تەڤ-چاند ئەوروپا ساڵیادوو کۆکوشیی شەنگالینە ئەرەیاوناش: "هجووموو دەوڵەتوو تورک و پارتی دیموکراتوو کوردستانی پەی سەروو شەنگالی بەردەوامەن، مدرامانوو شەنگالی دەروێشوو سەردەمی مخولقنۆ، پەنەوازا گەلوو ئێزدی بپارێزنیا و سەربگنانە."
تەڤ-چاند ئەوروپا، بە بۆنەو ٧٤ ـەمین فەرمانەو سەروو شەنگالیوە بەیاننامێو نویسیاش وەڵا کەردۆ و ئەرەیاوناش: "سەدەو ٢١ینە کە جەنگی یەرەموو جیهانی ڕووە مدۆ، گەلوو شەنگالی بۆنەو خیانەتوو پەدەکەیوە واوەی ڕووبەڕووێ کۆکوشیێ بیێنیوە، بەتایبەتی فاشیزموو دەوڵەتوو تورکی چەنی خیانەتوو پەدەکەی گەرەکشابێ سیاسەتوو جینۆسایدی بەتەمامەتی شەنگالەنە بکەرا. ڕۆو ٣١و ئابوو ٢٠١٤ هەزارا زارۆڵی و گەنجێ و ژەنی کۆکوشێ کریێ. گەرەکشابێ ئانێ ٧٣مین فەرمانەنە نەجاتشا بییەن بە دڕندەیی داعشی و هامکاریی خیانەتکارا پەی هەمیشەی بریا دلێنە، ژەنی و زارۆڵێ عومرێوە کەمەنە بازاڕەکانە ورەشیێ و پیسە و جە کەسایەتیی ژەنێنە ئامانجشا دلێنەبەردەی ئیرادەو گلێرگەی ئێزدی بێ. بنەڕەتەنە ئامانجشا دلێنەبەردەی کولتوور و ژیوای و ئیرادەو ئا گەلەیە بێ. زانێنێ ژەنی سەرچەمەو کولتووری و ڕەسەنایەتیی کوردینە کەردێشا ئامانج."
'بە دۆمۆلوای گەریلای کۆکوشییەکە مردنیا'
واوەی بەیاننامەکەنە ئینە وچیان:
"سەردەمی چانەنە، بە سەرمەشقایەتیی گەریلاکاو هەپەگە/یەژاستار، بە هامکاریی یەپەگە-یەپەژەی و هامکاریی گەلوو شەنگالی، هجوومو جینۆسایدی شەنگالنە مردنیا و مدرامانی بەردوام کریا. بە سەرمەشقایەتیی خەتەو ئازادیی ژەنێ ئی مدرامانە وێش یاونا سەرکەوتەی. ئا ئینسانێ جە گرد ڕووێوە سرووشت و نەریتوو وێشا مپارێزنا سەرچەمەو کولتوورتی ڕەسەنوو مەنتێقەکەینێ و بەرەو وێراوەبەری ملا. سەرەڕاو گردوو فشارەکاو دەوڵەتوو عێراقی و خیانەتوو پەدەکەی و دەسدرێژییەکاو دەوڵەتوو تورکی، گەلوو ئێزدیما سەیەو بەها تارێخییەکاشۆ مدرامان مکەرۆ و کۆلتووری کۆنیش مپارێزنۆ.
گەلی ئێزدی کۆنتەرین کولتوور و باوەڕشا هەن، ئارۆ بە وێڕێکوستەیشا گەرەکسانە ڕاگێریی جە کۆکوشیی بکەرا، حەرچندە ١٠ ساڵێ ملوو ئا کۆکوشییەیرە ویەردەن، بەڵام دەسدرێژییەکاو دەوڵەتوو تورکی و پەدەکەی پەی سەرووشەنگالی بەردەوامێنێ. ساڵانێوەن کەلتووری ئێزدی خزمەتش بە کولتوور و هونەری کوردی کەردەن، ئارۆیچ دەروێشێ مخولقنۆ.
'پەنەوازا گەلی ئێزیدی بپارێزنیۆ و بوزیۆ وەڵێ'
ئێمە پێسەو هونەرمەنداو کوردی، واوەی جەخت سەروو گرنگی پەرەپەنەدای و پاریزنای گەلەکەیما و گەلوو ئێزدیی مکەرمێوە، چی پڕۆسەنە گرد جۆرە هجوومێوە دژوو شوناس و کولتوور و زوان و هونەری کوردی مکریۆ، پەوکای پارێزنای سەرچەمەو کوردایەتی (شەنگال) پەی ئێمە فرە گرنگەن. پەوکای پیسەو هونەرمەنداو تەڤ-چاندی جینۆسایدوو ٣ی ئابی شەرمەزار مکەرمێ و داوا جە گردوو دۆسا و ئازادیوازا و هونەرمەندا مکەرمێ کە شەنگالی بپارێزنا و ڕا جە هەوڵە تازاو جینۆسایدی بگێرا. داوا جە گردوو وەڵاتپاریزناو گەلەکەیما مکەرمێ بە ڕۆحوو سەردەمیوە خاوەنداری جە زوان، شوناس، گۆرانیێ و کولتووروو وێشا بکەرا.پەنەواازا گرد لاێو بەشدارێ ئا چالاکی و ڕاپیمایا بکەرا، کە بە ڕۆحوو مدرامانوو شەنگالیوە مکریا و دەنگوو وێسا بەرز بکەراوە پەی ڕاگێری جە کۆکوشکەردەیوەی. ئاخرۆ جە کەسایەتیی ماما زەکیی شەنگالینە بەڕێزدارییوە گردوو گەشمەرداو شەنگالی یادێ مکەرمێوە."
