سۆزدار ئاڤێستا، ئەندامەو کۆنسەو سەرۆکایەتیی گردینوو کەجەکەی، جە ١٠یەمین سالەوگێڵوو فەرمانەو ٣ێ ئابوو ٢٠١٤ینە پەی چرا تیڤی قسێش کەردێ و پێسە هورسەنگنایش کەرد:

" 74 ـەمین فەرمانە، 3ی ئابوو 2014 شەنگالەنە دژوو گلێرگەی ئێزدی کریا، وەڵێ گرد چێوێوەنە هێزێوی کۆکوشێ بەشدارێ فەرمانەکێ بێنێ و بیێ بە هێزوو نۆکەری و دەسشا ئەمرەکێنە بێ بەتندی شەرمەزارێشا مکەروو، گیانبەختکەرداو فەرمانەکێ  و ئانێ کە لوێ پیوای گەلوو شەنگالیوە بەڕێزدارییوە یادێشا مکەرووە، جە کەسایەتیی دڵشێر هەرەکۆڵ، عەگید جڤیان، هامڕا نێرگز، ئەڤین دێریک، گەنجۆ هەولێری، و مام زەکی شەنگالی، هامڕا بەشیر، هامڕا سەعید، بەرخۆدان، زەردەشت، ئازاد و فەرماندەو شەنگالی دژوار فەقیر، گردوو گەشمەرداو ئازادی و ئیزیدخانی بە ڕێزدارییوە پەی یاوای بە ئامانجەکاشا یادێ مکەرووە.

ئی فەرمانێ کەی ڕوەش دا و کام هێزە بەشدارێ بێنێ و مەبەست و ئامانجشا چێش بێ؟ بەدڵنیاییوە ماوە ١٠ ساڵان گرد یاگێوە ورسەنگیێنە. بەڵام هەڵای بڕێو چێوێ هەنێ کە هەڵای ڕۆشنێ نەبیێنێوە. ئێمە تەسەورما پاسنەن، مدرامانی شکۆمەندانەو گەلەکەیما لایەنی تاریکوو ئا ڕووەدایە ڕۆشن مکەرۆوە و وەنەپێتەیوە چا هێزە بکوشا مکەرۆ. پی بۆنەوە کۆشیای گەلوو ئێزدیما هەڵای بەردەواما. ئەوەڵ سڵام ئاراسەو ئەداو گەشمەرداو ژەمە ،درامانکەراو یەبەشە و یەژەشەی و ئاسایشوو ئیزیدخانی و گردوو گەلەکەیما مکەروو کە، گرد وەختێ هەرمانەو وێشا کەردێنەشا. بە گیان و دڵ مەبارەکبایی کۆشیایشا وەنە مکەروو کە ناستشا ئی فەرمانێ پاسە دوژمن پلانەش پەی نیێبێرە بیاوۆ بە ئامانجەکەیش.

1 حوزەیرانوو 2014، وەڵی ئانەینە موسڵ بگنۆنە دەسوو چەتەکاو داعشی، ئا هێزێ داعششا وەش کەرد، عەممانو پایتەختوو ئوردنینە جەمێ بیێ. چی دیدارەن سعوودییەکێ ، قەتەر، دەوڵەتی فاشیستوو تورکی و بنەیانەو  بارزانی-پەدەکەی بەشدارێ بێنی. بە پاو ئا قەرارا عەممانەنە دریێنێ، خەتەو شەمگال-موسڵی، حەرپاسە بەشێوێ فرەو دێریکی و قامیشلۆی تەسلیموو داعشی بکریا. ئی قەرارەشا بەڕسمی بەینوو وێسانە باس کەردێ و قەرارشا دا، ڕای گردین ئینەیە مزانۆ. جە وەهاروو  ساڵەو ٢٠١٤ بنەیانەو بارزانی سەروو سنوورێوە  کە ئەرگیرا بەینوو وەرنیشتی و پانیشتینە وەششا کەردەبێ، خەندەقێوەشا هورکەند. ئینە ئەوەڵوو پلانەو عەمانی بێ، ئادێ گەرەکشابێ گلێرگەی ئێزدی قڕ بکەرا. لاێوە گەرەکشابێ کۆنتروڵوو گەلوو ئێزدی بگێرانە دەس و لاێوە تەریچۆ گەرەکشابێ شۆڕشی تازەو وەرنیشتی سەرکوت بکەرا. ئینە ئامانجی سەرەکییشا بێ. ئانێ خیانەتشا، چی گەلەیە کەردەن  ١٠ ساڵین بەردەوامێنێ جە خیانەتەکاشا. پێسە مزانمێ دماو وڕنای سەدامی دیکتاتۆری ساڵەو ٢٠٠٣ گلێرگەی ئێزدی فرسەتوو ئازادییسا پەی هورکەوت.

سەردەموو بنەیانەو بارزانیینە تا ئیساتێ ٢ فەرمانێ ملوو گلێرگەی ئێزدییرە ئامێنێ

گڵێرگەی ئێزدی چەمەڕێ ئانەیە بێنی تا بەئازادی سەروو خاکەکەیشاوە بژیوا. ساڵەو 2004 بە سەرمەشقایەتیی هامڕا سەید حەسەنی، کە ویرۆکەو ڕابەر ئاپۆیش بە بنەما گێرتەبێ و وێش ڕێک وست. تا ساڵەو ٢٠١٤ بنەیانەو بارزانی وەرپەرسیی شەنگالییشا جەدەس دابێ ڕا نەدێنێ ئێزدیێ وێسا ڕێک بوزانە. سەردەموو بنەیانەو بارزانیینە ٢ فەرمانێ سەروو گلێرگەی ئێزدییرە سەپیێ. فەرمانەو ساڵوو ٢٠٠٧ و ساڵەو ٢٠١٤. ناستشا ئێزدیێ وێشا ڕێک بوزانە و هێزوو پارێزنای وێشا بنیات بنیا و بە پاو کولتووری و ڕەسەنایەتیی وێشا بژیوا. پەوکای گرد ڕوێ ئەنداماو ئی جمیەرەی گێرێنێ و قۆرتێ وزێنێ وەردەمشا و نازینێ هاگادارییەکێشا وەڵێ باوە و وەربەسێ بێنێ وەردەموو حەر جۆرە هۆشیارکەردەیۆێوەنە. وەختێو تەرسی سەروو شەنگالیوە زیادە بییە جمیەرەکەما گەرەکش بێ بێ وەرۆ و ڕاگێریی چا تەرسێ بکەرۆ. پەی ئینەیچە بە سەرمەشقایەتیی هامڕا دڵشێر هەرەکۆڵی جەمێو گەریلێش کیانێ پەی شەنگالی، ئینەیچ ماوێوە کەم وەڵیو فەرمانەکێنە بێ و بەشێو چا هامڕایا گیریێ و وزیێ زیندانۆ لاو پەدەکەیوە، ٣ی ئابی کە هجوومەکەو داعشی دەسش پەنە کەرد، پەدەکە گەلوو شەنگالیش  بە دەسی هاڵی جیا ئاستێ پەی چەتەکا و ڕەمێ، وەڵتەر چەکوو خەڵکیشا جەم کەردەبێوە و بێکەرماەتانە ڕەمێ.

پەدەکە ئیساتێچ درێژە پی سیاسەتەیشە مدۆ، حکومەتوو عێراقی و بنەیانەو بارزانی ئێزدییەکێشا نەپارێزنێ. ١٠ساڵێ ملوو فەرمانەکێنە ویەردەن و ماوە ئی ١٠ ساڵەینە، هجوومەکێ سەرەمڕێنێ سەروو گلێرگەو ئێزدی. جە هجوومەکاو سەروو خانەسۆرەیوە گەشمەردێ دریێ  و دەوڵەتوو تورکی گرد ڕوێ بە فڕۆکە و تیرۆر بەردەواما جە هجوومەکاش. ئی هجوومێ پەی کۆچکەردەی گلێرگەی ئێزدینێ سەروو خاکەکەیشاوە. تا ڕاگێریی وەنەو  ئی هجووما بکریۆ، مدرامان بەرز کریاوە، بۆنەو خیانەتەکاو بنەیانەو بارزانییوە، زیاتەر گەشمەردێ دریێ تا هجوومەکاو دەوڵەتوو تورکی.

 قارەماناو پێسەو سەید، دژوار، زەردەشت، بەرخۆدان، ئازاد، دڵدار، خەیری، بێریڤان و ئارینی ئیزیدخانی کریێ ئامانج، چونکوم وەراوەروو خیانەتینە مدرێوە، چونکوم خیانەتکارێ دەوروو ئا هامڕایاشا خاس زانابی پەوکای کەردێشا ئامانج. حەز مکەروو چی فرسەتەنە کەمیو سەرنجە بوزوو سەروو هەرمانە و کۆشیای ئا هامڕایا.

هامڕا سەید وەختوو فەرمانەکێنە کەشوو شەنگالیش جیا ناست. چەنی بنەیانەکەیش، عەشرەتەکەیش، دەورووبەرەکەیش، ،ملا پەی کەشوو شەنگالی و ماچۆ، ئەگەر گردتا ئی یاگێ جیابازدێ و بلدێ من پا هێزەیە جە ڕابەر ئاپۆیوە هورم گێرتەن مەنووە و دژشا مردووە. بەتایبەتی فرەو ئەنداماو عەشیرەکاو ئا سەردەمەی، بنەیانەو هامڕا دژوار فەقیری، پێشمەرگێ پەدەکەی بێنێ، گەرەکشابێ دژوار شەنگالی جیا بازۆ، بەڵام هامڕا دژوار واتش 'تا دما هەناسە چەنی جەنگەواناو ئازادیی  بوو' گردوو عەشیرەکا کەشوو شەنگالینە مەنێوە  گەلەکەما دەورێوی تارێخییش نیشانە دا. ئێمە پێسەو جمیەروو ئازادی، ئینەیە زانێنمێ ئەگەر شەنگالی جیا بازا قەت نمەتاوا بگێڵاوە. بنەیانەو بارزانی گرد چێوێشا پەی چۆڵکەردەی شەنگالی کەرد. بەتایبەت مانگەکاو ئەوەڵوو فەرمانەکێنە، ڕاڕەوو بەینوو وەرنیشتی و شەنگالی کە دەیان کەسێش دلێنە گەشمەردێ بیێ، لاو پەدەکەیوە دەسس ملەرە گیریا و شەنگالیچ تەوقە دریا، تا خەڵک خاکەکەیشا جیا بازانە.

چا وەختەنە کە ئادێ شەنگالەنە مەنێوە، بە سەرمەشقایەتیی سەعیدی و دژواری واچێنێ:" دڵنیا بە خاک موەرمێ و ئاورێ بیمێ، بەڵام دەسبەردارێ شەنگالی نمەبیمێ. ئیساتێ خاستەر میاومێنە، ئا قەرارە وەختوو وێشەنە چند یاگەدار بێ. دنیا ئینەشە دی، گەلوو ئێزدی ئی ڕاسییەشا دی. سەردەمیوی چانەنە هەڵوێستیوی چانە بنەماو فرەو چێواش ڕۆشنێ کەردێوە، پەنەوازا گەلەکەما خاس ئینەیە بزانۆ، کەس نەگنۆنرە تەڵەوە. پەنەوازا بزانیۆ کۆشیای ئیساتێ سەروو چە بنەمێوە کریان. پەی نموونەی ئا هامڕێ کریێ ئامانج، چونکووم وەراوەروو مەیلەکاو یانەو بارزانیینە، سەرەشا نەکۆمنارە.

هامڕا سەعید یۆ چانیشابێ، بنەیانەو بارزانی مانگەو ١٢ بە کارەوانێوە کەوتێ ڕان و لوێ شەنگال، هامڕا سەعید لوا وەروو دەمیشا و ماچۆ شمە بە چە ڕووێوە ئامێندێوە وێگە، شەرەف و کەرامەتما هەڵای ئینا چێروو پایانە بۆنەو شمەوە، چەنی ڕووەتا بیێنە ئامێندێوە؟. گرد لایێوە مزانا کە هامڕا سەعید بۆنەو ئا هەڵوێستە شکۆمەندانەیشۆ کریا ئامانج. دەیان پلانێشا نیێرە تا هامڕا سەعیدشا کوشت. چونکوم ئیب هامڕێ فەرمانەکێشا مدرنا.  

پەنەوازا عێراق هەرگیز نەگنۆنە دامەو دەوڵەتوو تورکیوە  

ئەنجاموو ١٠ ساڵا مدرامانی و کۆشیایوە، شەنگال و دەوربەرش ئازادێ کریێ و هێزوو پارێزنای گەلی بنیاتێ نریێ. ئی هێزاو یەبەشە و یەژەشەی و ئاسایشوو ئیزیدخانی ماوەو ئی ١٠ ساڵەینە بە ئیرادێوی فرەوە مدرامانشا کەرد. بێگومان ئانێ ئارۆشا خولقنا، کەسانیوە پێسەو جەنگەاناو ئازادیی دڵشێر و عەگیدی بێنێ، کە کەشەکاو کوردسانیوە ئامێبێنێ. سەیەو فەداکارییەکاو یەژا ستاری و هەپەگە و یەپەگە و یەپەژەیوە شەنگالوو ئارۆی ئامان دی. چوەختۆ چوار گەنجێ لوێ دەمۆ. ڕەنگای دەوڵەتێ وەروو مسڵەحەتوو وێشا هیچ نەواچا. بەڵام گرد لایێوە ئی ڕاسییەشا دی. سەرکوەزیرانوو عێراقی چا وەختەنە حەیدەر عەبادی مەبارەکباییش جە جمیەروو ئازادیی کەرد. گەلی ئازیز و بەکەرامەتما< حەرچند ١٠ ساڵێ ملوو شەنگلایرە ویەردەن، بەڵام برینەکێش هەڵای وەشێ نەبیێنێوە، هەزارا ژەنی، زارۆڵێ، گەنجێ هەڵای چارەنویسشا نادیارەن. تا هەقەشا بکەراوە، بێگومان هەرمانیوی گەورێ مگنۆنە سەروو شانەو گردوو بەشەکاو گلێرگەی. ئیداروە وێڕاوەبەری بە دیای نەتەوەی دیموکراتیکی ١٠ ساڵێن شەنگالەنە سەرەڕاو گردوو سەختییەکا گلێرگەی مبەرۆنە ڕاوە. شەنگالی مپارێزنۆ، سیاسەت مکەرۆ و پەنەوازییەکا پەڕ مکەرۆوە و درێأە بە کۆشیای مدۆ.

چند ڕوێ وەڵی ئیساتێنە هەرمانێوە فرە خاسە کریا، یەرەمین کۆنفڕانسوو ژەناو عێراقی بەغدانە کریا. جە هەمان گرووپەنە هەرمانێوی ئازادی و دادپەروەریی شەنگالەنە کریا. گەلەکەما سەردەموو مەینەتیش ویەرنان. ئیساتێ متاوۆ خاوەنداریی جە وێش بکەرۆ و وێش بەرۆ ڕاوە. ماوێوە بۆنەو هێزی ئەرەگیرکەریوە ئێشێوە فرەش چەشت. بەڵام ئیساتێ وەختوو وەنەپێتەیوەن، بە مانێوە تەرە خاستەرین جواب پەی فەرمانەکێ چی وەختەنە هەقسانایوە گەشمەردا و مسۆگەرکەردەی ئیدارەو وێراوەبەریین. گلێرگەو ئێمە ئیساتێ فرە خاس هەست پینەیە مکەرۆ، مزانۆ ئەگەر وێس نەبەرۆنە ڕاوە، ئەگەر نەتاوۆ وێش بپارێزنۆ، کەس یاردەیش نمەدۆ، پەوکای فرە گرنگەن، گردوو بوارەکانە وێڕاوەبەرێ و کۆشیای وێش بوزۆنە وەڵێ.  

پی بۆنەوە جارێوە تەر داوا وەنەو دەوڵەتوو عێراقی مکەرمێ، عێراق وەڵاتێوە دۆڵەمەندا. گردوو گلێرگەکا ویروباوڕەکا، کولتوورەکاش دلێنە مژیوا. پەوکای بەتەنیا ئاستەیوە گەلوو ئێزدی بێ پارێزنای و وەرگێری پەی عێراقی هیچ دەسکەوتێوەش نمەبۆ، بەپێچەوانەوە پاشێلکەردەی کەرامەتییا. بەشێو چا قەرارا کە بە هەڕەشێ دەوڵەتوو تورکی و بەدەس ئامێنێ ، خزمەت بە بەرژەوەندییەکاو عێراقی نمەکەرا. ئێسدیێ هیچ زەرەرێوەشا  بە دەوڵەتوو عێراقی نەیاونان. سەرەڕاو گردوو هجوومەکا سەروو خاکوو وێشاوە مژیوا و هجوومشا نەکەردەن سەروو هیچ کەس و لایەنێوی. پەنەوازا عێراق وەراوەروو هەرەشەکاو بنەیانەو بارزانینە تەسلیم نەبۆ، بەتایبەتی نەگنۆ دامەو دەوڵەتوو تورکیوە. کۆکوشکەردەی گلێرگەی ئێزدی شەرمەزاری و بێکەرامەتییا پەی دەوڵەتوو عێراقی. ئانە کە پەنەوازەن بکریۆ، دداننیایپۆرەین بە پلێ شەنگالیرە لاو دەوڵەتوو عێراقیوە، ئینەیچ بە دەسوور مکریۆ، نموونەو ئینەیچ پانیشتوو کوردسانییا.  

مشۆم کەس بەینوو عێراقی و بارزانییەکانە بازرگانی بە گەلوو ئیزیدییوە نەکەرۆ

نمەبۆ کە گلێرگەو ئێزدی بکەرۆ بە مەسەلێوە بازرگانییە وبەینوو عێراقی و بنەیانەو بارزانی. جە پڕۆسەو دمایینە گەمێ تازێ مکریا. ئێمە ناموێ نییەنمێ پی گەما سەردەمێوە ئەرمەنستان و ئەڵمانیانە ماوەو دە ساڵا  قسەوباس سەروو ئانەیە کریێ، کە ئایا ئێزدییەکێ کوردێنێ یا نا. ئادێ گەرەکشانە هەمان چێوی عێراقەنە بکەرا، ئینە پەرسەو ڕۆو پێکائاماو گلێرگەی ئێزدی نییەن. حکومەتوو عێراقی پەنەوازا ڕێککەوتەینامەو ٩و ئۆکتۆبەری هوربشنیۆوە و ڕێککەوتەی هامبەش چەنی هێزوو ئێزدیی شەنگالی دەس پەنە بکەرۆ. ئەگەر هەرمانێوی چانێ بکریۆ مشۆم داواو چەنەویەردەی جە ڕووەدای فەرمانەکێ. قەرەبووکەردەیوە ئا کارەسەتەیە پەی شەنگالی ئانەنە کە ددان بە شەنگالیرە بنریۆ و ئاشتیی دیموکراتیک، دلێ ئی گلێرگەینە وەش بکریۆ. وەڵێ گرد چێوێوەنە با گەلەکەما، گولوو ئێزدی بە کەسی نەخەڵەتییۆ. پەنەوازا پاسە فکر نەکریۆوە کە فەرمانەکێ دماییش ئامان، سەردەمێوە ویەردەن، ئیساتێ هەڵای ئا گەما موینمێ کە مکریانە.

موینمێ کە بە سەرکردایەتیی بنەیاەنەو بارزانی چەتەکاو داعشی پانیشتنە مچەسپیانێ. ئیساتێ پانیشت ئینا چێروو ئەرەگیرکاریی دەوڵەتوو تورکینە. وەراوەروو ئینەینە مدرامانێوی گەورە هەن، تەرسەو کۆکوشیی هەڵای بەردەوامەنە، پەکای پەنەوازا گەلەکەما ئینەیە خاس بوینیۆ. لاێوە کۆشیای وێش زیاتەر بکەرۆ و وێپارزینی قەوەتتەر بکەرۆ. ژەنی ماوەو ١٠ ساڵان ئینێ جادەکانە. ئادێ سەرمەشقایەتیی مدرامانیوی گەورەی مکەرا و یاگەپایاو بێریڤان و نازێیەکانە درێژە بە کۆشیای مدانە. حەرچندە فەرمانێ فرێشا ملەرە ئامێنی، وەلێ سەرە پەی هیچ ستەمکاریوی نمەکۆمنارە. هەمان وەختەنە بیێنێ بە هومێد پەی گردوو گەلە ستەموەنەکریایا، ئەدێ و ژەنی چێگە سەرمەشقایەتیی مکەرا. ئادێ سەروو بنەماو ویرۆکەکاو ڕابەر ئاپۆی وێشا ڕێک وستەن و تاموو ئازادییشا چەشتەن. ماچا ئەگەر وەڵتەر ئی ویرۆکێما بیێنێ‌، ئی چیوێ ڕووە نەدێنێ، ئیساتێ قسەوباسی فرە گرنگ سەروو بنەماو ویر و فەلسەفەو ڕابەر ئاپۆی مکریا.

دلێ گلێرگەی تۆموو قینێ و جیاکارییشا شانابێ، ئینسانەکێ تەنانەت چیوو دەسوو یۆیچ نەوەرێنێ، بەڵام ئیساتێ ژەنێ ئێزدیێ، عەرەب، تورکمان، سووریانی و عێراقیێ شانە بە شانەو یۆترینی مکۆشیانە. ئینەیچ جە سەیەو ویرۆکەکاو ڕابەر ئاپۆی کە خەتەو ئازادیی ژەنێشا پەرە پەنە دا، ئامان بەرهەم. ئارۆێچەنە ژەناو شەنگالی  سەرمەشقایەتیی ئی کۆشیایە مکەرا، مدرامان بەرز مکەراوە. ئینە فرە گرنگەن. گەنجاو ئێزیدخانی سەروو خەتەو بێریڤانێ و نازێوە مکۆشیانە. من باوەڕم پاسنەن ئی گەنجێ سەرمەشقایەتیی ئی پڕۆسەیە مکەرا، قەبرسانوو گەشمەرداو شەنگالینە جە فرەو ویروباوڕەکانە گەشمەردێ هەنێ. ئینە بناغەو وێراوەبەریی دیموکراتیکوو شەنگالیشا نیا. ثێسە داوا جە گلێرگەی ئێزدیما مکەرمێ بەروو وەڵاتینە و گرد یاگێوەنە، بە گرد نۆعێوی وێشا ڕێک بوزانە و دژوو خیانەتی بە یۆگێرتەیی گەلەکەیشا و شەنگالی بپارێزنا.

گەلوو شەنگالی ئیساتێ پێسەو ساڵاو وەڵێ نییەن، ئیسە هێزوو وێشا هەن و بە یاواینەیوە وێشا مبەرانە ڕاوە، ڕا و ئامرازەکاو کۆشیای مشناسا، متاوا چانەیە بیاوانە کێ دۆسا و کێ دوژمنا، ئینە فرە گرنگەن. هەمیشە  واتەنشا؛ ئازارە گەورەکێ ئەنجامێوی گەورە شۆنەو وێشارە مارا، با گرد لاێوە بزانا، کە ئی فەرمانێ فەرمانەی ئاخیرەینەنە، واوەیش مکەرمێوە، ئەگەر گەلەکەما بە مدرامان و کۆشیای وێش و ویرۆکەکاو ڕابەر ئاپۆی یۆبییەی وێش بنیات بنیۆ. وێڕاوەبەری بمەرزنۆرە و هیچ هێزێوە نمەتاوۆ هجووم بکەرۆ سەرش.  با نەواچمێ ئێمە بە ٧٣ فەرمانێ دلێنە نەشییەیمێ، بە فەرمانێ ٧٤ەمینیێچ دلێنەنەشییەیمێ، ئینە ڕاسییەن بەڵام جە پڕۆسەو جەنگی یەرەموو جیگانینە مۆدێرنیتەی سەرمایەداری و هێزە هەژموونوازەکا وەڵاتا وێران مکەرا. پەی بەرژەوەندیی وێشا گرد چێوێ مکەرانە قوربانی. پێسە چەنی ١٠ ساڵێ چێوەڵتەر گەلەکەما  وێشا گرد چێو مکەرانە قوربانی. ئێمە پڕۆسێوەنە مژیومێ کە زوان کولتوور کەسایەتی پیسەو وەروێ متاویاوە، تا فەرمانەکێ پەی ئاخری دماییشا پەنە بێ، پەنەوازا مدرامان و کۆشیای زیاتەر بکریۆ، واوەی ماچوو ئێمە قەرزارێ گەشمەردا و ڕابەر ئاپۆینمێ و گەلی مدرامانکەریما، کە گێڵیوە پەی یاگێ وێشا دماو ئانەیە ئا فەرمانێ کە ملوو گەلی ئێزدیرە ئامێ، ئانە هەوەڵین جارا، گەلوو ئێزدی مگێڵانێوە سەروو خاکوو وێشا. سەروو ئی بنەمێ داوا جە گەلەکەیما مکەروو بگێڵانێوە پەی سەروو خاکی مەبارەکوو وێشا و بە کەرامەت و دڵسۆزییوە سەروو خاکوو وێشاوە بژیوا."