جەمەو ئیسلامی کورڎەسانی (جیک) و جمیەرو زانایا ئیسلامی هامچەرخی و سەردەمیانەو کورڎەسانی بۆنەو ١٠ەمین ساڵیاڎو جینۆسایدو ئێزدییەکاوە ئەرەیاۋنێوەشا وەڵا کەردۆ.

جیک باسش چانەیە کەردەن کە ١٠ ساڵۍ چێوەڵی چەتەکۍ داعشی و ئا هێزە تاریک پەرسۍ کە پەشتیوانیشا کەرێنۍ، تاوانێوە گۊرێشا دژوو مرۆڤایەتی ئەنجامدا و ئەرەیاۋنانش، جە ١٠ەمین ساڵیاڎشەنە جارێوەتەر کۆمکوژیەکەی شەرمەزار و بە نەفرەت مکەرا.

جە ئەرەیاۋناکەینە ئامان، کە جە قورئانەنە بە هیج جۆرێوە دڕندەیێوە پا جۆرە قبوڵ نمەکریۆ و ئاماژە پانەی کریان، "ئێمە دژوو ئا ستەمیە بێدەنگۍ نەبیەیمۍ، بێدەنگێچ نیەنمۍ و مەبیمێچ. مشۆم ۋنەپەرسایۆ چا دڕندەییە بکریۆ کە شەنگالەنە ڕووەشدا. پەی ئانەی ئا تاوانۍ دژوو مرۆڤایەتی جە یاڎ نەکریۆ، ئێمە ئەرەکۆشیەیمۍ. ئینە ۋەرپرسیاری ئایینی و مرۆیی ئێمەن. بە دڵنیاییوە دادپەروەری خوڎاوەندی گۊرەی مچەسپیۆ و ستەمکارا هەم چی جیهانەنە و هەم جە جیهانی دمایینەنە ۋنەپەرسایشا ۋنە مکریۆ."

پەی ئانەی ئا وەحشیگەریە سەرجەنۆ واوەی نەبۆوە، باگەواز پەی یەکڕیزی یەرەیاۋییا

جمیەرو زانایا ئیسلامی هامچەرخی و سەردەمیانەی جە کورڎەسانەنە جە پەیامێوەنە ئەرەیاۋنانش، "داواکاری خەڵکە ئێزدییەکەیما جەلایەنو کاربەدەسا ڕسمی عێراقی و هێزە دلېینەییەکاوە پەشتگۆش وزیێنۍ. ئینە مایل بە قبوڵ کەردەی نییا و نمەبۆ قبوڵ بکریۆ".

جە ئەرەیاۋناکەینە ئاماژە بە هرووژمەکا دەوڵەتو تورکیچ کریان و ئانە وزیان ڕووە کە دەووڵەتو تورکی پەشتیوانی داعشی مکەرۆ. جە ئەرەیاۋناکەینە ئامان، " ١٠ ساڵۍ چێوەڵی خەڵکی ئێزدیما کە نوێنەرایەتی ڕێخەیی گەلوو کوردی مکەرا، رووبەڕوو کۆمکوژی بیێوە. داعش ئا دڕندەییە گۊرەشە سەرو داوا و پلانەو دەوڵەتو تورکی ئەنجامدا. بە دەیان هەزار ئینسانۍ بێتاوانۍ و ستەم ۋنەکریۍ بە دەسوو ئا بکوژا بە شێوۍ دڕندانە کوشیۍ و جە قەبرەی بە کۊمەڵەنە وزیۍ چێرو خاکی. بە دەیان هەزار جوانۍ قارەمانۍ گەلوو کوردی، جەسەشا کەرد بە قەڵغان و وەرم و خیاڵەکا ئا دڕندا و هێزە هەرێمی و مېیاننەتەوەییەکا کە ئاغۍ ئا چەتا بێنۍ، پوچ کەردۆ. ئا دڕندۍ و پلانە و پرۆژەکا پەشتیوانی ئا دڕنداشا دلېنەبەردۍ. پەی ئانەی دڕندەییێوەتەری پاجۆرە رووە نەڎۆوە، ئێمە داوا جە گەلەکەیما مکەرمۍ کە جە دژوو دوژمناشا یەکڕیزی و یۊبیەی ۋێشا قەوەتوو هێقم بکەرا".