ئیساتۍ ئینایمۍ قۆناغێوەنە جە کورڎەسانەنە کە زیاتەر جە گرڎ کاتۍ دووۍ هێڵۍ قارەمانی و خیانەتی ڕۊشنۍ بیێنێوە. ئیتر کڵاوەو کوردایەتیچ سەرەو کەسیرە نمەلۆ، خەڵک نەک بە دروشمە، بە کردەوەو هێزەکا قەرار مڎا کێ خەباتکارا و کێ خیانەتکارا.

لایەنێوە سینەش مکەرۆ بە قەڵغان، خوڵە مووەرۆ و خاک نمەڎۆ، ۋنی مڎۆ و ڕا بە ئەرەگیریی نمەڎۆ، جە ۋەرا ۋەریچەنە لایەنێوە نەک بە پەنهانی، بە رۆی ڕۊشن چەمساغا و عەلەلئەمرا و بۍ حەیایانە گنۆ وەڵۍ ئەرەگیرا پەی سەرو خاک و نیشتمانوو ئەڎۍ.

ئی حەیا تکایە و شکۆ مەڕیایە بەردەوام پەنەوازش بە پاساوێڼ، ئەگەر هەزاران جارێچ سویۍ بۆ، بەڵام هیچ نەبۆ لاو ئا تاقمە کەمەی کە هەڵای نەشناسانشا پاساوەش پەی ماراوە.

پەدەکە چەوەتی هەن، ئانڎەی داردەس بیەن، ئانڎەی خەنجەرە بیێنە جە پەشتەو کوردی و لەمپەربیەن ۋەرودەم و رزگاری، ئانڎەی مشەوەر ئاسا کورڎەسان و گەلەکەش و چارەنویسەکەش کەردەن بە قوربانی خێڵ و تاقمێوە دلۍ خێڵی، دارو مەزادیش جە گرڎوو بەهاکا کورڎەسانی دان، حەجگیز ڕوۍ جە ڕوا دەردێوەس ملوو کوردیرە سوکە نەکەردێنە و جە مەسڵەحەتوو گەلینە یەک هەنگامش نەنیان.

پەی ئەنەیاوای جە کارەساتەکا سەرو گەلوو کوردی و بەردەوامی مەینەتیەکا دماو سەڎێوە ۋنمتەی و قوربانیدای، مشۊم فرە بە عالی هێڵۊو پەدەکەی شی بکریۆوە، هێڵێوە کە ئاوێنەو باڵابرمانای خیانەتی و ناپاکیا.

حزب نەمەنەن جە کورڎەسانەنە خەنجەرەو پەدەکەی ۋەرو مازیش نەکەوتۍ بۆ، نە جە ۋەرکەوت، نە جە ۋەرنیست و نە جە سەرنیشت.

جە سەرەتاو شۆڕشوو گەلا ئێرانیوە، کە ژڵێوەی شۆڕشگێڵنی ۋەرکۊتوو کورڎەسانی جە قولەپۆپەنە بۍ، شارەکاو ۋەرکۊتی دەسوو هێزە شۆڕشگێڵنەکاوە بێنۍ، پەدەکە کە ئا کاتە چێروو نامۍ قیادە موەقەتەینە بۍ، جە کونفەیەکونێنە ساحیبش فاڕا.

ئا حزبە کە تا وەڵۍ شۆڕشوو ئێرانی عەلەلئەمروو ساواکی بۍ، شۆڕشگێڵنا ۋەرکۊتی تیرۆرۍ کەرۍ و رادەسێشا کەرێوە و گرڎوو ژڵێوە چەکڎاریەکا وەڵۍ ١٩٧٩ی سەرکوت کەرۍ و ئانێچ جە دیموو پانیستینە مەنێبێنە، جاسوسیشا سەرۆ کەرۍ، چنی فاڕیای دەسەڵاتی جە ئێرانەنە، پېسە میژوۍ بێ باری بارش فاڕا و کەوت خزمەتوو ئیتلاعاتی و سوپاو پاسدارا.

پەی رەوایەتیدای پا خیانەتەیشە جە بەهانۍ گەورۍ گێڵۍ، ئاڎیچ دەسبەردەیبۍ پەی رەمزێوە ۋێش، قەبرەو مەلامسەفای ئەرەمەرزنەریش جە شنۆ هۊرکەندۆ و کەردش بە بەهانۍ پەی ئانەی وەڵۍ پاسدارا گنۆ و راوەو هێزە شۆڕشگێڵنەکا ۋەرکەوتی بکەرۆ و شارەکا چا هێزا پاک بکەرۆوە.

دەفتەرو خیانەتوو پەدەکەی چێنە نەوزیارە، جە دماو ئەرەپڕایۆ بە هەمان نەفەسەو قیادەموەقەتەی کۊت خزمەتوو دەوڵەتو تورکی و بە دڎانیایپۊرەو ۋێشا زیاتەر جە یەرۍ هەزار کەسێشا پەی ئەرەگیری تورکی بە کوشت دێنۍ.

پەدەکە چی خیانەت و خزمەتکاریی و نۆکەریەیشەنە پەی دەوڵەتو تورکی گرڎوو سنوورەکاش بەزنۍ، تا پاسشەپنەئاما بە رووقایمیوە سوپاو تورکی بە ڕۊی ڕۊشن هێز بە مەنتیقەکا چێر دەسوو پەدەکەیرە جمنۍ، بارەگا و را بە پەدەکەی وەش کەرۍ و جە بەینوو مەنتیقەکانە نوقتۍ وشکنای نیێرە و داواو ئشناسنامەیشا ۋنەکەرۍ و گېرێشا.

ئی سکانداڵ و حەیا شیەیە جۆرێوەن کە ئیتر دلۍ پەدەکەیچەنە جە ڕووەشا هۊرنمۍ بەهانێش پەی باراوە، حەرپۊکەی ئیجارە کۊتۍ سیناریۆ تاشایرەی تەری.

ئا هێزەی پەی رەوایەتیدای بە کرێگرتەیی و چەمساغیەکەیش دەسش لووانە قەبرەو سەرکردەی و ئەرەمەرزنەرەکەیش، ئیتر چنی دەسش مەلۊنە سۊچنای قەیسەری و بازاڕەکا و تۆمەتبارکەردەی لایەنێوە شۆڕشگێڵنی و نیشتمانی پا هەرمانۍ.

پەدەکە هەر پانەیچۆ نەمردان، نامۍ مەنتیقەکای تەرو هەرێمیش، پېسە سلێمانی و کەلاری و کفری زڕنێنە، گەرەکشا ئا مەنتیقا بەدەردەو ئا مەنتیقا بەرۊنە، کە وەڵتەر چێر دەسوو ۋێشەنە بێنۍ ، ئیساتۍ پێشکەش بە دەوڵەتو تورکیش کەردێنۍ.