکا بە دەنگو هەلهەهەلەیۆ و سەرکۆتەیەکا شآ تۆمار مکەرا.
گەلوو کورڎی چوون گەلێوە خاوەن چاندێوە دۆڵەمەنڼا، کەموو ڕووەدایا هەنۍ، نەتاویۆ بوزیانە دلۍ (ئیدیۆم)ێوە زۋانەوانییۆ. جا ئی پەنۍ سەریە ڕێک نمایندەو ئاژەو شکسواردەو سوپاو تورکی ئەرەگیرینە جە ۋەرا ۋەرو مڎرامانوو شکۆمەنڎو گەریلاکا ئازاڎیی کورڎةسانینە. هێزەکۍ گەریلای سەرو بنەماو 'ڕەخنەی' جە هەر ڕەهەندێوە جەنگکەردەیۆ، سات تا میاوۆ بە ڕۆی، هەنگامە تا میاوۆ بە قۆناغ، هەمیشە جە ۋۍ وەڵێوستەینە بیەن جە تاکتیکی و تەکنیکو جەنگینە، تا ئانەی جە ئیساتێنە موینمۍ، لەشکرێوە گۆرە بەڵام بێ ئیراڎەی پېسە سوپاو تورکی ئەرەگیری، کە جە ئەساسەنە نوێنەرایەتی هێزەکاو ناتۆی مکەرۆ، ساڵانێوەن ئینا جەنگێوە شکسواردەنە ۋەرا ۋەر بە هێزەکاو گەریلاکا ئازاڎیی کورڎەسانی.
با گێڵمێوە پەی مەعناو پەڼنەکۍ; ڕژێم شۆنەو ڕژێمی، دەسەڵاتداری شۆنەو دەسەڵاتدارییرە بە درێژایی دەسەڵاتوو دەوڵەتو کۆمارا تورکیای، هەمیشە گۆشما چانەی بیەن کە 'ئی هامنە دما هامنوو پەکەکە'یا، هەر بە هەمان زۋان و ئیساتۍ دەسەڵاتداری ڕژێمو ئاکەپە-مەهەپەی کە ماچا 'ئێساڵ کرێڵەکەی وزمێرە' کە مەبەسشا دمایی ئارڎەین بە ژڵێوەو ئازاڎی کورڎةسانی، کە جە وەرمی بەدیناماو دەسەڵاتو تورکیوە فاڕیان پەی مۆتەکەو دەسەڵاتداری تورکی.
ڕژێمو ئاکەپە-مەهەپەی جەنگی تایبەت مکەرۆ، گەریلایچ بە وستەی ڕووەو ژمارەی جواب مڎۆوە
پەی یاوای بە مەرامە تاریخیەکەیش، گرڎ ڕا و ڕێبازێوەش گېرتەنەنە ۋەر; جە شارەنە بە زیڼانیکەردەی سەرمەشقا کورڎی و ئازاڎیوازا تەرو دلۍ تورکیای، جە کەشیچەنە بە بەردەوامیدای بە ئۆپراسیۆنە ئەرەگیریەکا، کە ۋەرو چەما دنیێوە چەکی قەڎەغەکریا و گرڎ جۆرە گازێوە کیمیاوی بەکاربەرۆنە، بەبێ ئانەی هیچ کەسێوە بواچۆ مردە ئینە 'تاوانەو جەنگینە'. ڕۆ دماو ڕۆی زیاتەرش مکەرۆ، هەر خودو ۋەرفراوانکەردەی ئۆپراسیۆنە ئەرەگیریەکا بە مەعناو دەس نەیاواین بە مەرامەکاش و قوڵتەربیەیۆ شکسەکاش. چێگەو چا ژمارەو سزاداریایا سەروازا سوپاو تورکی ئەرەگیریما ۋەروچەما گنۆ کە جە چاپەمەنییەکانە وەڵا مکریاوە. ئی ژمارۍ چێشما پنەماچا، ژمارە ۋێش بەڵگەن سەرو شکسو سوپاو تورکی، جە ۋەرا ۋەرو ئی حەقەتینانە سوپاو تورکیای پەی هۆرخەڵەتناو ڕای گرڎینی هەمان ئا دیمەنا جە چاپەمەنییەکاشەنە منیۆراوە کە جە ڕاو چاپەمەنی ئازاڎی و کەسانی مەدەنیوە وەڵۍ مکریاوە، دماین جار ڕۆنامەوانێوە ئاماژەش پانە کەرد کە; دەوڵەتو تورکی دیمەنو ئا کاولکاری و ئێرۋنە وەردایە و سۆچنایە کە بەمەڵامەتوو بۆردوومانەکا فڕۆکە جەنگیەکاشۆ کۆتێنێوە، جە میدیاکاشنە پاسە وەڵاش مکەرۆوە کە گوایە ئینۍ گرڎ بەدەسوو گەریلای سۆتێنۍ! پۊکەی لەشکرو تورکی پەی دەربازبیەی چا شکسا ناچارا پېسە هەرمانەو هەمیشەیی ۋێش بە جەنگی تایبەت حەقەتینەکا شێونۆنە.
ساڵ بە ساڵ وەشڵەیم بە پاری
جەنگەنە یەک یاسا هەنە; یا سەرکۆتەی یا شکس، سەلەمنەرو ئی دووە ئاژەیچە دەرەنجامەکۍ جەنگینۍ. سەرەڕاو شارتەیۆ زەرەرە فرە و فراوانەکەیش، سوپاو تورکی گرڎ هامنێوە پەی ئەنجامدای و دەسپنەکەردەیۆ مەرامە ئەرەگیریەکاش بە پلانەی تازۍ و پەناشەنە نیایرەو فەرماندەی پلە بەرزی و باڵای تازۍ منیۆرە، ئینەیچ شۊنەو ئانەیرە مۍ کە فەرماندەی وەڵینش جە ئەرکەکەیشەنە دوروزیاوە.
تەنیا ڕا پەی بەرشیەی و شارتەیۆ شکسی دلۍ سوپێنە هەر خودو دووروستەیۆ فەرماندەو ئۆپراسیۆنیا.
"بەمەڵامەتوو ئەوەتەقای مینیوە گیانش جە دەسدان"
ئینە دمایین دروۍ جەنگوو تایبەتی سوپاو تورکی ئەرەگیرینە، دماو ئانەی ناچارکریا کە دڎان بنیۆ بە کوشتەی فەرماندێوە باڵایشەرە بە نامۍ عەبدوڵا جەم دەمیرکانی، کە جە لایەنو گەریلاکاو ئازاڎیی کورڎةسانیوە جە هەرێموو زاپینە بە سزا یاوییا. ئی چالاکییەو گەریلای متاومۍ جە دووۍ ڕەهەندێوە شرۆڤەش بکەرمۍ چا ڕەهەندەی کە بە دڵنیاییوە فەرماندە خانەنشینەکۍ و ئانێچ کەدوورۍ وزیاوە بە ۋێشا ماچا وەشڵەیما بە ئازەو ۋێما جە پاو شکسەکاماوە ئیساتۍ زیڼێنمۍ، ئینەیچ هام-ماناو پەنڼە کوردییەکۍ 'ساڵ بە ساڵ وەشڵەیم بەپار'ینە. وە چا ڕەهەندەیچۆ کە سوپاو تورکی بەشێوێوە جە شکسوو ۋێشەنە تلیانۆ کە ئیتر دروەکۍ جەنگی تایبەتی و چەواشەکاریچ نمەتاوا پەرڎە پۆشو شکسەکاش بکەرۆ.
ئاسمانو هەرێمەکاو پارێزنای مەدیای جە هەر فەسڵێنە بۆ هەر پەی گەریلاین
سوپا فاشیستەکۍ تورکی، عەیامێوەن لافو گەزافو ئانەی مڎاۋنە کە ئی هامنە هێزو گەریلای دلێنەبەرا. ئڼە ئی دروێشا دێنە ئیتر پەی گرڎوو گەلا ڕۊشن بیەنۆ کە ڕێخە و هێزو گەریلای کە ۋێش سەرو بڕواداری ئەرەکۊشای هێزی ئاپۆیی بنیاڎنیان، جە تاریخو ڕزگاری و شکۆینە ڕێخەش کوانەرە و ئیراڎەو ۋێش جە ۋنەو گەشمەرڎاوە هۊرمگێرۆ پەی هەمیشەی مەنۆوە و بە مەراموو ڕزگاری کورڎەسانیچ میاوۆ، جەبنە ئامای و دمایی ئامایش نیا. پۊکەی گرڎوو چەکو دەسوو سوپاو تورکی هیچ نیا جگە جە دروا و چەواشەکاری جەنگو تایبەتی.
چالاکیەکۍ گەریلای سەنگەو مەحەکینە
گەر تەماشەو هرووژمە ئەرەگیریەکا ٢٠٢١ی بکەرمۍ کە دەسەڵاتداری فاشیستو ئاکەپە-مەهەپەی هەم بە مەرامو زیڼەکەردەیۆ وەرمی جە بەینشیەو میساقی میللی و هەمیچ پەی شارتەیۆ ڕووسیاوی دەسەڵاتدارییشا جە دلێینەو تورکیاینە بە مەرامو برەودای بە نەژاڎپەرسی تورکی دەسشا پنەکەردەن، موینمۍ جە ماوەو ئی یەرە ساڵەینە و بەتایبە جە زمسانو ساڵەو پاریوە چ گورزە و زەرەر و شکسێوەشا جە پاو چالاکییەکا گەریلایۆ واردەن. هێزەکاو گەریلای دەسێوەشا بە تفەنگ و دەسەکەی تەریچشا بە کامێراکاشاوە سات بە ساتو هرووژمە ئازایانەکاشا بە دەنگو هەلهەهەلەی و سەرکۆتەیەکا گەریلایۆ تۆمار مکەرا.
بەربڕیەو "ئێگە خاکو گەریلایا و قەبرسانو سەروازا تورکین" بیەن بە مانیفێستۆو باڵادەسیەکا گەریلای; تەرمو سەروازا سوپاو تورکی، بە گڕەو سۆچنای پەناگەکاشارە بەرگنۆ، شناسنامەی جیامەنەو کوشیاکاشا سەرو تفەنگی جیامەنەو دماو بڕەمایشاوەن. ئینێچ گرڎ پېسە زنجیرە فیلمێوە ڕۆ دماو رۆی زمسانی سەردو گەریلایی گەرم مکەرێوە و بێچ بە مزانی پەی گەلی وڵاتپارێزنو کورڎەسانی.
ئانە فەسڵ و هامنی ئاما و ئەرەگیری تازەشا دەسپنەکەردەن بە تایبەت جە ٣ۍ تەمموزیوە جە زەمین و ئاسمانۆ هرووژم هەن، موینمۍ و پېسە هەمیشەی ئاشکرا بیەن کە سوپاو تورکی جە زەمینەنە دلۍ لیتەو شکسو ۋێشەنە نقوم بیەن، گرڎوو فەخریشا بیەو هێزو فرۆکەی جەنگی و درۆنی جەنککەریا. هێزو گەریلای ئی ۋەهارە کە ۋییەرد بە یەک مزانی وستەیرەوارو زیاتەر جە ١٥ فرۆکە بێ فرۆکەوانا سوپاو تورکیش ئەرەیاۋنۍ، ئینەیچ بیەن بە شۆکێوە پەی سوپاو تورکی و ماڕای فەخرەکەیشا. سوپاو تورکی فرە عال چانەی یاوانەنە کە ئیتر لەشکرکێشی زەمینی پەی سەرو کەشە ئازاڎەکا کورڎەسانی محاڵا، پۊکەی پەی ئی ئەرەگیریە تازەیشە پەشتی بە هەلیکۆپتەری بەسۆ پەی فاڕایۆ هێزەکاشا پەی وەزنایرە و بنەپنەوستەیشا چا تەپانە کە مەبەسشا، جە ماوەو ٢٠ ڕووانە یەرۍ هەلیکۆپتەرۍ جۆرو سکۆرسکی سوپاو تورکی جە لایەنو هێزەکاو گەریلایۆ وزیێرە واری، هامکات ڕووانە ئا هەلیکۆپتەرۍ گنانۍ ۋەرو گورزەو گەریلای. مەبەسم چێگەنە ئانەنە; گەریلا بە بیەی هێز و شێوازی سەروازی مۆدێرنیوە هەم ئاسمان و هەم زەمینو هەرێمەکاو پارێزنای مەدیایش ئینا دەسۆ.
