دژوو قەرارەکەو دەسەی دادوەریی هۊرچنیەکا ئەنجوومەنو دادوەریی عێراقی سەبارەت بە هۊرشێونایۆ تەڤگەرو ئازاڎیی گلېرگەو کورڎەسانی، پارتو ئازاڎیی دیموكراتی ئێزدی، بەرەو ئەرەکۊشای دیموكراتی؛ وێرەگاو ئارۆی دەسەو ڕاوەبەری تەڤگەرو ئازاڎیی گلېرگەو کورڎەسانی، کۆنگرێوە ڕۆنامەوانیشا ئەنجام دا.

هامسەرۆکەو گرڎینەو تەڤگەری ئازاڎی تارا حسێنە واتش: "تەڤگەری ئازاڎیی جە ئەرەمەرزیاو کاروباری سیاسیی و کۆمسیۆنو باڵاو هۊرچنیەکا عێراقینە ئیجازەی ڕسمیش هۊرگېرتەن، ئێمە بە ژنەوییەو ئی قەراریە توشوو شۊکی بیەیمۍ".

ئاماژەش پانەیە کەرد وەڵۍ قەرارەکەینە هیچ ئاگاڎارکەردەیۆ و هۆشداریێوەشا پنە نەڎریان، واتش: "ئی قەرارە نیشانۍ پرسیاری وزۆ سەرو دادگاکاو عێراقی، نمەکریۆ هێزێوە سیاسیی ڕسمی، کە بەهیچ جۆرێوە هەرمانەی نایاساییەش نەکەردێنە و ئەندامەکێچش جە هیچ پاشێلکاریێوە یاسایینە بەشدارۍ نەبیێنۍ و گولانەتەرین لادایما نەبیەن، تا قەرارێوە چامنەش جە دژ بەر بکریۆ".

حەرپاسە تارا حوسێنە واتش: "ئانەی کە دەسش ئینا جە پەلکێشکەردەی ئەرەگیرانە پەی دلۍ خاکو کورڎەسانی مشۆم ئاڎ دادگایی بکریۆ، ڕووەو دەمیما مکەرمۍ سەرۆککۆماری و سەرۆکوەزیرانو عێراقی، کە سەلەمناش چکۆنە تەڤگەری ئازاڎیی هەرمانێوە نایاساییەش کەردێبۆ، جە حەقەتینەنە ئێمە دژوو هەر پێکئامایۍ و هێزێوەنمۍ کە هینوو بەری بۆ و جە دژوو پێکئامایەکا عێراقی بۆ".

تارا حسێنە ئەرەیاۋناش دژوو ئی قەراریە ڕاوجای یاسایی گێرانە ۋەر، داوا جە هێزە سیاسییەکا عێراقی و هەرێمی مکەرمۍ هەڵوێسشا بۆ، واتش: "ئی قەرارە تەمام سیاسییا و سەرو بنەماو زانیاری غەڵەتی دریان و دەسوو بەری و خیانەتیش ئینا پەشتیۆ".