سەرو داواو ناڤ-بەرلینی و ئەنجومەنو ژەنا دەست-دانی ۋەردەم و وەزارەتو جبەرو ئەڵمانیاینە هرووژمە ئەرەگیریەکۍ دەوڵەتو تورکی فاشیستی بە چالاکیێوە شەرمەزارۍ کریۍ.
وەڵۍ دەسپنەکەردەو چالاکیەکەینە شاندێوە ناڤ-بەرلینی دۆسیێوەش رادەسوو ۋەرپەرسا وەزارەتو جبەرو ئەڵمانیای کەرد کە جەمۍ داواکاریێش جە ۋێش گێرتێبێنۍ.
دماتەر چالاکییەکە ئەنجامدریا و جە وتارەکانە ئانە یاڎ وزیاوە کە دەوڵەتو تورکی جە ١٥و حوزەیرانو ٢٠٢٤ بەدماوە جە پانیشتوو کورڎەسانینە ئۆپراسیۆنێوە تازەی سەروازی ئەنجام مڎۆ.
ئاماژە پانەیچ کریان کە مەراموو دەوڵەتو تورکی چا هرووژمانە ئانەنە کە بە شێوێوە درێژخایەن جە دژوو یاسا مېیاننەتەوەییەکا کورڎەسانی ئەرەگیر بکەرۆ.
جە وتارەکانە داوا جە گلېرگەی مېیاننەتەوەییی کریا کە ۋەرا ۋەر پا هرووژما مردۆوە، ڕاو جا بگێرۆنە ۋەر و جە دژوو هرووژمەکا دەوڵەتو تورکی فاشیستی گنۆ ۋێش و کۊششەکاش بوزۆنە گەڕ.
بەنامۍ یانگ ستراگڵیشیوە وتارە پێشکەش کریا و چنەشەنە ئەرەیاۋییا کە دەوڵەتا پېسە ئەمریکای و ئەڵمانیای پەشتیوانی جە سیاسەتە ئەرەگیریەکا تورکیای مکەرا و ئانەیچ وزیا ڕووە کە هرووژمەکۍ نمەتاوا مڎرامانوو ئاڎیشا بماڕا.
جە کاتو چالاکیەکەینە ژمارێوە فرۍ وەڵا کریۍ سەرو مژارەکەی دابەشۍکریۍ. چالاکیەکە بە واتەیۆ چن دروشمێوە دمایش پنە ئاما.
